1.717 ಕೋಟಿ ರೂ. ಸಂಗ್ರಹ

ಕೆಜಿಎಫ್​- ನ್ಯಾಯಾಲಯಗಳಲ್ಲಿ ವಿವಿಧ ಪ್ರಕರಣಗಳಿಗೆ ಸಂಬಂಧಿಸಿದಂತೆ ದಾಖಲಾಗಿರುವ ದಾವೆಗಳ ತ್ವರಿತ ವಿಲೇವಾರಿಗಾಗಿ ಹಮ್ಮಿಕೊಳ್ಳಲಾಗಿದ್ದ ಲೋಕ ಅದಾಲತ್​ನಲ್ಲಿ ಒಂದೇ ದಿನ ಕೈಗೆತ್ತಿಕೊಳ್ಳಲಾದ 2,579 ಪ್ರಕರಣಗಳ ಪೈಕಿ 2,497 ಪ್ರಕರಣಗಳು ಇತ್ಯರ್ಥಗೊಂಡು, ಒಟ್ಟು 1.717 ಕೋಟಿ ರೂ. ಹಣ ಸಂಗ್ರಹವಾಗಿದೆ.

ನಗರದ ನ್ಯಾಯಾಲಯದಲ್ಲಿ ಹಮ್ಮಿಕೊಂಡಿದ್ದ ಮೆಗಾ ಲೋಕ ಅದಾಲತ್​ನಲ್ಲಿ ರಾಜಿ ಮಾಡಿಕೊಳ್ಳಬಹುದಾದ, ನ್ಯಾಯಾಲಯಗಳಲ್ಲಿ ಬಾಕಿ ಇರುವ ಪ್ರಕರಣಗಳು ಹಾಗೂ ವ್ಯಾಜ್ಯ ಪೂರ್ವ ಬಾಕಿ ಇರುವ ಪ್ರಕರಣಗಳು ಹಾಗೂ ವ್ಯಾಜ್ಯ ಪೂರ್ವ ಪ್ರಕರಣಗಳನ್ನು ಸಾರ್ವಜನಿಕರು ಲೋಕ ಅದಾಲತ್​ನಲ್ಲಿ ಇತ್ಯರ್ಥಪಡಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು.

ಕಾರಣಾಂತರಗಳಿಂದ ವಿಚ್ಛೇದನಕ್ಕಾಗಿ ನ್ಯಾಯಾಲಯದ ಮೆಟ್ಟಿಲೇರಿದ್ದ 8 ಜೋಡಿಗಳ ಮನವೊಲಿಸಿ ಮತ್ತೆ ಒಂದಾಗಿಸುವಲ್ಲಿ ನ್ಯಾಯಾಧೀಶರು ಯಶಸ್ವಿಯಾಗಿದ್ದಾರೆ. ಶಿರ್ಲೆ ಚಿಟ್ಟು& ನವೀನ್​ ಕುಮಾರ್​, ಉಮಾ ಮಹೇಶ್ವರಿ&ಶಾಂತಕುಮಾರ್​, ಸುಧಾಕರನ್​&ಕೋಮಲಾ ದರ್ಶಿನಿ, ನರೇಶ&ಅಂಜು, ಪ್ರಿಯಾ&ಶಿವಕುಮಾರ್​, ಲೇಖನಾ&ಸುರೇಶ್​ಬಾಬು, ಶ್ವೇತಾ&ಹರೀಶ್​, ಸವಿತಾ&ಆಂತೋನಿ ಒಂದಾದ ಜೋಡಿಗಳು.

ನಗರಸಭೆ ಮತ್ತು ಗ್ರಾಮ ಪಂಚಾಯಿತಿಗಳಲ್ಲಿ ಪ್ರತಿನಿತ್ಯ ಬೆಳಗ್ಗೆ ಕಸ ಸಂಗ್ರಹಣೆಗೆಂದು ಹೋಗುವ ಸ್ವಚ್ಛ ವಾಹಿನಿಗಳ ಮೂಲಕ ಪ್ರಚಾರ ಕೈಗೊಳ್ಳಲಾಗಿತ್ತು. ಅಲ್ಲದೇ ಬೆಸ್ಕಾಂ ಮತ್ತು ಬಿಎಸ್​ಎನ್​ಎಲ್​ ಇಲಾಖೆಗೆ ಬಾಕಿ ಕಟ್ಟಬೇಕಾಗಿರುವ ಗ್ರಾಹಕರಿಗೆ ನೀಡುವ ಬಿಲ್​ಗಳ ಹಿಂಬದಿಯಲ್ಲಿಯೂ ಲೋಕ ಅದಾಲತ್​ ನಡೆಯುವ ಬಗ್ಗೆ ಪ್ರಚಾರ ಕಾರ್ಯ ಕೈಗೊಳ್ಳಲಾಗಿತ್ತು.

ಮೆಗಾ ಲೋಕ ಅದಾಲತ್​ನಲ್ಲಿ 3ನೇ ಅಪರ ಸತ್ರ ನ್ಯಾಯಾಧೀಶ ಶಿವಕುಮಾರ್​, ಹಿರಿಯ ಶ್ರೇಣಿ ನ್ಯಾಯಾಧೀಶ ಮುಜಫರ್​ ಎ ಮಾಂಜರಿ, ನ್ಯಾಯಾಧೀಶೆ ಜಯಲಕ್ಷಿ$್ಮ, 1ನೇ ಅಪರ ಸಿವಿಲ್​ ನ್ಯಾಯಾಧೀಶ ಮತ್ತು ಜೆಎಂಎಫ್​ಸಿ ವಿನೋದ್​ಕುಮಾರ್​, ನ್ಯಾಯಾಧೀಶೆ ಶಮಿದ ಇದ್ದರು.