ಅದಾಲತ್​ನಲ್ಲಿ ಒಂದಾದ 3 ಜೋಡಿ

ಕೆಜಿಎಫ್​ನಲ್ಲಿ 34,44 ಪ್ರಕರಣ ಇತ್ಯರ್ಥ - ಒಟ್ಟು 2.95 ಕೋಟಿ ರೂ. ಸಂಗ್ರಹ

ಕೆಜಿಎಫ್​: ನ್ಯಾಯಾಲಯಗಳಲ್ಲಿ ವಿವಿಧ ಪ್ರಕರಣಗಳಿಗೆ ಸಂಬಂಧಿಸಿದಂತೆ ದಾಖಲಾಗಿರುವ ದಾವೆಗಳ ತ್ವರಿತ ವಿಲೇವಾರಿಗಾಗಿ ಶನಿವಾರ ಹಮ್ಮಿಕೊಳ್ಳಲಾಗಿದ್ದ ಲೋಕ ಅದಾಲತ್​ನಲ್ಲಿ ಬಾಕಿಯಿರುವ 7,176 ಪ್ರಕರಣಗಳ ಪೈಕಿ 3,518 ಪ್ರಕರಣಗಳನ್ನು ಕೈಗೆತ್ತಿಕೊಳ್ಳಲಾಗಿದ್ದು 3,444 ಪ್ರಕರಣಗಳು ಇತ್ಯರ್ಥಗೊಂಡು, ಒಟ್ಟು 2.95 ಕೋಟಿ ರೂ. ಸಂಗ್ರಹವಾಗಿದೆ.

ನಗರದ ನ್ಯಾಯಾಲಯದಲ್ಲಿ ಹಮ್ಮಿಕೊಂಡಿದ್ದ ಅದಾಲತ್​ನಲ್ಲಿ ರಾಜಿ ಮಾಡಿಕೊಳ್ಳಬಹುದಾದ, ನ್ಯಾಯಾಲಯಗಳಲ್ಲಿ ಬಾಕಿ ಇರುವ ಪ್ರಕರಣಗಳು ಹಾಗೂ ವ್ಯಾಜ್ಯ ಪೂರ್ವ ಬಾಕಿ ಪ್ರಕರಣಗಳು ಹಾಗೂ ವ್ಯಾಜ್ಯ ಪೂರ್ವ ಪ್ರಕರಣಗಳನ್ನು ಸಾರ್ವಜನಿಕರು ಲೋಕ ಅದಾಲತ್​ನಲ್ಲಿ ಇತ್ಯರ್ಥಪಡಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು.

ಕಾರಣಾಂತರಗಳಿಂದ ವಿಚ್ಛೇದನಕ್ಕಾಗಿ ನ್ಯಾಯಾಲಯದ ಮೆಟ್ಟಿಲೇರಿದ್ದ ಮೂರು ಜೋಡಿಗಳ ಮನವೊಲಿಸಿ ಮತ್ತೆ ಒಂದಾಗಿಸುವಲ್ಲಿ ನ್ಯಾಯಾಧೀಶರು ಯಶಸ್ವಿಯಾಗಿದ್ದಾರೆ. 2024ರ ಸೆಪ್ಟಂಬರ್​ನಲ್ಲಿ ವರ್ಷಿಣಿ ಮತ್ತು ಗಜೇಂದ್ರ, ಅಕ್ಟೋಬರ್​ನಲ್ಲಿ ಬಿ.ಕೆ.ಮಣಿ ಮತ್ತು ಸುಗುಣಮ್ಮ, ನವೆಂಬರ್​ನಲ್ಲಿ ಮೋನಿಶಾ ಮತ್ತು ಅಪ್ಸರ್​ ಅವರು ವಿಚ್ಛೇದನಕ್ಕಾಗಿ ಅರ್ಜಿ ಸಲ್ಲಿಸಿದ್ದು, ನ್ಯಾಯಾಧೀಶರಾದ ವಿನೋದ್​ಕುಮಾರ್​ ಮತ್ತು ನದಾಫ್​ ಅವರು ಅರ್ಜಿದಾರರ ಮನವೊಲಿಸಿ, ರಾಜಿ ಸಂಧಾನ ಸೂತ್ರ ಅನುಸರಿಸುವ ಮೂಲಕ ಮತ್ತೆ ಒಂದು ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಮೋಟಾರು ಅಪಘಾತ ಪರಿಹಾರ ನ್ಯಾಯಮಂಡಳಿ ಪ್ರಕರಣ, ಹಣಕಾಸು ಸಂಸ್ಥೆಗಳಿಗೆ ಸಂಬಂದಿಸಿದ ಪ್ರಕರಣಗಳು, ಕೈಗಾರಿಕಾ ಕಾರ್ಮಿಕರ ವೇತನಕ್ಕೆ ಸಂಬಂಧಿಸಿದ ಕ್ಲೇಮುಗಳು, ವೈವಾಹಿಕ/ಕೌಟುಂಬಿಕ ಪ್ರಕರಣ(ವಿಚ್ಛೇದನ ಹೊರತುಪಡಿಸಿ), ಚೆಕ್​ಬೌನ್ಸ್​ ಪ್ರಕರಣಗಳು, ಆಸ್ತಿಯಲ್ಲಿ ಪಾಲು ವಿಭಾಗ, ದೂರವಾಣಿ ಬಾಕಿ ಬಿಲ್ಲುಗಳ ಪಾವತಿ ಪ್ರಕರಣಗಳು, ಕಳೆದ ತಿಂಗಳಿನಿಂದ ಪ್ರಚಾರ ಮತ್ತು ಅರಿವು ಮೂಡಿಸಿದ್ದರಿಂದ ಇಷ್ಟೂ ಪ್ರಕರಣಗಳು ಇತ್ಯರ್ಥವಾಗಲು ಸಾಧ್ಯವಾಯಿತು ಎನ್ನಲಾಗಿದೆ.

ಕಳೆದೊಂದು ತಿಂಗಳಿನಿಂದ ಕೆಎಸ್​ಆರ್​ಟಿಸಿ ಸಂಸ್ಥೆಯವರು ಪ್ರತಿನಿತ್ಯ ವಿತರಿಸುವ ಟಿಕೆಟ್​ಗಳ ಹಿಂಭಾಗದಲ್ಲಿ ಮತ್ತು ಬಸ್​ಗಳ ಹಿಂಬದಿ ಇಲ್ಲವೇ ಎಡ ಮತ್ತು ಬಲ ಭಾಗಗಳಲ್ಲಿ ಭಿತ್ತಿ ಪತ್ರಗಳನ್ನು ಅಂಟಿಸುವ ಮೂಲಕ ಸಾರ್ವಜನಿಕರಲ್ಲಿ ಲೋಕ ಅದಾಲತ್​ ಬಗ್ಗೆ ಅರಿವು ಮೂಡಿಸಿದ್ದರು.

ನಗರಸಭೆ ಮತ್ತು ಗ್ರಾಮ ಪಂಚಾಯಿತಿಗಳಲ್ಲಿ ಪ್ರತಿನಿತ್ಯ ಬೆಳಗ್ಗೆ ಕಸ ಸಂಗ್ರಹಣೆಗೆಂದು ಹೋಗುವ ಸ್ವಚ್ಛ ವಾಹಿನಿಗಳ ಮೂಲಕ ಪ್ರಚಾರ ಕೈಗೊಳ್ಳಲಾಗಿತ್ತು. ಅಲ್ಲದೇ ಬೆಸ್ಕಾಂ ಮತ್ತು ಬಿಎಸ್​ಎನ್​ಎಲ್​ ಇಲಾಖೆಗೆ ಬಾಕಿ ಕಟ್ಟಬೇಕಾಗಿರುವ ಗ್ರಾಹಕರಿಗೆ ನೀಡುವ ಬಿಲ್​ಗಳ ಹಿಂಬದಿಯಲ್ಲಿಯೂ ಲೋಕ ಅದಾಲತ್​ ನಡೆಯುವ ಬಗ್ಗೆ ಪ್ರಚಾರ ಕಾರ್ಯ ಕೈಗೊಳ್ಳಲಾಗಿತ್ತು.

ಅಪರ ಹಿರಿಯ ಶ್ರೇಣಿ ನ್ಯಾಯಾಧೀಶ ರಹೀಂ ಅಲಿ ಮೌಲಾಸಾಬ್​ ನದಾಫ್​, ಪ್ರಧಾನ ಸಿವಿಲ್​ ನ್ಯಾಯಾಧೀಶ ಮತ್ತು ಜೆಎಂಎಫ್​ಸಿ ಆರ್​.ಮಂಜುನಾಥ, 1ನೇ ಅಪರ ಸಿವಿಲ್​ ನ್ಯಾಯಾಧೀಶ ಮತ್ತು ಜೆಎಂಎಫ್​ಸಿ ವಿನೋದ್​ಕುಮಾರ್​, ನ್ಯಾಯಾಧೀಶೆ ಶಮಿದ ಇದ್ದರು.