ಅನ್ನಭಾಗ್ಯ ಯೋಜನೆಯಲ್ಲಿ ಅಕ್ಕಿ ಕೊರತೆಯಿಂದಾಗಿ ಇಲ್ಲಿಯವರೆಗೂ ತಲಾ 5 ಕೆಜಿ ಅಕ್ಕಿ ಉಳಿದ 5 ಕೆಜಿಗೆ ಕಾರ್ಡ್ದಾರರ ಖಾತೆಗೆ ಹಣ ಸಂದಾಯ ಮಾಡಲಾಗುತ್ತಿತ್ತು. ಫೆಬ್ರವರಿ ತಿಂಗಳಿಂದಲೇ ಹಣದ ಬದಲು ಅಕ್ಕಿ ಕೊಡುವುದಾಗಿ ಸರ್ಕಾರ ಘೋಷಿಸಿ ಮಾರ್ಚ್ನಿಂದ 10 ಕೆಜಿ ಅಕ್ಕಿಯ ಜತೆಗೆ ಫೆಬ್ರವರಿಯ 5 ಕೆಜಿ ಅಕ್ಕಿಯನ್ನೂ ಸೇರಿಸಿ ತಲಾ 15 ಕೆಜಿ ಅಕ್ಕಿ ವಿತರಣೆಗೆ ಮುಂದಾಗಿದೆ. ಆದರೆ ಗೌಡಗೆರೆಯ ನ್ಯಾಯಬೆಲೆ ಅಂಗಡಿಯಲ್ಲಿ ಯಾರೊಬ್ಬರಿಗೂ 15 ಕೆಜಿ ವಿತರಿಸದೆ 10, 12, 14 ಹೀಗೆ ವ್ಯಕ್ತಿಯನ್ನು ನೋಡಿ ಅಕ್ಕಿ ವಿತರಿಸಲಾಗುತ್ತಿತ್ತು. ವೃದ್ಧರು, ವಿದ್ಯಾರ್ಥಿಗಳು, ಅನಕ್ಷರಸ್ಥರು ಬಂದರೆ ತಲಾ 10 ಕೆಜಿ ಅಕ್ಕಿ, ಪುರುಷರು ಬಂದರೆ 13 ಅಥವಾ 14 ಕೆಜಿ ಅಕ್ಕಿ ಕೊಟ್ಟು ತೂಕದಲ್ಲಿ ವಂಚಿಸಲಾಗುತ್ತಿತ್ತು. ಅಂತ್ಯೋದಯ ಕಾರ್ಡ್ದಾರರಿಗೆ 3 ಮಂದಿವರೆಗೆ 35 ಕೆಜಿ ನಂತರ ತಲಾ ಒಬ್ಬರಿಗೆ 10 ಕೆಜಿ ಅಕ್ಕಿ ಹೆಚ್ಚುವರಿಯಾಗಿ ವಿತರಿಸುವ ಬದಲು ನಾಲ್ಕು, ಐದು, ಆರು ಹೀಗೆ ಕುಟುಂಬದ ಸದಸ್ಯರು 3 ಕ್ಕಿಂತ ಹೆಚ್ಚಿದ್ದರೂ 35 ಕೆಜಿ ಮಾತ್ರ ವಿತರಿಸಲಾಗುತ್ತಿತ್ತು.
