ತಾವೂ ಅಮೆರಿಕಕ್ಕೆ ವಲಸೆ ಹೋಗಬೇಕೆಂಬ ಬಯಕೆ ವೈಶಾಲಿಗೆ ಅಂದೇ ಚಿಗುರಿ ದಿನಕಳೆದಂತೆಲ್ಲಾ ಮರವಾಗುತ್ತಾ ಬೆಳೆಯಿತು. ತನ್ನ ಗಂಡನನ್ನು ಆಕೆ ಈ ಬಗ್ಗೆ ಎಡಬಿಡದೆ ಕಾಡತೊಡಗಿದಳು. ಅವಳ ಕಾಟಕ್ಕೆ ಮಣಿದ ಜಗದೀಶ್, ಅಮೆರಿಕಕ್ಕೆ ವಲಸೆ ಹೋಗುವುದು ಹೇಗೆಂದು ತಿಳಿಯಲು ರಾಜಧಾನಿಯಲ್ಲಿದ್ದ ಟ್ರಾವೆಲ್ ಏಜೆಂಟ್ ಒಬ್ಬನ ಬಳಿಗೆ ಹೋದ. ಆತ ಅಲ್ಲಿಗೆ ವಲಸೆ ಹೋಗುವುದು ಬಹಳ ಕಷ್ಟ. ಪ್ರವಾಸಿ ವೀಸಾ ಸಿಗಬೇಕಾದರೆ ಹಲವಾರು ವರ್ಷ ಕಾಯಬೇಕಾದ ಪರಿಸ್ಥಿತಿಯಿದೆ. ಬೇಕೆಂದರೆ ಯಾವುದಾದರೂ ಕೊಲ್ಲಿ ರಾಷ್ಟ್ರಕ್ಕೆ ವಲಸೆ ಹೋಗಲು ಅನುಕೂಲ ಮಾಡಿಕೊಡುವೆ ಎಂದ. ಊರಿಗೆ ವಾಪಸ್ ಆದ ಜಗದೀಶ್ ವೈಶಾಲಿಗೆ ಅಮೆರಿಕದ ಕನಸನ್ನು ತೊರೆಯಲು ಹೇಳಿದ. ಆದರೆ ಆಕೆ ಕೇಳಬೇಕಲ್ಲ? ನಮ್ಮ ಪಟ್ಟಣದಿಂದಲೇ ಸುಮಾರು 15 ಕುಟುಂಬಗಳು ಅಮೆರಿಕ, ಕೆನಡಾಗಳಿಗೆ ವಲಸೆ ಹೋಗಿವೆ, ಅವರನ್ನು ವಿಚಾರಿಸಿ ಬರುವೆ ಎಂದು ಅಂತಹವರೊಬ್ಬರ ಮನೆಗೆ ಹೋದಳು. ಇಮಿಗ್ರೆಂಟ್ ವೀಸಾ ಪಡೆದು ಅಲ್ಲಿಗೆ ಹೋಗುವುದು ಅಸಾಧ್ಯವೇ. ಆದರೆ ನನಗೆ ತಿಳಿದಿರುವ ಒಂದು ಕುಟುಂಬ ಆರು ತಿಂಗಳ ಹಿಂದೆ ಏಜೆಂಟರ ಮೂಲಕ ಅಮೆರಿಕಗೆ ಅಕ್ರಮವಾಗಿ ವಲಸೆ ಹೋಗಿ ಅಲ್ಲಿ ಆರಾಮಾಗಿ ಜೀವನ ಸಾಗಿಸುತ್ತಿದೆ. ನಾನು ಅವರಿಂದ ಮಾಹಿತಿಯನ್ನು ಪಡೆದು ನಿನಗೆ ತಿಳಿಸುವೆ ಎಂದು ಹೇಳಿ ಕೆಲವು ದಿನಗಳ ನಂತರ ಏಜೆಂಟ್ ಒಬ್ಬನ ವಿಳಾಸವನ್ನು ಕೊಟ್ಟಳು.
