ಧಾರ್ಮಿಕ ಸಹಬಾಳ್ವೆಯ ಗ್ರಾಮ: ದರಸಗುಪ್ಪೆ ಗ್ರಾಮದಲ್ಲಿ ಒಕ್ಕಲಿಗ ಸಮುದಾಯದ ಜನರು ಪ್ರಧಾನವಾಗಿ ನೆಲೆಸಿದ್ದಾರೆ. ಇವರೊಂದಿಗೆ ಕುಂಬಾರ, ಮಡಿವಾಳ, ವಿಶ್ವಕರ್ಮ, ಆದಿಕರ್ನಾಟಕ, ನಾಯಕ ಸಮುದಾಯ ಸೇರಿದಂತೆ ಮುಸ್ಲಿಂ ಕುಟುಂಬಗಳು ಕೂಡ ಪರಸ್ಪರ ನೆರವಾಗಿ ಧಾರ್ಮಿಕ ಹಾಗೂ ಸ್ನೇಹದೊಂದಿಗೆ ಭಾವೈಕ್ಯತೆಯ ಸಂತಸದ ಜೀವನ ಕಂಡುಕೊಂಡಿದ್ದಾರೆ. ಗ್ರಾಮದಲ್ಲಿ ಬಹುತೇಕ ರೈತಾಪಿ ಕುಟುಂಬಗಳೇ ನೆಲೆಸಿದ್ದು, ಇಲ್ಲಿ ಕೃಷಿಯೇ ಪ್ರಧಾನವಾಗಿದೆ. ಚಿಕ್ಕದೇವರಾಯ ಸಾಗರ(ಸಿಡಿಎಸ್) ನಾಲೆ ಹಾಗೂ ಕೊಳವೆ ಬಾವಿಗಳಿಂದ ಹೆಚ್ಚು ನೀರಾವರಿ ಪ್ರದೇಶವಾಗಿರುವ ಕಾರಣ ಇಲ್ಲಿ ಭಾಗಶಃ ಕಬ್ಬು, ಭತ್ತ ಹಾಗೂ ತೆಂಗು ಬೆಳೆಗಳನ್ನು ಎಲ್ಲೆಡೆ ಕಾಣಬಹುದಾಗಿದೆ. ಗ್ರಾಮದ ಗಡಿಗೆ ಕೂಗಳತೆ ದೂರದಲ್ಲಿ ಪಾಂಡವಪುರ ಸಕ್ಕರೆ ಕಾರ್ಖಾನೆ ಇದ್ದು, ಇದರಿಂದ ಹಲವರು ಕೃಷಿ ಹಾಗೂ ಶೈಕ್ಷಣಿಕ ಆಧಾರಿತ ಕೆಲಸ ಕಂಡುಕೊಂಡಿದ್ದಾರೆ.
