ವಿಜಯವಾಣಿ ಸುದ್ದಿಜಾಲ ಧಾರವಾಡ
ಗ್ರಾಹಕ ಖರೀದಿಸಿದ ಮೋಬೈಲ್ ಅನ್ನು ಒಂದು ತಿಂಗಳಲ್ಲಿ ದುರಸ್ತಿ ಮಾಡಿಕೊಡಬೇಕು. ತಪ್ಪಿದಲ್ಲಿ ಹೊಸ ಮೋಬೈಲ್ ನೀಡುವಂತೆ ಜಿಲ್ಲಾ ಗ್ರಾಹಕರ ಆಯೋಗ ಸೋಮವಾರ ಆದೇಶ ನೀಡಿದೆ.
ನಗರದ ಕುಮಾರೇಶ್ವರ ಕಾಲನಿಯ ನಿವೃತ್ತ ಪೊಲೀಸ್ ಅಧೀಕ್ಷಕ ಮಲ್ಲಿಕಾರ್ಜುನ ದಂಡಿನ್ ಅವರು ಟಿಕಾರೆ ರಸ್ತೆಯ ಸಿಟಿ ಮೋಬೈಲ್ಸ್ ಅಂಗಡಿಯಲ್ಲಿ 2023ರ ಫೆ. 17ರಂದು 10 ಸಾವಿರ ರೂ. ಮೌಲ್ಯದ ಸ್ಯಾಮಸಂಗ್ ಗ್ಯಾಲಕ್ಸಿ ಮೋಬೈಲ್ ಖರೀದಿಸಿದ್ದರು. ಕೆಲ ದಿನಗಳಲ್ಲೇ ಸಮಸ್ಯೆ ಕಂಡು ಬಂದು ಬ್ಯಾಟರಿ ಬೇಗನೆ ಇಳಿಮುಖವಾಗುತ್ತಿತ್ತು. ಸಮಸ್ಯೆ ಸರಿಪಡಿಸುವಂತೆ ಹೇಳಿದರೂ ನಿರ್ಲಕ್ಷ ವಹಿಸಿದ್ದರು. ಹೀಗಾಗಿ ಸಿಟಿ ಮೋಬೈಲ್ಸ್ ಹಾಗೂ ಸವಿರ್ಸ್ ಸೆಂಟರ್ನವರು ಸೇವಾ ನ್ಯೂನ್ಯತೆ ಎಸಗಿದ್ದಾರೆ ಎಂದು 2023ರ ಏ. 27ರಂದು ಜಿಲ್ಲಾ ಗ್ರಾಹಕರ ಆಯೋಗಕ್ಕೆ ದೂರು ಸಲ್ಲಿಸಿದ್ದರು.
ದೂರಿನ ವಿಚಾರಣೆ ನಡೆಸಿದ ಆಯೋಗದ ಅಧ್ಯಕ್ಷ ಈಶಪ್ಪ ಭೂತೆ, ಸದಸ್ಯರಾದ ವಿಶಾಲಾ ಬೋಳಶೆಟ್ಟಿ ಮತ್ತು ಪ್ರಭು ಹಿರೇಮಠ, ಮೋಬೈಲ್ನಲ್ಲಿ ಉಂಟಾದ ದೋಷ ಪಡಿಸುವುದು ಅಂಗಡಿಯವರ ಕರ್ತವ್ಯ. ಆದರೆ ಸೇವಾ ನ್ಯೂನ್ಯತೆ ಎಸಗಿರುವುದು ಮೇಲ್ನೋಟಕ್ಕೆ ಕಂಡು ಬಂದಿದೆ. ಹೀಗಾಗಿ ತೀರ್ಪು ನೀಡಿದ 1 ತಿಂಗಳಲ್ಲಿ ಸಿಟಿ ಮೋಬೈಲ್ಸ್ ಹಾಗೂ ಸವಿರ್ಸ್ ಸೆಂಟರ್ ಮತ್ತು ಉತ್ಪಾದಕ ಸ್ಯಾಮ್ ಸಂಗ್ ಕಂಪನಿ ಮೋಬೈಲ್ ದುರಸ್ತಿ ಮಾಡಿಕೊಡಬೇಕು. ತಪ್ಪಿದ್ದಲ್ಲಿ ಹಳೇ ಮೋಬೈಲ್ ಬದಲಿಸಿ ಹೊಸದನ್ನು ನೀಡಬೇಕು. ದೂರುದಾರರಿಗೆ ಆದ ಅನನುಕೂಲ ಮತ್ತು ಮಾನಸಿಕ ಹಿಂಸೆಗೆ 10,000 ರೂ., ಪ್ರಕರಣದ ಖರ್ಚು ವೆಚ್ಚ 5,000 ರೂ.ಗಳನ್ನು ಮಲ್ಲಿಕಾರ್ಜುನ ಅವರಿಗೆ ನೀಡಬೇಕು ಎಂದು ಆಯೋಗ ಆದೇಶಿಸಿದೆ.
