ಮಾಲೆ: ಕರೊನಾ ಸೋಂಕಿನ ಅಡ್ಡ ಪರಿಣಾಮ ಒಂದೇ ಎರಡೇ…!!! ಮಾಲ್ಡೀವ್ಸ್ನ ಐಷಾರಾಮಿ ರೆಸಾರ್ಟ್ಗೆ ಆರು ದಿನ ಹನಿಮೂನ್ ಆಚರಿಸೋಕೆ ಆಗಮಿಸಿದ ಜೋಡಿಗೆ ಭರ್ಜರಿ ಅನುಭವವೇ ಆಗಿದೆ.. 26 ದಿನ ಅದೇ ರೆಸಾರ್ಟ್ನಲ್ಲಿ ಉಳಿಯುವಂತಾಗಿದೆ. ಅಲ್ಲಿ ಇವರನ್ನು ಬಿಟ್ಟರೆ ಬೇರಾರೂ ಅತಿಥಿಗಳಿಲ್ಲ!
ಅವರು ದಕ್ಷಿಣ ಆಫ್ರಿಕಾದ ಪ್ರಜೆಗಳು. ಹೊಸದಾಗಿ ಮದುವೆಯಾದ ಆ ಜೋಡಿ ಹನಿಮೂನ್ಗಾಗಿ ಆಯ್ಕೆ ಮಾಡಿಕೊಂಡದ್ದು ಮಾಲ್ಡೀವ್ಸ್ ಅನ್ನು. ಅಲ್ಲಿನ ಐಷಾರಾಮಿ ರೆಸಾರ್ಟ್ ಒಂದರಲ್ಲಿ ಆರು ದಿನಗಳ ಹನಿಮೂನ್ ಪ್ಯಾಕೇಜ್ ಬುಕ್ ಮಾಡಿಕೊಂಡಿತ್ತು ಆ ಜೋಡಿ. ಆಕೆಯ ಹೆಸರು ಒಲಿವಿಯಾ(27). ಆತನ ಹೆಸರು ರೌಲ್ ಡೆ ಫ್ರೈಟಸ್(28). ಈ ನವದಂಪತಿ ಮಾಲ್ಡೀವ್ಸ್ನ ಸಿನ್ನಮೊನ್ ವೆಲಿಫುಷಿ ರೆಸಾರ್ಟ್ಗೆ ಮಾರ್ಚ್ 22ರಂದು ಆಗಮಿಸಿದ್ದರು. ಆ ವಾರದ ಕೊನೆಯಲ್ಲಿ ಅವರು ಮತ್ತೆ ದಕ್ಷಿಣ ಆಫ್ರಿಕಾ ತಲುಪಬೇಕಾಗಿತ್ತು.
ಅವರು ಅಲ್ಲಿ ಲ್ಯಾಂಡ್ ಆಗಿ ಒಂದೆರಡು ದಿನ ಅವರ ಮಟ್ಟಿಗೆ ಬುಧವಾರ(ಮಾ.26)ದ ತನಕ ತನಕ ಎಲ್ಲವೂ ಸರಿಯಾಗಿಯೇ ಇತ್ತು. ಈ ನಡುವೆಯೇ, ಕರೊನಾ ಸೋಂಕು ಹರಡದಂತೆ ತಡೆಯಲು ಬಹುತೇಕ ದೇಶಗಳು ಲಾಕ್ಡೌನ್ ಘೋಷಣೆ ಮಾಡಿವೆ. ಈ ನಡುವೆ ದಕ್ಷಿಣ ಆಫ್ರಿಕಾ ಕೂಡ ಲಾಕ್ಡೌನ್ ಘೋಷಣೆ ಮಾಡಿತು. ಅಷ್ಟೇ ಏಕೆ ಮಾಲ್ಡೀವ್ಸ್ನಲ್ಲೂ ಲಾಕ್ಡೌನ್ ಘೋಷಣೆಯಾಗಿ ಬಿಡ್ತು.
ದಕ್ಷಿಣಾ ಆಫ್ರಿಕಾದಲ್ಲಿ ಏಪ್ರಿಲ್ 16ರ ತನಕ ಲಾಕ್ಡೌನ್ ಮುಂದುವರಿಯಲಿದ್ದು, ಅಲ್ಲಿ ತನಕ ಇವರು ಮಾಲ್ಡೀವ್ಸ್ ಬಿಡುವಂತಿಲ್ಲ. ಮಾರ್ಚ್ 26ರಂದು ಇವರ ಕೈಗೊಂದು ನೋಟಿಸ್ ರಾಯಭಾರ ಕಚೇರಿಯಿಂದ ತಲುಪುತ್ತದೆ. ಗುರುವಾರ ಮಧ್ಯರಾತ್ರಿಯಿಂದ ದಕ್ಷಿಣ ಆಫ್ರಿಕಾದ ವಿಮಾನ ನಿಲ್ದಾಣಗಳು ಬಂದ್ ಆಗಿರಲಿವೆ. ಮಾಲ್ಡೀವ್ಸ್ನಿಂದ ಅಂದು ಹೊರಟರೂ ಅವರು ಗುರುವಾರ ಮಧ್ಯರಾತ್ರಿಯೊಳಗೆ ತವರು ದೇಶ ತಲುಪುವುದು ಅಸಾಧ್ಯದ ಮಾತಾಗಿತ್ತು. ಹಾಗೆ ವಿಧಿಯಿಲ್ಲದೇ ಅಥವಾ ವಿಧಿಯ ಆಟಕ್ಕೆ ಸಿಲುಕಿತು ಈ ಜೋಡಿ!
ಈ ಹನಿಮೂನ್ ಅವಧಿಯನ್ನು ಅನುಭವಿಸಬೇಕೋ ಅಥವಾ ಆತಂಕದಲ್ಲಿ ದಿನದೂಡಬೇಕೋ ಎಂಬ ಗೊಂದಲದಲ್ಲೇ ಬದುಕು ಸಾಗಿದೆ. ಈ ನಡುವೆ, ಸಂಕಷ್ಟದ ಸಮಯವಾದ್ದರಿಂದ ಈ ದಂಪತಿಗೆ ಪ್ರತಿ ರಾತ್ರಿಯ ಬಾಡಿಗೆ ದರದಲ್ಲಿ 750 ಡಾಲರ್ ರಿಯಾಯಿತಿ ಲಭಿಸಿದೆ. ಆದಾಗ್ಯೂ, ಉಳಿತಾಯದ ಹಣ ನೀರಿನಂತೆ ಖರ್ಚಾಗುತ್ತಿದೆ ಎಂಬ ಆತಂಕ ಚಿಂತೆ ಅವರನ್ನು ಕಾಡಿದೆ. ಇವೆಲ್ಲದರ ನಡುವೆ, ಆ ರೆಸಾರ್ಟ್ ಬಿಟ್ಟು ಹೊರಹೋಗುವಂತಿಲ್ಲ, ಹೋದರೆ ವಾಪಸ್ ಅಲ್ಲಿಗೆ ತಲುಪುವಂತಿಲ್ಲ ಎನ್ನುವ ಸ್ಥಿತಿ.
ಸದ್ಯ ಸ್ವಲ್ಪ ಹೊತ್ತು ಬೋಟಿಂಗ್ ಮಾಡಿ, ನಂತರ ರೆಸಾರ್ಟ್ನಲ್ಲಿ ಅಡ್ಡಾಡುತ್ತ ಕಾಲ ಕಳೆಯುತ್ತಿದೆ ಈ ಜೋಡಿ. ಲಾಕ್ಡೌನ್ ಹಿಂತೆಗೆಯಲ್ಪಟ್ಟರೆ ಒಮ್ಮೆ ಊರು ತಲುಪಿಬಿಡುವ ಧಾವಂತ ಅವರ ಕಂಗಳಲ್ಲಿವೆ. (ಏಜೆನ್ಸೀಸ್)