ಒಣಮರಗಳಿಂದ ಅಪಾಯ! ತಾಲೂಕಿನಾದ್ಯಂತ ಹೆಚ್ಚಿರುವ ವೃಕ್ಷಗಳು; ಶೀಘ್ರ ತೆರವಿಗೆ ಜನರ ಒತ್ತಾಯ

ವಿಜಯವಾಣಿ ಸುದ್ದಿಜಾಲ ಹೆಬ್ರಿ

ಹೆಬ್ರಿ ತಾಲೂಕಾದ್ಯಂತ ರಸ್ತೆ ಬದಿಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಒಣ ಮರಗಳಿದ್ದು, ಉರುಳುವ ಸಂಭವವಿದೆ. ಈ ಕುರಿತು ಇಲಾಖೆಗೆ ಸಾರ್ವಜನಿಕರು ಮಾಹಿತಿ ನೀಡಿದ್ದು, ಸುರಕ್ಷತೆ ದೃಷ್ಟಿಯಿಂದ ಒಣಮರಗಳನ್ನು ತೆರವುಗೊಳಿಸಲು ಒತ್ತಾಯಿಸಿದ್ದಾರೆ.

ವರಂಗದಿಂದ ಅಮೃತಭಾರತಿ ತನಕ, ರಾಷ್ಟ್ರೀಯ ಹೆದ್ದಾರಿ 169ಎ, ಹೆಬ್ರಿಯಿಂದ ಆಲ್ಬಾಡಿ ತನಕ ಬೃಹತ್ ಗಾತ್ರದ ಮರಗಳು ಒಣಗಿ ಸತ್ತುಹೋಗಿವೆ. ಕಳೆದ ಕೆಲವು ದಿನಗಳಿಂದ ಈ ಭಾಗದಲ್ಲಿ ಭಾರಿ ಮಳೆಯಾಗುತ್ತಿದ್ದು, ಮುಂಜಾಗ್ರತಾ ಕ್ರಮವಾಗಿ ಸಂಬಂಧಿತ ಇಲಾಖೆ ಶೀಘ್ರವೇ ಒಣಮರಗಳನ್ನು ತೆರವುಗೊಳಿಸಬೇಕಿದೆ.

ವರಂಗದಿಂದ ಹೆಬ್ರಿ ತನಕವೂ ಅತಿ ಹೆಚ್ಚು ಸಂಖ್ಯೆಗಳಲ್ಲಿ ಸತ್ತು ಹೋದ ಮರಗಳು ಇವೆ. ಈ ಪೈಕಿ ಬಹುತೇಕ ಮರಗಳು ರಸ್ತೆಯ 5 ಮೀ. ವ್ಯಾಪ್ತಿಯಲ್ಲಿವೆ. ಅಲ್ಲದೇ ಮರಗಳ ಬುಡಗಳು ಸತತ ಮಳೆ ಸುರಿಯುವಿಕೆಯಿಂದ ಮೃದುವಾಗಿವೆ. ಈ ರಸ್ತೆಯಲ್ಲಿ ನಿರಂತರ ವಾಹನಗಳ ಸಂಚಾರ, ಜನಸಂದಣಿ ಇದ್ದು ಸುರಕ್ಷತೆ ದೃಷ್ಟಿಯಿಂದ ಕ್ರಮವಹಿಸಬೇಕಿದೆ.

ಮುಂಜಾಗ್ರತೆಗಾಗಿ ತೆರವು

ಅರಣ್ಯ ಇಲಾಖೆಯವರು ಮುಂಜಾಗ್ರತಾ ಕ್ರಮವಾಗಿ ಹಲವೆಡೆ ಒಣಗಿ ಸತ್ತುಹೋದ ಮರಗಳನ್ನು ತೆರವುಗೊಳಿಸಿದ್ದಾರೆ. ಮರಗಳನ್ನು ಕಡಿಯಲು ನಿಯಮಗಳಿರುವುದರಿಂದ ತೆರವುಗೊಳಿಸಲು ವಿಳಂಬವಾಗುವ ಸಾಧ್ಯತೆ ಇದೆ.

ಗ್ರಾಮಸಭೆಗಳಲ್ಲಿ ಒತ್ತಾಯ

ಈಗಾಗಲೇ ತಾಲೂಕಿನ ಬಹುತೇಕ ಪಂಚಾಯಿತಿಗಳಲ್ಲಿ ಒಣಗಿದ ಹಾಗೂ ಅಪಾಯಕಾರಿ ಮರಗಳ ತೆರವುಗೊಳಿಸುವ ಕುರಿತು ಚರ್ಚಿಸಲಾಗಿದೆ. ಅಲ್ಲದೇ ಲೋಕಾಯುಕ್ತ ಜನಸಂಪರ್ಕ ಸಭೆಯಲ್ಲಿ ಕೂಡ ಈ ಕುರಿತು ಕ್ರಮ ಜರುಗಿಸಲು ಅಧಿಕಾರಿಗಳು ಸೂಚಿಸಿದ್ದರು. ಇದೀಗ ಅಧಿಕಾರಿಗಳ ಸೂಚನೆಯನ್ನು ಕಡೆಗಣಿಸಲಾಗಿದೆ.

https://www.vijayavani.net/fear-of-landslide-due-to-landslide-in-sanur

https://www.vijayavani.net/gods-grace-through-shraddha-bhakti-puja