ಕೋವಿಡ್ನ ಮೊದಲನೆಯ ಅಲೆ, ಎರಡನೆಯ ಅಲೆ ತಡೆಯುವುದಕ್ಕಾಗಿ ಜಾರಿಗೊಳಿಸಿದ್ದ ಲಾಕ್ಡೌನ್ ಕಾರಣ ಉದ್ಯೋಗ ನಷ್ಟ, ಆದಾಯ ನಷ್ಟ, ಉತ್ಪಾದನೆ ನಷ್ಟ ಸೇರಿ ಅರ್ಥವ್ಯವಸ್ಥೆಯ ಮೇಲೆ ಕೆಟ್ಟ ಪರಿಣಾಮವಾಗಿದೆ. ಬಹುತೇಕ ಎಲ್ಲ ರಾಷ್ಟ್ರಗಳೂ ವಿತ್ತೀಯ ಕೊರತೆ ಎದುರಿಸುತ್ತಿವೆ. ಆದಾಗ್ಯೂ, ಭಾರತದಲ್ಲಿ ಕರೊನಾದ ಎರಡು ಅಲೆಗಳ ಬಳಿಕವೂ ಅರ್ಥವ್ಯವಸ್ಥೆ ಚೇತರಿಕೆಯ ಲಕ್ಷಣಗಳನ್ನು ತೋರುತ್ತಿರುವುದು ಆಶಾದಾಯಕ ಬೆಳವಣಿಗೆ. ಇದೇ ವೇಳೆ, ಅರ್ಥವ್ಯವಸ್ಥೆಯ ಪುನಶ್ಚೇತನಕ್ಕಾಗಿ ಮನಿ ಪ್ರಿಂಟಿಂಗ್, ಡೆಟ್ ಮಾನೆಟೈಸೇಶನ್, ಡೈರೆಕ್ಟ್ ಮಾನೆಟೈಸೇಶನ್ ಮುಂತಾದ ವಿಚಾರಗಳು ಚರ್ಚೆಯಲ್ಲಿವೆ. ಅರ್ಥವ್ಯವಸ್ಥೆ ಪುನಶ್ಚೇತನಕ್ಕೆ ಇವುಗಳು ಸುಲಭ ಪರಿಹಾರ ಒದಗಿಸಬಲ್ಲವು ಎಂಬ ವಾದ ಇರುವಂತೆಯೇ, ಇದು ಕೊನೆಯ ಆಯ್ಕೆಯಾಗಬೇಕೆಂಬ ಎಚ್ಚರಿಕೆಯನ್ನೂ ತಜ್ಞರು ಕೊಡುತ್ತಿದ್ದಾರೆ. ಕೋವಿಡ್ ಸಂಕಷ್ಟದ ಕಾರಣ ಕುಸಿದ ಅರ್ಥವ್ಯವಸ್ಥೆಗೆ ಪುನಶ್ಚೇತನ ಒದಗಿಸುವುದಕ್ಕಾಗಿ ಜಗತ್ತಿನಾದ್ಯಂತ ಎಲ್ಲ ಸರ್ಕಾರಗಳು ತಮ್ಮದೇ ಆದ ರೀತಿಯಲ್ಲಿ ಪ್ರಯತ್ನ ನಡೆಸಿವೆ. ವಿವಿಧ ಕ್ಷೇತ್ರಗಳ ಸುಧಾರಣೆಗಾಗಿ ವಿಭಿನ್ನ ರೀತಿಯ ಆರ್ಥಿಕ ಪ್ಯಾಕೇಜ್ಗಳನ್ನು ಘೋಷಿಸಿವೆ. ತೆರಿಗೆ ರಜೆ, ತೆರಿಗೆ ವಿನಾಯಿತಿ, ಸಬ್ಸಿಡಿ ಮತ್ತು ಇತರ ಪರಿಹಾರ ಉಪ್ರಕಮಗಳನ್ನೂ ಜಾರಿಗೊಳಿಸಿವೆ. ಸರಳವಾಗಿ ಹೇಳಬೇಕು ಎಂದರೆ ಸರ್ಕಾರಗಳು ಎರಡು ಮೂಲತತ್ತ್ವಗಳ ವಿಧಾನದ ಮೂಲಕ ಅಂದರೆ ಸಾಲ ಪಡೆಯುವುದು ಅಥವಾ ತೆರಿಗೆ ಹೆಚ್ಚಿಸುವುದರ ಮೂಲಕ ಅವುಗಳ ವಿತ್ತೀಯ ಕೊರತೆ ಸರಿದೂಗಿಸಲು ಪ್ರಯತ್ನಿಸಿವೆ. ಇವಕ್ಕೆ ಹೊರತಾಗಿ ಸರ್ಕಾರಗಳ ಎದುರು 3ನೇ ಆಯ್ಕೆಯೊಂದು ಲಭ್ಯವಿದ್ದು, ಆಯಾ ರಾಷ್ಟ್ರಗಳ ಅರ್ಥವ್ಯವಸ್ಥೆಗೆ ಅನುಗುಣವಾಗಿ ಇದನ್ನು ಮನಿ ಪ್ರಿಂಟಿಂಗ್, ಡೆಟ್ ಮಾನೆಟೈಸೇಶನ್, ಡೈರೆಕ್ಟ್ ಮಾನೆಟೈಸೇಶನ್ ಎನ್ನುತ್ತಾರೆ.
