20.51 ಕೋ.ರೂ. ರೈತರ ಖಾತೆಗೆ ಜಮಾ

ಶಿರಸಿ: ರೈತರ ನಿರೀಕ್ಷೆಯಂತೆ 2019-20ನೇ ಸಾಲಿನ ಹವಾಮಾನ ಆಧಾರಿತ ಬೆಳೆ ವಿಮಾ ಯೋಜನೆಯಡಿ ಅಡಕೆ ಹಾಗೂ ಕಾಳು ಮೆಣಸು ಕ್ಷೇತ್ರಕ್ಕೆ ಸಂಬಂಧಿಸಿ ಪ್ರಥಮ ಕಂತು 20.51 ಕೋಟಿ ರೂಪಾಯಿ ವಿಮಾ ಕಂಪನಿಯಿಂದ ಕೆಡಿಸಿಸಿ ಬ್ಯಾಂಕಿನ ಮೂಲಕ ರೈತರ ಖಾತೆಗೆ ಜಮಾ ಆಗಿದೆ. ವಿಮಾ ಯೋಜನೆಯಡಿ ಅಡಕೆ, ಕಾಳುಮೆಣಸು ಕ್ಷೇತ್ರಕ್ಕೆ ಕೆಡಿಸಿಸಿ ಬ್ಯಾಂಕ್, ಸಹಕಾರ ಸಂಘಗಳ ಮೂಲಕ ಒಟು 37,221 ರೈತ ಸದಸ್ಯರನ್ನು ಬೆಳೆ ವಿಮಾ ವ್ಯಾಪ್ತಿಗೆ ಒಳಪಡಿಸಲಾಗಿದೆ. ಅವರ ಪೈಕಿ ರೈತರು ಹೊಂದಿರುವ 72,903 ಸರ್ವೆ ನಂಬರ್​ಗಳಿಗೆ ಒಟ್ಟು 44.57 ಕೋಟಿ ರೂ. ಬೆಳೆ ವಿಮೆ ಪರಿಹಾರ ಬರಬೇಕಿದೆ. ಅದರಲ್ಲಿ ರೈತರು ಹೊಂದಿರುವ 34,670 ಸರ್ವೆ ನಂಬರ್​ಗಳಿಗೆ 20.51 ಕೋಟಿ ರೂ. ವಿಮಾ ಪರಿಹಾರದ ಮೊತ್ತ ನೇರವಾಗಿ ಡಿಸಿಸಿ ಬ್ಯಾಂಕ್​ನಲ್ಲಿ ಹೊಂದಿರುವ ಆಧಾರ ಲಿಂಕ್ ಆದ ಉಳಿತಾಯ ಖಾತೆಗಳಿಗೆ ಜಮಾ ಆಗಿದೆ ಎಂದು ಬ್ಯಾಂಕ್ ಅಧಿಕಾರಿಗಳು ತಿಳಿಸಿದ್ದಾರೆ. ಸರ್ಕಾರದ ಯೋಜನೆಯ ಈ ಲಾಭವನ್ನು ರೈತರಿಗೆ ತಲುಪಿಸುವಲ್ಲಿ ಕೆಡಿಸಿಸಿ ಬ್ಯಾಂಕ್ ಸದಾ ಶ್ರಮಿಸುತ್ತದೆ ಮತ್ತು ಬೆಳೆವಿಮೆ ರೈತರಿಗೆ ಸಕಾಲದಲ್ಲಿ ಸಿಗುವಂತೆ ಮಾಡಲಾಗುತ್ತದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ, ಬ್ಯಾಂಕ್ ಅಧ್ಯಕ್ಷ ಶಿವರಾಮ ಹೆಬ್ಬಾರ ಹೇಳಿದ್ದಾರೆ.

ತಾಲೂಕುವಾರು ಜಮಾ ಆದ ಬೆಳೆವಿಮೆ:
ಶಿರಸಿ 8.34 ಕೋ.ರೂ., ಸಿದ್ದಾಪುರ 3.14 ಕೋ.ರೂ., ಮುಂಡಗೋಡ 73 ಲಕ್ಷ ರೂ., ಯಲ್ಲಾಪುರ 5.58 ಕೋ.ರೂ., ಜೊಯಡಾ 61 ಲಕ್ಷ ರೂ., ಅಂಕೋಲಾ 94 ಲಕ್ಷ ರೂ., ಕುಮಟಾ 15 ಲಕ್ಷ ರೂ., ಹೊನ್ನಾವರ 82 ಲಕ್ಷ ರೂ., ಭಟ್ಕಳ 20 ಲಕ್ಷ ರೂ.