ಹುಟ್ಟಿ ಒಂದು ವರ್ಷವಾದರೂ ಈ ರೋಗವಿನ್ನೂ ಹೊಸತೇ! ಹೊಸ ರೋಗ ಎಂದ ಮೇಲೆ ಅದರ ಬಗ್ಗೆ ತದ್ವಿರುದ್ಧ ಸಂಶೋಧನಾ ವರದಿಗಳು, ವಿರೋಧಾಭಾಸದ ಹೇಳಿಕೆಗಳು, ವಿಪರೀತ ಅರ್ಥದ ಸುದ್ದಿಗಳು ಎಲ್ಲ ರೆಕ್ಕೆಪುಕ್ಕ ಪಡೆದು ಮೊದಲೇ ಕಂಗೆಟ್ಟಿರುವ ಜನರ ಮನಸ್ಸನ್ನು ಮತ್ತಷ್ಟು ಕಾಡಲಾರಂಭಿಸುತ್ತವೆ. ಸಾಮಾನ್ಯವಾಗಿ ವೈರಾಣು ರೋಗಗಳು ಒಮ್ಮೆ ಒಬ್ಬ ವ್ಯಕ್ತಿಗೆ ಬಂತೆಂದರೆ ಮತ್ತೆ ಕಾಣಿಸಿಕೊಳ್ಳುವುದು ತೀರ ಅಪರೂಪ. ಅದು ಚಿಕನ್ಪಾಕ್ಸ್ ಇರಲಿ, ಚಿಕುನ್ಗುನ್ಯಾವೇ ಇರಲಿ. ಒಮ್ಮೆ ದೇಹವು ಚೇತರಿಸಿಕೊಂಡರೆ ವೈರಾಣುವು ಮತ್ತೆ ಮೇಲೇಳಲು ನಮ್ಮ ಶರೀರವು ಆಸ್ಪದ ನೀಡುವುದಿಲ್ಲ. ಹಾಗೆಂದು ಚಿಕನ್ಪಾಕ್ಸ್ ಥರದ ಕಾಯಿಲೆಗಳು ಎರಡು ಮೂರು ಬಾರಿ ಕಾಣಿಸಿಕೊಂಡವರೂ ವಿರಳವಾಗಿ ಕಾಣಸಿಗುತ್ತಾರೆ. ಕರೊನಾದಿಂದ ಒಮ್ಮೆ ಬಾಧಿತರಾದವರಿಗೆ ಮತ್ತೆ ಕಾಣಿಸಿಕೊಂಡಿರುವುದು ಅಪರೂಪದಲ್ಲಿ ಅಪರೂಪದ ವಿದ್ಯಮಾನವಾಗಿದೆ. ಸುದೀರ್ಘಕಾಲ ಈ ವ್ಯಾಧಿಗೆ ಸಂಬಂಧಿತ ವ್ಯಾಧಿಕ್ಷಮತ್ವ ಉಳಿಯಲಿದೆ ಎಂದು ಈಗ ನಡೆಯುತ್ತಿರುವ ಸಂಶೋಧನೆಗಳು ಬೆಟ್ಟುಮಾಡುತ್ತಿರುವುದು ಆಶಾದಾಯಕ ಸಂಗತಿ.
