ಕೆಲವು ದಿನಗಳಿಂದ ಸತತ ಮಳೆಯಾಗುತ್ತಿದ್ದು, ಹರೇಗೋಡು ಗದ್ದೆಗಳಲ್ಲಿ ನೀರು ನಿಲ್ಲುತ್ತಿದೆ. ಜತೆಗೆ ಹೆಮ್ಮಾಡಿ- ಕೊಲ್ಲೂರು ಮುಖ್ಯ ರಸ್ತೆಯಾಗಿ ಸುಳ್ಸೆ ಮೂಲಕ ಬರುವ ನೀರು ಹರಿದು ನೇರ ಚಕ್ರ ನದಿಗೆ ಸೇರುತ್ತಿದ್ದು, ಆದರೆ ನೀರು ಸೇರಲು ದಾರಿಯಾದ ತೋಡನ್ನೇ ಮುಚ್ಚಲಾಗಿದೆ. 20 ದಿನಗಳಿಂದ ನೀರು ಗದ್ದೆಗಳಿಗೆ ಹರಿಯುತ್ತಿದ್ದು, ನಾಟಿ ಹಾಗೂ ಬಿತ್ತನೆ ಮಾಡಲಾದ ಸಸಿಗಳು ನಾಶವಾಗಿವೆ.
ಸುಳ್ಸೆ ಕ್ರಾಸ್ನಿಂದ ಈ ತೋಡಿಗೆ ನೀರು ಹರಿದು ರಾಜಾಡಿಯಲ್ಲಿ ಚಕ್ರ ನದಿಗೆ ಸೇರುತ್ತಿದ್ದು, ಅನಾದಿ ಕಾಲದಿಂದಲೂ ಈ ತೋಡು ಇದೆ. ಇದರ ಸಮೀಪವೇ ಇರುವ ಭೂಮಿ ಮಾರಾಟದ ಸಂದರ್ಭ ತೋಡು ಸಹಿತ ಭೂಪ್ರದೇಶವನ್ನು ಅಧಿಕಾರಿಗಳೇ ಮಾಪನ ಮಾಡಿದ್ದಾರೆ. ಭೂಮಿ ಖರೀದಿಸಿದವರು ಈ ತೋಡನ್ನು ಮುಚ್ಚಿ ಸಮತಟ್ಟು ಮಾಡಿದ್ದು, ನೀರು ಗದ್ದೆಗೆ ಹರಿಯಲು ಕಾರಣವಾಗಿದೆ. ಜೋರು ಮಳೆ ಸಂದರ್ಭ ಒಂದೆರಡು ಮನೆಗಳಿಗೂ ನೀರು ನುಗ್ಗುತ್ತಿದ್ದು, ಸ್ಥಳೀಯ ಆಡಳಿತಕ್ಕೆ ಮನವಿ ಮಾಡಿದರೂ ಉಪಯೋಗವಿಲ್ಲ ಎಂದು ಮನೆಯವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
