ಬೆಂಗಳೂರು: ಕರೊನಾ ಮಟ್ಟಹಾಕಲು ದೇಶಾದ್ಯಂತ ಜಾರಿಗೊಳಿಸಲಾಗಿರುವ ಲಾಕ್ಡೌನ್ ಲಕ್ಷಾಂತರ ಜನರ ನಿತ್ಯದ ಅನ್ನಕ್ಕೂ ಕುತ್ತು ತಂದಿದೆ. ದಿನದ ದುಡಿಮೆಯನ್ನೇ ನಂಬಿದವರು, ಹೋಟೆಲ್, ಬೇಕರಿ, ದಾನಿಗಳು ಕೊಟ್ಟಿದ್ದನ್ನು ಉಣ್ಣುತ್ತಿದ್ದವರ ಗೋಳು ಹೇಳತೀರದಾಗಿದೆ. ಇಂತಹವರಿಗೆ ಅನ್ನ ನೀಡುವ ಮೂಲಕ ರಾಜ್ಯದ ಎಲ್ಲ ಕಡೆಗಳಲ್ಲಿನ ವಿವಿಧ ಸಾಮಾಜಿಕ ಸಂಘಟನೆಗಳು ಮಾನವೀಯತೆ ತೋರ್ಪಡಿಸುತ್ತಿವೆ. ಲಾಕ್ಡೌನ್ ಪರಿಣಾಮ ರಾಜ್ಯಾದ್ಯಂತ ಹೋಟೆಲ್, ಕ್ಯಾಂಟೀನ್, ರೆಸ್ಟೋರೆಂಟ್, ಗೂಡಂಗಡಿಗಳು ಬಾಗಿಲು ಮುಚ್ಚಿರುವ ಪರಿಣಾಮ ಸಾವಿರಾರು ನಿರ್ಗತಿಕರು ಆಹಾರಕ್ಕಾಗಿ ಪರದಾಡುತ್ತಿದ್ದಾರೆ. ಇಂತಹ ಹಲವರಿಗೆ ತಾವು ತಿನ್ನುವುದರಲ್ಲೇ ಹಂಚಿಕೊಡುವವರೂ ನಮ್ಮ ಮಧ್ಯೆಯೇ ಇದ್ದಾರೆ. ಇವರ ಜತೆಗೆ ಹಲವು ಸಂಘಟನೆಗಳು ಸಹ ಆಹಾರ ನೀಡುವ ಕಾರ್ಯವನ್ನು ಆರಂಭಿಸಿವೆ. ಶಾಲಾಮಕ್ಕಳಿಗೆ ಮಧ್ಯಾಹ್ನದ ಬಿಸಿಯೂಟ ನೀಡುತ್ತಿರುವ ಅದಮ್ಯ ಚೇತನ, ಅಕ್ಷಯ ಪಾತ್ರಾ ಮತ್ತು ನಮ್ಮ ಬೆಂಗಳೂರು ಫೌಂಡೇಷನ್(ಎನ್ಬಿಎಫ್), ರಾಷ್ಟ್ರೀಯ ಸ್ವಯಂಸೇವಕ ಸಂಘ(ಆರ್ಎಸ್ಎಸ್) ನೇರವಾಗಿ ಕಾರ್ವಿುಕರು ಇರುವ ಸ್ಥಳಗಳಿಗೇ ಹೋಗಿ ಆಹಾರ ನೀಡಿ ಹಸಿದವರ ಹೊಟ್ಟೆ ತುಂಬಿಸುತ್ತಿವೆ. .
