ಕೊಡಗಿನ ಕುಲದೇವತೆ ಮಾತೆ ಕಾವೇರಿ ಪ್ರತಿಮೆಯ ಪುಷ್ಪಾಲಂಕೃತ ರಥಯಾತ್ರೆಯು ಅ.17ರ ಬೆಳಗ್ಗೆ 9 ಗಂಟೆಗೆ ಪಾಲೂರಿನ ಪಾಲೂರಪ್ಪ ದೇವರ ಸನ್ನಿಧಿಯಿಂದ ಆರಂಭವಾಗಲಿದ್ದು, ಬಳಿಕ ಬೆಟ್ಟಗೇರಿ, ಬಕ್ಕ, ಕಾರುಗುಂದ, ಕೊಟ್ಟೂರು, ಚೇರಂಬಾಣೆ, ತೊಟ್ಲುಕುಂಞ, ಕೋಪಟ್ಟಿ, ಚೆಟ್ಟಿಮಾನಿಗಾಗಿ ಮಧ್ಯಾಹ್ನ 2.30 ಗಂಟೆಗೆ ಭಾಗಮಂಡಲ ತಲುಪಲಿದೆ. ಬಳಿಕ ಈ ಬೃಹತ್ ರಥಯಾತ್ರೆ ತಲಕಾವೇರಿಯ ಪವಿತ್ರ ತೀರ್ಥೋದ್ಭವದಲ್ಲಿ ಪಾಲ್ಗೊಳ್ಳಲಿದೆ. ಅ.18ರಂದು ಬೆಳಗ್ಗೆ 6ಗಂಟೆಗೆ ಭಾಗಮಂಡಲದಿಂದ ರಥಯಾತ್ರೆ ಆರಂಭಗೊಂಡು ತೀರ್ಥಪ್ರಸಾದ ವಿತರಣೆಯೊಂದಿಗೆ ಅಯ್ಯಂಗೇರಿ, ಬಲ್ಲ, ಸಣ್ಣಪುಲಿಕೋಟು, ದೊಡ್ಡಪುಲಿಕೋಟು, ಪೇರೂರು, ಬಲ್ಲಮಾವಟಿ, ನೆಲಜಿ, ಚೋಣಕೆರೆ, ಹಳೇತಾಲೂಕಿಗಾಗಿ ಮಧ್ಯಾಹ್ನ 1 ಗಂಟೆಗೆ ನಾಪೋಕ್ಲು ಪಟ್ಟಣಕ್ಕೆ ಆಗಮಿಸಲಿದ್ದು, ಬಳಿಕ ನಾಪೋಕ್ಲು ಪೇಟೆ ಮಾರ್ಗವಾಗಿ ಐತಿಹಾಸಿಕ ಪಾಲೂರು ಶ್ರೀಸತ್ಯಹರಿಶ್ಚಂದ್ರ ದೇವಾಲಯದ ಕಾವೇರಿ ನದಿಯಲ್ಲಿ ವಿಶೇಷ ಪೂಜೆಗಳೊಂದಿಗೆ ತಾಯಿ ಕಾವೇರಿ ಮಾತೆಯ ಕಳಶ ವಿಸರ್ಜನೆಯೊಂದಿಗೆ ರಥಯಾತ್ರೆ ಅಂತ್ಯಗೊಳ್ಳಲಿದೆ ಎಂದು ರೋಝಿ ಚಿಣ್ಣಪ್ಪ ಮಾಹಿತಿ ನೀಡಿದರು.
