ಕ್ರ್ಯಾಶ್ ಟೆಸ್ಟ್ ಇನ್ನು ಭಾರತದಲ್ಲೇ

ಕಾರಿನ ಸುರಕ್ಷತೆ ಪರೀಕ್ಷೆಯ ಕ್ರ್ಯಾಶ್ ಟೆಸ್ಟ್ ಇನ್ನು ಮುಂದೆ ಭಾರತದಲ್ಲಿಯೇ ನಡೆಯಲಿದೆ. ಭಾರತ ತನ್ನದೇ ಆದ ಕ್ರಾ್ಯಶ್ ಟೆಸ್ಟ್ ರೇಟಿಂಗ್ ಮೌಲ್ಯಮಾಪನ ವ್ಯವಸ್ಥೆ ರೂಪಿಸಿದೆ. ಈ ಮೂಲಕ ಇಂತಹ ವ್ಯವಸ್ಥೆ ಹಾಗೂ ಮಾನದಂಡಗಳನ್ನು ಹೊಂದಿರುವ ಅರ್ಧ ಡಜನ್ ದೇಶಗಳ ಸಾಲಿಗೆ ಈಗ ಭಾರತ ಸೇರುತ್ತಿದೆ. ಭಾರತ್ ನ್ಯೂ ಕಾರ್ ಅಸೆಸ್​ವೆುಂಟ್ ಪ್ರೋಗ್ರಾಂ (ಭಾರತ್ ಎನ್​ಸಿಎಪಿ) ಅಡಿಯಲ್ಲಿ ಈ ಕುರಿತಂತೆ ಹೊಸ ನಿಯಮಗಳು ಅಕ್ಟೋಬರ್ 1ರಿಂದ ಜಾರಿಗೆ ಬರಲಿವೆ.

ಇಲ್ಲಿಯವರೆಗೆ ಕಾರು ತಯಾರಕರು ಸುರಕ್ಷತೆ ಪರೀಕ್ಷೆ ಮತ್ತು ಸ್ಟಾರ್ ಗ್ರೇಡಿಂಗ್​ಗಾಗಿ ಕಾರುಗಳನ್ನು ವಿದೇಶಗಳಿಗೆ ಸಾಗಿಸುತ್ತಿದ್ದರು. ಇದು ದುಬಾರಿ ಅಷ್ಟೇ ಅಲ್ಲ, ಸಾಕಷ್ಟು ಸಮಯ ತೆಗೆದುಕೊಳ್ಳುವ ಪ್ರಕ್ರಿಯೆಯಾಗಿತ್ತು. ಈ ಪರೀಕ್ಷೆಗಳು ಬಹುತೇಕವಾಗಿ ಪೆಟ್ರೋಲ್ ಮತ್ತು ಡೀಸೆಲ್ ಕಾರುಗಳಿಗೆ ಸೀಮಿತವಾಗಿತ್ತು. ಆದರೆ, ಭಾರತ್ ಎನ್​ಸಿಎಪಿ ಅಡಿಯಲ್ಲಿ ಪೆಟ್ರೋಲ್, ಡೀಸೆಲ್ ಕಾರುಗಳು ಮಾತ್ರವಲ್ಲದೆ, ಸಿಎನ್​ಜಿ ಮತ್ತು ಎಲೆಕ್ಟ್ರಿಕ್ ವಾಹನಗಳನ್ನು ಕೂಡ ಪರೀಕ್ಷಿಸಲಾಗುತ್ತದೆ.

ಕ್ರ್ಯಾಶ್​ ಟೆಸ್ಟ್ ಎನ್ನುವುದು ವಾಹನದ ಸುರಕ್ಷತಾ ರೇಟಿಂಗ್ ನಿರ್ಣಯಿಸುವ ನಿಟ್ಟಿನಲ್ಲಿ ನಿಯಂತ್ರಿತ ಪರಿಸರದಲ್ಲಿ ಕೈಗೊಳ್ಳುವ ಘರ್ಷಣೆ. ಭಾರತ್ ಎನ್​ಸಿಎಪಿ ಹೊಸ ನಿಯಮವು, ಗರಿಷ್ಠ ಎಂಟು ಆಸನಗಳಿರುವ, 3.5 ಟನ್​ಗಳಿಗಿಂತ ಕಡಿಮೆ ತೂಕವಿರುವ ಹಾಗೂ ದೇಶದಲ್ಲಿ ತಯಾರಿಸಲಾದ ಅಥವಾ ಮಾರಾಟ ಮಾಡಲಾಗುವ ಮೋಟಾರು ವಾಹನಗಳ ಸುರಕ್ಷತಾ ಮಾನದಂಡಗಳನ್ನು ವ್ಯಾಖ್ಯಾನಿಸುತ್ತದೆ.

ಅಪಘಾತವಾದ ಸಂದರ್ಭದಲ್ಲಿ ವಾಹನಗಳು ಎಷ್ಟು ಸುರಕ್ಷತೆಯನ್ನು ಹೊಂದಿರುತ್ತವೆ ಎಂಬ ಬಗೆಗೆ ವಸ್ತುನಿಷ್ಠ ಮಾಹಿತಿಯನ್ನು ಈ ಸುರಕ್ಷತಾ ರೇಟಿಂಗ್​ಗಳ ಮೂಲಕ ಒದಗಿಸಲಾಗುತ್ತದೆ. ಗ್ರಾಹಕರು ವಾಹನ ಖರೀದಿಸುವ ಮುಂಚಿತವಾಗಿ ಸುರಕ್ಷತೆ ಕುರಿತು ಪರಿಶೀಲಿಸಲು ಅನುಕೂಲವಾಗುತ್ತದೆ. ಅಲ್ಲದೆ, ಸುರಕ್ಷತಾ ಅಂಶಗಳನ್ನು ಇನ್ನಷ್ಟು ಸುಧಾರಿಸಿಕೊಳ್ಳಲು ವಾಹನ ತಯಾರಕರಿಗೂ ಈ ರೇಟಿಂಗ್ ನೆರವಾಗುತ್ತದೆ. ಭಾರತ್ ಎನ್​ಸಿಎಪಿ ಪರೀಕ್ಷಾ ಮಾನದಂಡಗಳನ್ನು ಜಾಗತಿಕ ಕ್ರಾ್ಯಶ್ ಟೆಸ್ಟ್ ಮಾನದಂಡಗಳೊಂದಿಗೆ ಸಮೀಕರಿಸಲಾಗಿದ್ದು, 1 ರಿಂದ 5 ಸ್ಟಾರ್​ಗಳವರೆಗೆ ರೇಟಿಂಗ್​ಗಳನ್ನು ನೀಡಲಾಗುತ್ತದೆ. ಎನ್​ಸಿಎಪಿ ಅಂಕಗಳು (ಸ್ಟಾರ್​ಗಳು) ಹೆಚ್ಚಾದಷ್ಟೂ ಕಾರು ಹೆಚ್ಚು ಸುರಕ್ಷಿತವಾಗಿರುತ್ತದೆ ಎಂಬುದನ್ನು ಸೂಚಿಸುತ್ತದೆ. ದೇಶದಲ್ಲಿ ಮಾರಾಟವಾಗುವ ಕಾರುಗಳ ಗುಣಮಟ್ಟ ಸುಧಾರಿಸಲು ಮತ್ತು ಭಾರತದಲ್ಲಿ ನಿರ್ವಿುತ ವಾಹನಗಳ ರಫ್ತು ಯೋಗ್ಯತೆ ಹೆಚ್ಚಿಸಲು ಭಾರತ ಎನ್​ಸಿಎಪಿ ಮಾನದಂಡಗಳು ಕಾರಣವಾಗಬಹುದು ಎಂದು ನಿರೀಕ್ಷಿಸಲಾಗಿದೆ.

ಪರೀಕ್ಷೆ ಏಕೆ?

ಭಾರತದಲ್ಲಿ ಪ್ರತಿ ವರ್ಷ ರಸ್ತೆ ಅಪಘಾತಗಳಲ್ಲಿ ಅಂದಾಜು 1.5 ಲಕ್ಷ ಜನ ಸಾವನ್ನಪು್ಪತ್ತಾರೆ. ರಸ್ತೆ ಅಪಘಾತಗಳಲ್ಲಿ ವಿಶ್ವದಲ್ಲಿಯೇ ಅತಿ ಹೆಚ್ಚು ಸಾವು ಸಂಭವಿಸುವ ದೇಶ ಭಾರತವಾಗಿದೆ. ಸ್ಟಾಕ್​ಹೋಮ್ ಘೊಷಣೆಯ ಅನುಸಾರ, 2030ರ ವೇಳೆಗೆ ರಸ್ತೆ ಅಪಘಾತದ ಸಾವು-ನೋವುಗಳ ಸಂಖ್ಯೆಯನ್ನು ಶೇಕಡಾ 50ರಷ್ಟು ಕಡಿಮೆ ಮಾಡಲು ಭಾರತ ಬದ್ಧವಾಗಿದೆ. ಅಪಘಾತದ ಸಂದರ್ಭದಲ್ಲಿ ಸಾವು-ನೋವು ಪ್ರಮಾಣ ತಗ್ಗಿಸಲು ವಾಹನ ಸುರಕ್ಷತೆಗೆ ಒತ್ತು ನೀಡುವ ನಿಟ್ಟಿನಲ್ಲಿ ಕ್ರ್ಯಾಶ್ ಟೆಸ್ಟ್ ಮಹತ್ವದ್ದಾಗಿದೆ.

ಹೇಗೆ ನಡೆಯುತ್ತದೆ ಪರೀಕ್ಷೆ?

ವಾಹನಗಳ ಸುರಕ್ಷತಾ ಮೌಲ್ಯಮಾಪನಕ್ಕಾಗಿ ವಯಸ್ಕ ಪ್ರಯಾಣಿಕರ ರಕ್ಷಣೆ, ಪ್ರಯಾಣಿಸುವ ಮಕ್ಕಳ ರಕ್ಷಣೆ ಮತ್ತು ಸುರಕ್ಷತಾ ಸಹಾಯಕ ತಂತ್ರಜ್ಞಾನಗಳ ಅಳವಡಿಕೆ- ಈ ಮೂರು ಸಂಗತಿಗಳಿಗೆ ಸಂಬಂಧಿಸಿದಂತೆ ಮೂರು ಪರೀಕ್ಷೆಗಳನ್ನು ನಡೆಸಲಾಗುತ್ತದೆ. ಇದಕ್ಕಾಗಿ, ಮುಂಭಾಗದ ಅಪಘಾತ ಪರಿಣಾಮ ಪರೀಕ್ಷೆ (ಎಒಪಿ), ಪಾರ್ಶ್ವ ಅಪಘಾತದ ಪರಿಣಾಮ ಪರೀಕ್ಷೆ (ಸಿಒಪಿ) ಮತ್ತು ಪಕ್ಕದ ಕಂಬಕ್ಕೆ ಅಪಘಾತದ ಪರಿಣಾಮ ಪರೀಕ್ಷೆ ಎಂಬ ಮೂರು ಪರೀಕ್ಷೆಗಳನ್ನು ಕೈಗೊಳ್ಳಲಾಗುತ್ತದೆ. ಈ ಪರೀಕ್ಷೆಗಳಲ್ಲಿ ವಾಹನದ ಕಾರ್ಯಕ್ಷಮತೆಯ ಆಧಾರದ ಮೇಲೆ ಎಒಪಿ ಮತ್ತು ಸಿಒಪಿಗಾಗಿ ಪ್ರತ್ಯೇಕ ಸ್ಟಾರ್ ರೇಟಿಂಗ್​ಗಳನ್ನು ನೀಡಲಾಗುತ್ತದೆ. ಮುಂಭಾಗದ ಪರಿಣಾಮ ಪರೀಕ್ಷೆಯು ಪ್ರತಿ ಗಂಟೆಗೆ 64 ಕಿಮೀ ವೇಗದಲ್ಲಿ ಎದುರಿನ ತಡೆಗೋಡೆಗೆ ಡಿಕ್ಕಿ ಹೊಡೆಯುವುದಾಗಿರುತ್ತದೆ. ಪಕ್ಕದ ಕಂಬಕ್ಕೆ ಅಪಘಾತದ ಪರಿಣಾಮ ಪರೀಕ್ಷೆಯನ್ನು 3 ಸ್ಟಾರ್ ಮತ್ತು ಅದಕ್ಕಿಂತ ಹೆಚ್ಚಿನ ಭದ್ರತೆ ಪಡೆಯಲು ಬಯಸುವ ಕಾರ್​ಗಳಿಗೆ ಮಾತ್ರ ಕೈಗೊಳ್ಳಲಾಗುತ್ತದೆ. ಅಲ್ಲದೆ, 3 ಸ್ಟಾರ್ ಅಥವಾ ಹೆಚ್ಚಿನ ರೇಟಿಂಗ್ ಪಡೆದುಕೊಳ್ಳಲು ಮುಂದಾಗುವ ಕಾರ್​ಗಳು ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ (ಎಲೆಕ್ಟ್ರಾನಿಕ್ ಸ್ಥಿರತೆ ನಿಯಂತ್ರಣ) ಮತ್ತು ಫ್ರಂಟ್ ಸೀಟ್ ಬೆಲ್ಟ್ ರಿಮೈಂಡರ್​ಗಳನ್ನು (ಮುಂದಿನ ಆಸನದಲ್ಲಿರುವವರು ಸೀಟು ಬೆಲ್ಟ್ ಧರಿಸುವುದನ್ನು ನೆನಪಿಸುವ ವ್ಯವಸ್ಥೆ) ಹೊಂದಿರಬೇಕಾಗುತ್ತದೆ.

ರೇಟಿಂಗ್ ಪ್ರಕ್ರಿಯೆ

ವಾಹನ ತಯಾರಕರು ಕ್ರಾ್ಯಶ್ ಪರೀಕ್ಷೆಗಾಗಿ ವಾಹನ ಮಾದರಿಯನ್ನು ನೀಡಿದ ನಂತರ ಭಾರತ್ ಎನ್​ಸಿಎಪಿ ತಂಡ ಉತ್ಪಾದನಾ ಘಟಕಕ್ಕೆ ಭೇಟಿ ನೀಡುತ್ತದೆ. ಈ ತಂಡ ಅಲ್ಲಿ ಯಾದೃಚ್ಛಿಕ (ರ್ಯಾಂಡಮ್ ವಿಧಾನದ ಮೂಲಕ ಕ್ರ್ಯಾಶ್ ಟೆಸ್ಟ್​ಗೆ ಕಾರೊಂದನ್ನು ಆಯ್ಕೆ ಮಾಡಿಕೊಳ್ಳುತ್ತದೆ. ಈ ವಾಹನವನ್ನು ಭಾರತ್ ಎನ್​ಸಿಎಪಿ ಪರೀಕ್ಷಾ ಕೇಂದ್ರಕ್ಕೆ ಕೊಂಡೊಯ್ದು, ಕಾರು ತಯಾರಕರ ಪ್ರತಿನಿಧಿಗಳ ಸಮ್ಮುಖದಲ್ಲಿ ಕ್ರಾ್ಯಶ್ ಟೆಸ್ಟ್ ನಡೆಸಲಾಗುತ್ತದೆ. ಭಾರತ್ ಎನ್​ಸಿಎಪಿ ಸ್ಥಾಯಿ ಸಮಿತಿಯು ಸಂಪೂರ್ಣ ಪ್ರಕ್ರಿಯೆಯನ್ನು ಅನುಮೋದಿಸಿದ ನಂತರ, ಕ್ರಾ್ಯಶ್ ಟೆಸ್ಟ್ ಫಲಿತಾಂಶಗಳು ಮತ್ತು ಆ ವಾಹನದ ಸ್ಟಾರ್ ರೇಟಿಂಗ್ ಪ್ರಕಟಿಸಲಾಗುತ್ತದೆ. ಕಾರಿನ ರಚನಾತ್ಮಕ ಸಮಗ್ರತೆಯ ಮೌಲ್ಯಮಾಪನ, ಸುರಕ್ಷತಾ ಸಹಾಯ ತಂತ್ರಜ್ಞಾನಗಳ ಸೌಲಭ್ಯ, ವಾಹನದಲ್ಲಿ ವಯಸ್ಕ ಮತ್ತು ಮಕ್ಕಳ ಪ್ರಯಾಣಿಕರ ಸುರಕ್ಷತೆ, ವಾಹನದ ಒಟ್ಟಾರೆ ಪಾದಚಾರಿ-ಸ್ನೇಹಿ ವಿನ್ಯಾಸ ಈ ಎಲ್ಲ ಅಂಶಗಳನ್ನು ಪರಿಗಣನೆಗೆ ತೆಗೆದುಕೊಂಡು ಅಂತಿಮ ರೇಟಿಂಗ್ ನಿರ್ಧರಿಸಲಾಗುತ್ತದೆ.

ಕಡಿಮೆ ವೆಚ್ಚ

ಭಾರತ್ ಎನ್​ಸಿಎಪಿ ಈಗಾಗಲೇ 30ಕ್ಕೂ ಹೆಚ್ಚು ಪರೀಕ್ಷಾ ವಿನಂತಿಗಳನ್ನು ಸ್ವೀಕರಿಸಿದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ತಿಳಿಸಿದ್ದಾರೆ. ಭಾರತ್ ಎನ್​ಸಿಎಪಿ ಕಾರ್ಯಕ್ರಮದ ಅಡಿಯಲ್ಲಿ ಕಾರನ್ನು ಪರೀಕ್ಷಿಸಲು ಅಂದಾಜು 60 ಲಕ್ಷ ರೂಪಾಯಿ ವೆಚ್ಚವಾಗುತ್ತದೆ. ಆದರೆ, ವಿದೇಶದಲ್ಲಿ ಇದೇ ರೀತಿಯ ಪರೀಕ್ಷೆಗೆ ಅಂದಾಜು 2.5 ಕೋಟಿ ರೂಪಾಯಿ ವೆಚ್ಚವಾಗುತ್ತದೆ ಎಂದೂ ಅವರು ವಿವರಿಸಿದ್ದಾರೆ.

ಎಲ್ಲಿ ಪರೀಕ್ಷೆ?

ಪುಣೆಯಲ್ಲಿರುವ ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾದ (ಎಆರ್​ಎಐ) ಪ್ರಯೋಗಾಲಯದಲ್ಲಿ ಭಾರತ್ ಎನ್​ಸಿಎಪಿ ಪರೀಕ್ಷೆ ಕೈಗೊಳ್ಳಲಾಗುತ್ತದೆ.

ಜಾಗತಿಕ ಎನ್​ಸಿಎಪಿ ಸಾಲಿಗೆ ಭಾರತ

ಅಪಘಾತ ಸುರಕ್ಷತೆಯ ಆಧಾರದ ಮೇಲೆ ಕಾರುಗಳನ್ನು ರೇಟಿಂಗ್ ನೀಡುವ ಪ್ರಕ್ರಿಯೆಯು 1970ರ ದಶಕದ ಅಂತ್ಯದಲ್ಲಿ ಅಮೆರಿಕದಲ್ಲಿ ಪ್ರಾರಂಭವಾಯಿತು. ತರುವಾಯ ಇದನ್ನು ಬೇರೆ ದೇಶಗಳಲ್ಲಿ ಅನುಸರಿಸಲಾಯಿತು. ಹಲವು ದೇಶಗಳಲ್ಲಿ ಈಗಾಗಲೇ ಕಾರ್ಯನಿರ್ವಹಿಸುತ್ತಿದ್ದು, ಈಗ ಈ ಸಾಲಿಗೆ ಭಾರತ ಎನ್​ಸಿಎಪಿ ಸೇರಲಿದೆ. 2011ರಲ್ಲಿ ಟುವರ್ಡ್ಸ್ ಝೀರೋ ಫೌಂಡೇಶನ್ ಎಂಬ ಬ್ರಿಟನ್ ಮೂಲದ ಧರ್ವರ್ಥ ಸಂಸ್ಥೆಯು ವಿವಿಧ ಎನ್​ಸಿಎಪಿಗಳ ನಡುವೆ ಸಮನ್ವಯ ಸುಧಾರಿಸಲು ಗ್ಲೋಬಲ್ ಎನ್​ಸಿಎಪಿ ರಚಿಸಿದೆ. ಭಾರತ್ ಎನ್​ಸಿಎಪಿ ಮಾನದಂಡಗಳು ಗ್ಲೋಬಲ್ ಎನ್​ಸಿಎಪಿಯ ಸ್ವರೂಪದೊಂದಿಗೆ ಜೋಡಿಸಲ್ಪಟ್ಟಿವೆ.

https://www.vijayavani.net/peace-and-tranquality-necessity-for-man-says-suttur-shree

https://www.vijayavani.net/a-study-suggests9-that-consuming-green-apples-on-a-daily-basis-can-lower-the-risk-of-lung-cancer