ನೈಋತ್ಯ ಪದವೀಧರ, ಶಿಕ್ಷಕರ ಕ್ಷೇತ್ರ ಚುನಾವಣೆಗೆ ಸಿದ್ಧತೆ

ಜಿಲ್ಲಾಧಿಕಾರಿ ವಿದ್ಯಾಕುಮಾರಿ ಮಾಹಿತಿ | ಜೂ.3ರಂದು ಸಾಂದರ್ಭಿಕ ರಜೆ ಘೋಷಣೆ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಕರ್ನಾಟಕ ವಿಧಾನ ಪರಿಷತ್​ನ ನೈಋತ್ಯ ಪದವೀಧರ/ಶಿಕ್ಷಕರ ಕ್ಷೇತ್ರಕ್ಕೆ ಜೂ.3ರಂದು ಬೆಳಗ್ಗೆ 8 ಗಂಟೆಯಿಂದ ಸಂಜೆ 4ರ ವರೆಗೆ ಮತದಾನ ನಡೆಯಲಿದೆ. ಮಾನ್ಯತೆ ಪಡೆದ ರಾಜಕೀಯ ಪಕ್ಷದ ಅಭ್ಯರ್ಥಿಗಳಿಗೆ ಚುನಾವಣಾಧಿಕಾರಿ ಕಚೇರಿಯಿಂದಲೇ ಮತದಾರರ ಪಟ್ಟಿ ನೀಡಲಾಗಿದೆ ಎಂದು ಜಿಲ್ಲಾಧಿಕಾರಿ ಡಾ.ಕೆ.ವಿದ್ಯಾಕುಮಾರಿ ಮಾಹಿತಿ ನೀಡಿದರು.

ಉಡುಪಿಯ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಈ ಚುನಾವಣೆಗೆ ಸಂಬಂಧಿಸಿದ ಭಾವಚಿತ್ರ ರಹಿತ ಮತದಾರರ ಪಟ್ಟಿಯನ್ನು ಜಿಲ್ಲೆಯ ವೆಬ್​ಸೈಟ್​ https://Udupi.nic.in ನಲ್ಲಿ ಪ್ರಕಟಿಸಲಾಗಿದೆ ಎಂದು ತಿಳಿಸಿದರು.

ಒಟ್ಟು ಮತದಾರರ ಮಾಹಿತಿ

ಪದವೀಧರ ಕ್ಷೇತ್ರದಲ್ಲಿ 7,857 ಪುರುಷ, 9,176 ಮಹಿಳಾ ಮತದಾರರು ಸೇರಿ ಒಟ್ಟು 17,033 ಮತದಾರರಿದ್ದಾರೆ. ಶಿಕ್ಷಕರ ಕ್ಷೇತ್ರದಲ್ಲಿ 1,717 ಪುರುಷ, 2,350 ಮಹಿಳಾ ಮತದಾರರು ಸೇರಿ ಒಟ್ಟು 4,067 ಮತದಾರರಿದ್ದಾರೆ ಎಂದರು.

ವಿಶೇಷ ಸಾಂದರ್ಭಿಕ ರಜೆ

ಸರ್ಕಾರಿ ಹಾಗೂ ಶಾಲಾ-ಕಾಲೇಜುಗಳು, ಅನುದಾನಿತ ಹಾಗೂ ಅನುದಾನ ರಹಿತ ವಿದ್ಯಾ ಸಂಸ್ಥೆಗಳು, ಎಲ್ಲ ಶೈಕ್ಷಣಿಕ ಸಂಸ್ಥೆಗಳು, ರಾಜ್ಯ ಹಾಗೂ ಕೇಂದ್ರ ಸರ್ಕಾರದ ಕಚೇರಿ, ಕಾರ್ಖಾನೆ, ಕೈಗಾರಿಕಾ ಸಂಸ್ಥೆ, ರಾಷ್ಟ್ರೀಕೃತ ಬ್ಯಾಂಕ್​ಗಳು, ಔದ್ಯಮಿಕ ಹಾಗೂ ಇತರ ಸಂಸ್ಥೆಗಳಲ್ಲಿ ಕಾಯಂ ಆಗಿ ಅಥವಾ ದಿನಗೂಲಿ ಆಧಾರದ ಮೇಲೆ ಕೆಲಸ ಮಾಡುವ ಪದವೀಧರರು/ಶಿಕ್ಷಕರುಗಳಿಗೆ ಮತದಾನ ಮಾಡಲು ಸರ್ಕಾರ ಜೂ.3ರಂದು ವಿಶೇಷ ಸಾಂದರ್ಭಿಕ ರಜೆ ಘೋಷಿಸಿದೆ ಎಂದು ತಿಳಿಸಿದರು.

ಮತಗಟ್ಟೆ ಮಾಹಿತಿ

ಪದವೀಧರ/ನೈಋತ್ಯ ಕ್ಷೇತ್ರದ ಚುನಾವಣೆಯ ಮತದಾನಕ್ಕಾಗಿ ಬೈಂದೂರು, ಕುಂದಾಪುರ, ಬ್ರಹ್ಮಾವರ, ಉಡುಪಿ, ಕಾಪು, ಕಾರ್ಕಳ ಹಾಗೂ ಹೆಬ್ರಿ ಸೇರಿ ಒಟ್ಟು 7 ತಾಲೂಕುಗಳಲ್ಲಿ ಮತ ಕೇಂದ್ರ ತೆರೆಯಾಲಾಗುತ್ತಿದೆ. ಪದವೀಧರ ಕ್ಷೇತ್ರಕ್ಕೆ ಸಂಬಂಧಿಸಿ 19 ಮತಗಟ್ಟೆ ಹಾಗೂ ಶಿಕ್ಷಕರ ಕ್ಷೇತ್ರಕ್ಕೆ ಒಟ್ಟು 10 ಮತಗಟ್ಟೆ ತೆರೆಯಲಾಗುತ್ತಿದೆ. ಈ ಎರಡೂ ಕ್ಷೇತ್ರಕ್ಕೆ ಮತದಾರರ ಪಟ್ಟಿಯಲ್ಲಿ ಹೆಸರು ದಾಖಲಿಸಿರುವ ಬಗ್ಗೆ ತಾಲೂಕು ಕಚೇರಿಯಲ್ಲಿ ಪರಿಶೀಲಿಸಬಹುದು ಎಂದರು.

ಮತದಾನಕ್ಕೆ ಬೇಕಿರುವ ದಾಖಲಾತಿ

ಮತದಾರರನ್ನು ಗುರುತಿಸಲು ಅವರ ಭಾವಚಿತ್ರವುಳ್ಳ ಚೀಟಿ (ಎಪಿಕ್​)ಯನ್ನು ಮುಖ್ಯ ದಾಖಲಾತಿಯಾಗಿ ತೋರಿಸಬೇಕಿದೆ. ಮತದಾರರ ಪಟ್ಟಿಯಲ್ಲಿ ಹೆಸರಿದ್ದೂ ಎಪಿಕ್​ ಕಾರ್ಡ್​ ಹೊಂದಿಲ್ಲದಿದ್ದಲ್ಲಿ ಅಂತಹವರು ಭಾವಚಿತ್ರವುಳ್ಳ ಆಧಾರ್​ ಕಾರ್ಡ್​, ಡ್ರೈವಿಂಗ್​ ಲೈಸೆನ್ಸ್​, ಪಾನ್​ ಕಾರ್ಡ್​, ಇಂಡಿಯನ್​ ಪಾಸ್​ಪೋರ್ಟ್​, ರಾಜ್ಯ-ಕೇಂದ್ರ ಸರ್ಕಾರಿ ನೌಕರರಾಗಿದ್ದಲ್ಲಿ ಸೇವೆಯ ಗುರುತಿನ ಕಾರ್ಡ್​, ಶಿಕ್ಷಣ ಸಂಸ್ಥೆಯ ಮಾನ್ಯತೆ ಕಾರ್ಡ್​, ಪದವಿ/ಡಿಪ್ಲೊಮಾ ಪ್ರಮಾಣಪತ್ರ, ಅಂಗವೈಕಲ್ಯ ಪತ್ರ, ಯುಡಿಐಡಿ ಕಾರ್ಡ್​ಗಳನ್ನೂ ಸಹ ಮತದಾನಕ್ಕೆ ಬರುವಾಗ ತರಬಹುದು ಎಂದರು.

ಎರಡೂ ಕ್ಷೇತ್ರದ ಮತಗಟ್ಟೆ ಮಾಹಿತಿ

• ಬೈಂದೂರು: ತಾಲೂಕಿನ ಬೈಂದೂರಿನಲ್ಲಿ ಸರ್ಕಾರಿ ಪದವಿ ಪೂರ್ವ ಕಾಲೇಜು, ಬೈಂದೂರು.
• ಕುಂದಾಪುರ: ತಾಲೂಕಿನ ಶಂಕರನಾರಾಯಣದಲ್ಲಿ ಸರ್ಕಾರಿ ಪಪೂ ಕಾಲೇಜು, ಶಂಕರನಾರಾಯಣ (ಪಶ್ಚಿಮ ಭಾಗ). ಕುಂದಾಪುರದಲ್ಲಿ ಸರ್ಕಾರಿ ಪಪೂ ಕಾಲೇಜು, ಕುಂದಾಪುರ (ದಣ ಭಾಗ)
• ಬ್ರಹ್ಮಾವರ: ತಾಲೂಕಿನ ಸರ್ಕಾರಿ ಪಪೂ ಕಾಲೇಜು, ಬ್ರಹ್ಮಾವರ (ಪಶ್ಚಿಮ ಭಾಗ)
• ಉಡುಪಿ: ತಾಲೂಕಿನ ಮಣಿಪಾಲ್​ ಜ್ಯೂನಿಯರ್​ ಕಾಲೇಜ್​, ಮಣಿಪಾಲ (ಎಂಜೆಸಿ) (ಪಶ್ಚಿಮ ಭಾಗ). ಉಡುಪಿಯಲ್ಲಿ ಸರ್ಕಾರಿ ಪಪೂ ಕಾಲೇಜ್​ ಬೋರ್ಡ್​ ಹೈಸ್ಕೂಲ್​, ಉಡುಪಿ.
• ಕಾಪು: ತಾಲೂಕಿನ ಕಾಪುವಿನಲ್ಲಿ ಸರ್ಕಾರಿ ಮಾದರಿ ಹಿ.ಪ್ರಾ.ಶಾಲೆ, ಕಾಪು, ಕೊಠಡಿ ಸಂಖ್ಯೆ&2.
• ಕಾರ್ಕಳ: ತಾಲೂಕಿನ ಕಾರ್ಕಳದಲ್ಲಿ ಸರ್ಕಾರಿ ಹಿ.ಪ್ರಾ. ಶಾಲೆ, ಅಜೆಕಾರು (ಪೂರ್ವಭಾಗ), ಸರ್ಕಾರಿ ಪಪೂ ಕಾಲೇಜು, ಕಾರ್ಕಲ (ದಣ ಭಾಗ)
• ಹೆಬ್ರಿ: ತಾಲೂಕಿನ ಹೆಬ್ರಿಯಲ್ಲಿ ತಾಲೂಕು ಆಡಳಿತ ಸೌಧ, ಹೆಬ್ರಿ.

ಪದವೀಧರ ಕ್ಷೇತ್ರದ ಮತದಾರರ ಮಾಹಿತಿ

ಕ್ಷೇತ್ರ ಪುರುಷ ಮಹಿಳೆ ಒಟ್ಟು
ಬೈಂದೂರು 419 316 735
ಕುಂದಾಪುರ 1,132 1,028 2,160
ಬ್ರಹ್ಮಾವರ 2,705 3,179 3,146
ಉಡುಪಿ 1,795 2,348 4,143
ಕಾಪು 634 950 1,584
ಕಾರ್ಕಳ 755 961 1,716
ಹೆಬ್ರಿ 236 192 428
ಒಟ್ಟು 7,857 9,176 17,033

ಶಿಕ್ಷಕರ ಕ್ಷೇತ್ರದ ಮತದಾರರ ಮಾಹಿತಿ

ಕ್ಷೇತ್ರ ಪುರುಷ ಮಹಿಳೆ ಒಟ್ಟು
ಬೈಂದೂರು 143 93 236
ಕುಂದಾಪುರ 368 446 814
ಬ್ರಹ್ಮಾವರ 322 417 739
ಉಡುಪಿ 433 745 1,178
ಕಾಪು 90 190 280
ಕಾರ್ಕಳ 285 392 677
ಹೆಬ್ರಿ 76 67 143
ಒಟ್ಟು 1,717 2,350 4,067