ಇಂದು ಲಖನೌಗೆ ಸಿಎಸ್​ಕೆ ಸವಾಲು; ಸೋಲಿನ ಸಿಕ್ಸರ್​ ತಪ್ಪಿಸುವ ಒತ್ತಡದಲ್ಲಿ ಧೋನಿ ಪಡೆ

ನವದೆಹಲಿ: ಐಪಿಎಲ್​ ಇತಿಹಾಸದಲ್ಲೇ ಮೊದಲ ಬಾರಿಗೆ ಸತತ 5 ಸೋಲು ಅನುಭವಿಸಿ ಅಂಕಪಟ್ಟಿಯಲ್ಲಿ ಕೊನೇ ಸ್ಥಾನಕ್ಕೆ ಕುಸಿದಿರುವ ಚೆನ್ನೈ ಸೂಪರ್​ಕಿಂಗ್ಸ್​ ಮತ್ತು ಕಳೆದ 5 ಪಂದ್ಯಗಳಲ್ಲಿ 4ರಲ್ಲಿ ಗೆದ್ದು ಬೀಗಿರುವ ಲಖನೌ ಸೂಪರ್​ಜೈಂಟ್ಸ್​ ತಂಡಗಳು ಸೋಮವಾರ ಮುಖಾಮುಖಿ ಆಗಲಿವೆ. ಏಕನಾ ಸ್ಟೇಡಿಯಂನಲ್ಲಿ ನಡೆಯಲಿರುವ ಕಾದಾಟದಲ್ಲಿ ಗೆಲುವಿನ ಲಯ ಮುಂದುವರಿಸುವುದು ರಿಷಭ್​ ಪಂತ್​ ಬಳಗದ ಗುರಿಯಾಗಿದ್ದರೆ, ಎಂಎಸ್​ ಧೋನಿ ಪಡೆ ಸೋಲಿನ ಸರಪಳಿ ಮುರಿದು ಪ್ಲೇಆಫ್​​ ಆಸೆ ಜೀವಂತ ಉಳಿಸಿಕೊಳ್ಳುವ ಹಂಬಲದಲ್ಲಿದೆ.

ಋತುರಾಜ್​ ಗಾಯಕ್ವಾಡ್​ ಗಾಯದಿಂದಾಗಿ ಹೊರಬಿದ್ದ ಬಳಿಕ ಧೋನಿ ನಾಯಕತ್ವ ವಹಿಸಿಕೊಂಡಿದ್ದರೂ, ಗೆಲುವಿನ ಹಳಿ ಏರಿಸಲು ಶಕ್ತರಾಗಿಲ್ಲ. ಕಳೆದ ಪಂದ್ಯದಲ್ಲಿ ಕೆಕೆಆರ್​ ವಿರುದ್ಧ ಮತ್ತೆ ಬ್ಯಾಟಿಂಗ್​ ವೈಫಲ್ಯ ಅನುಭವಿಸಿದ್ದ ಸಿಎಸ್​ಕೆ ಕೇವಲ 103 ರನ್​ ಗಳಿಸಿ ಹೀನಾಯವಾಗಿ ಸೋತಿತ್ತು. ಇದೀಗ ಬ್ಯಾಟಿಂಗ್​ ವಿಭಾಗದಿಂದ ಸುಧಾರಿತ ನಿರ್ವಹಣೆ ಬಾರದ ಹೊರತಾಗಿ ಸಿಎಸ್​ಕೆ ಗೆಲುವಿನ ಹಳಿ ಏರುವುದು ಅಸಾಧ್ಯವೆನಿಸಿದೆ.

ಹ್ಯಾಟ್ರಿಕ್​ ಗೆಲುವಿನೊಂದಿಗೆ ಬೀಗುತ್ತಿರುವ ಲಖನೌ, ಕಳೆದ ಪಂದ್ಯದಲ್ಲಿ ಗುಜರಾತ್​ ತಂಡ ಗೆಲುವಿನ ಓಟಕ್ಕೆ ಕಡಿವಾಣ ಹಾಕಿತ್ತು. ನಿಕೋಲಸ್​ ಪೂರನ್​ ಜತೆಗೆ ಏಡನ್​ ಮಾರ್ಕ್ರಮ್​, ಆಯುಷ್​ ಬಡೋನಿ ಲಖನೌ ಬ್ಯಾಟಿಂಗ್​ಗೆ ಬಲ ತುಂಬಿದ್ದಾರೆ. ಪುತ್ರಿಯ ಅನಾರೋಗ್ಯದಿಂದಾಗಿ ಕಳೆದ ಪಂದ್ಯವನ್ನು ತಪ್ಪಿಸಿಕೊಂಡಿದ್ದ ಮಿಚೆಲ್​ ಮಾರ್ಷ್​ ಈ ಬಾರಿ ಮರಳಿ ಕಣಕ್ಕಿಳಿಯುವ ನಿರೀಕ್ಷೆ ಇದೆ. ಮಾರ್ಷ್​ ಗೈರಿನಲ್ಲಿ ಆರಂಭಿಕನಾಗಿ ಆಡಿದ್ದ ರಿಷಭ್​ ಪಂತ್​ 21 ರನ್​ ಗಳಿಸಿದ್ದರು. ಇದು ಟೂರ್ನಿಯ 6 ಪಂದ್ಯಗಳಲ್ಲಿ ಅವರ ಗರಿಷ್ಠ ಗಳಿಕೆಯಾಗಿದ್ದು, ಮುಂದಿನ ಪಂದ್ಯಗಳಲ್ಲಿ ಇನ್ನಷ್ಟು ದೊಡ್ಡ ಇನಿಂಗ್ಸ್​ನ ನಿರೀೆ ಹರಡಿದೆ.

ಸಿಎಸ್​ಕೆಗೆ ಮಾಡು ಇಲ್ಲವೆ ಮಡಿ ಒತ್ತಡ

ಆಡಿರುವ ಮೊದಲ 6 ಪಂದ್ಯಗಳಲ್ಲಿ 1ರಲ್ಲಷ್ಟೇ ಗೆದ್ದು, 5ರಲ್ಲಿ ಸೋತಿರುವ ಸಿಎಸ್​ಕೆ ತಂಡ ಪ್ಲೇಆ್​ಗೆ ಏರಬೇಕಾದರೆ ಉಳಿದಿರುವ 8 ಪಂದ್ಯಗಳಲ್ಲಿ ಕನಿಷ್ಠ 7ರಲ್ಲಾದರೂ ಗೆಲ್ಲಲೇಬೇಕಾಗಿದೆ. ಇನ್ನೊಂದು ಪಂದ್ಯ ಸೋತರೂ, ಧೋನಿ ಬಳಗದ ಪ್ಲೇಆ್​ ಹಾದಿ ಜಟಿಲವಾಗಲಿದೆ.

ವಂಶ್​ ಬೇಡಿಗೆ ಅವಕಾಶದ ಬೇಡಿಕೆ!

ಕಳೆದ ದೆಹಲಿ ಪ್ರೀಮಿಯರ್​ ಲೀಗ್​ನಲ್ಲಿ (ಡಿಪಿಎಲ್​) ಮಿಂಚಿದ್ದ ಯುವ ವಿಕೆಟ್​ ಕೀಪರ್​&ಬ್ಯಾಟರ್​ ವಂಶ್​ ಬೇಡಿ ಅವರನ್ನು ಸಿಎಸ್​ಕೆ ಕಳೆದ ಮೆಗಾ ಹರಾಜಿನಲ್ಲಿ 55 ಲಕ್ಷ ರೂ.ಗೆ ಖರೀದಿಸಿತ್ತು. ಆದರೆ ಈಗ ಮೀಸಲು ಕೀಪರ್​ ಆಗಿ ಅವರನ್ನು ಬೆಂಚು ಕಾಯಿಸುತ್ತಿದೆ. ಡಿಪಿಎಲ್​ನಲ್ಲಿ ಆಡಿದ 9 ಪಂದ್ಯಗಳಲ್ಲಿ 22 ಸಿಕ್ಸರ್​ ಸಹಿತ 221 ರನ್​ ಸಿಡಿಸಿದ್ದ 22 ವರ್ಷದ ವಂಶ್​ ಬೇಡಿ,

ಪ್ರಿಯಾಂಶ್​ ಆರ್ಯರಂತೆ ಸ್ಫೋಟಕ ಬ್ಯಾಟಿಂಗ್​ ಪ್ರದರ್ಶಿಸುವ ಸಾಮರ್ಥ್ಯ ಹೊಂದಿದ್ದಾರೆ. ಧೋನಿ ಈಗ ಸಿಎಸ್​ಕೆ ನಾಯಕರೂ ಆಗಿರುವುದರಿಂದ ವಂಶ್​ಗೆ ಕೀಪರ್​ ಆಗಿ ಆಡಲು ಅವಕಾಶ ಸಿಗದು. ಹೀಗಾಗಿ ದೀಪಕ್​ ಹೂಡಾ ಅಥವಾ ರಾಹುಲ್​ ತ್ರಿಪಾಠಿ ಬದಲಿಗೆ ವಂಶ್​ ಬೇಡಿ ಅವರನ್ನು ತಜ್ಞ ಬ್ಯಾಟರ್​ ಆಗಿ ಆಡಿಸಬೇಕೆಂದು ಸಿಎಸ್​ಕೆ ಅಭಿಮಾನಿಗಳಿಂದ ಬೇಡಿಕೆ ಬರುತ್ತಿದೆ.

ಮುಖಾಮುಖಿ: 5

ಎಲ್​ಎಸ್​ಜಿ: 3

ಸಿಎಸ್​ಕೆ: 1

ರದ್ದು: 1

ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​.

https://www.vijayavani.net/isha-ambani-and-louise-bawden-join-fivb-board-of-administration