ಹಬ್ಬದಲ್ಲಿಯೇ ಸಿನಿಮಾ ಅಪ್‌ಡೇಟ್
ಕಳೆದ ಗಣೇಶ ಚತುರ್ಥಿಗೆ ಊರಲ್ಲಿ ಇರದ ಕಾರಣ ಹಬ್ಬ ಆಚರಿಸಲು ಆಗಿರಲಿಲ್ಲ. ಈಗ ದೀಪಾವಳಿಗೆ ಮನೆಯಲ್ಲಿದ್ದೇನೆ. ಸರಳವಾಗಿ ಹಬ್ಬ ಆಚರಿಸುತ್ತೇವೆ. ಬೆಳಗ್ಗೆ ಪೂಜೆ ಮಾಡಿ, ಹೊಸ ಬಟ್ಟೆ ಧರಿಸಿ, ಸಿಹಿ ಖಾದ್ಯ ಸವಿಯುತ್ತೇವೆ. ಹಬ್ಬದಲ್ಲಿ ಇಡೀ ಮನೆಯ ಅಲಂಕಾರದ ಜವಾಬ್ದಾರಿ ನನ್ನದು. ಮನೆ ತುಂಬಾ ಹಣತೆ ಹಚ್ಚಿ, ದೀಪ ಬೆಳಗುತ್ತೇವೆ. ಕಾರ್ತಿಕ ಮಾಸದಲ್ಲಿಯೇ ನಾನು ಜನಿಸಿದ್ದು, ಹಾಗಾಗಿ, ದೀಪಾವಳಿ ಆಸು-ಪಾಸು ನನ್ನ ಹುಟ್ಟುಹಬ್ಬ ಬರುತ್ತದೆ. ಇತ್ತೀಚೆಗಷ್ಟೇ ಬರ್ತ್‌ಡೇ ಆಚರಿಸಿಕೊಂಡೆ. ಇದೀಗ ಹಬ್ಬದ ಸಂಭ್ರಮದಲ್ಲಿ ಹೊಸ ವಾಚ್ ಖರೀದಿಸಿದ್ದೇನೆ. ಜೀವನದಲ್ಲಿಯೂ ನನ್ನ ಸಮಯ ಬದಲಾಗಿದೆ. ತುಂಬಾ ವರ್ಷಗಳ ಬಳಿಕ ‘ಹಲ್ಕಾ ಡಾನ್’ ಮೂಲಕ ಸ್ಯಾಂಡಲ್‌ವುಡ್‌ಗೆ ಮರಳಿದ್ದೇನೆ. ಗುರುವಾರ ಚಿತ್ರದ ಟೀಸರ್ ರಿಲೀಸ್ ಆಗುತ್ತಿದೆ. ಹೀಗಾಗಿ, ಈ ದೀಪಾವಳಿ ನನಗೆ ಡಬಲ್ ಸಂಭ್ರಮ ನೀಡುತ್ತಿದೆ. ದೀಪಾವಳಿ ಎಂದರೆ ಬೆಳಕಿನ ಹಬ್ಬ. ಮನೆ ತುಂಬಾ ಹಣತೆ ಹಚ್ಚಿ, ಎಚ್ಚರಿಕೆಯಿಂದ ಪಟಾಕಿ ಹೊಡೆದು ಸಂಭ್ರಮಿಸುತ್ತೇವೆ, ‘ಹಲ್ಕಾ ಡಾನ್’ ಸಿನಿಮಾ ಯಶಸ್ವಿಯಾಗಲಿ ಹಾಗೂ ಹೊಸಬರ ಚಿತ್ರಗಳು ಗೆಲ್ಲಲಿ ಎಂಬುದೇ ದೇವರಲ್ಲಿ ನನ್ನ ಪ್ರಾರ್ಥನೆ.
ಚೈತ್ರಾ ಹಳ್ಳಿಕೇರಿ, ನಟಿ
