ನವದೆಹಲಿ: ಕರೊನಾ ಅಬ್ಬರದಿಂದಾಗಿ ಐಪಿಎಲ್ 14ನೇ ಆವೃತ್ತಿ ಭಾರತದಲ್ಲಿ ಅರ್ಧದಲ್ಲೇ ಸ್ಥಗಿತಗೊಂಡ ಬಳಿಕ ಟೂರ್ನಿಯನ್ನು ಪೂರ್ಣಗೊಳಿಸಲು ವಿವಿಧ ಆಯ್ಕೆಗಳು ಎದುರಾಗುತ್ತಿವೆ. ಈಗಾಗಲೆ ಯುಎಇ, ಇಂಗ್ಲೆಂಡ್ ಮತ್ತು ಆಸ್ಟ್ರೆಲಿಯಾದಲ್ಲೂ ಟೂರ್ನಿಯ ಉಳಿದ ಭಾಗವನ್ನು ಆಯೋಜಿಸುವ ಚಿಂತನೆಗಳು ನಡೆದಿವೆ. ಈ ನಡುವೆ ನೆರೆಯ ಶ್ರೀಲಂಕಾದಿಂದಲೂ ಐಪಿಎಲ್ 14ನೇ ಆವೃತ್ತಿಯ ಉಳಿದ ಭಾಗದ ಆತಿಥ್ಯ ವಹಿಸಲು ಆಸಕ್ತಿ ವ್ಯಕ್ತವಾಗಿದೆ.
ಐಪಿಎಲ್ ಆತಿಥ್ಯಕ್ಕೆ ಶ್ರೀಲಂಕಾ ಮುಂದೆ ಬರುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆ 2020ರಲ್ಲೂ ಐಪಿಎಲ್ ಟೂನಿರ್ ಭಾರತದಲ್ಲಿ ನಡೆಯದೆ ಮುಂದೂಡಿಕೆಯಾದಾಗಲೂ ಶ್ರೀಲಂಕಾದಿಂದ ಟೂನಿರ್ ಆಯೋಜನೆಗೆ ಆಹ್ವಾನ ಬಂದಿತ್ತು. ಈ ಸಲವೂ ಪಟ್ಟು ಬಿಡದ ಶ್ರೀಲಂಕಾ ಮತ್ತೊಮ್ಮೆ ಐಪಿಎಲ್ ಟೂರ್ನಿ ಆಯೋಜನೆಯ ಆಹ್ವಾನ ನೀಡಿದೆ.
ಇದನ್ನೂ ಓದಿ: ಕರೊನಾದಿಂದ ಸಂಕಷ್ಟದಲ್ಲಿರುವವರಿಗೆ ಕ್ರಿಕೆಟಿಗ ರಿಷಭ್ ಪಂತ್ ನೆರವು
ಒಂದು ವೇಳೆ ಈ ಬಿಸಿಸಿಐ ಆಹ್ವಾನವನ್ನು ಒಪ್ಪಿಕೊಂಡರೆ, ಐಪಿಎಲ್ ಆಯೋಜನೆಯಿಂದ ಶ್ರೀಲಂಕಾ ಕ್ರಿಕೆಟ್ ಮಂಡಳಿಗೆ ಭಾರಿ ಲಾಭವಾಗಲಿದೆ. ಈಗಾಗಲೆ ತೀವ್ರ ಆರ್ಥಿಕ ಸಂಕಷ್ಟದಲ್ಲಿರುವ ಶ್ರೀಲಂಕಾ ಕ್ರಿಕೆಟ್ ಮಂಡಳಿಗೆ ಐಪಿಎಲ್ ಆತಿಥ್ಯ ಬಹುದೊಡ್ಡ ವರದಾನವಾಗಿ ಪರಿಣಮಿಸಬಹುದು. ಶ್ರೀಲಂಕಾ ಕ್ರಿಕೆಟ್ ಮಂಡಳಿಯ ಹಾಲಿ ಯೋಜನೆಯ ಪ್ರಕಾರ, ಖೆಟ್ಟರಾಮ (ಕೊಲಂಬೊ), ಪಲ್ಲೆಕಿಲೆ, ಸೂರಿಯವೆವಾ ಮತ್ತು ಡಂಬುಲಾದಲ್ಲಿ ಐಪಿಎಲ್ ಪಂದ್ಯಗಳನ್ನು ಆಯೋಜಿಸಬಹುದಾಗಿದೆ. ಈ ನಾಲ್ಕೂ ತಾಣಗಳು ಹೊನಲುಬೆಳಕಿನ ವ್ಯವಸ್ಥೆಗಳನ್ನು ಹೊಂದಿವೆ. ಈ ಪೈಕಿ ಮೊದಲ 3 ತಾಣಗಳು ಈಗಾಗಲೆ ಐಸಿಸಿ ಟೂರ್ನಿಯ ಪಂದ್ಯಗಳನ್ನೂ ಯಶಸ್ವಿಯಾಗಿ ಆಯೋಜಿಸಿವೆ.
ಕರೊನಾ ಹಾವಳಿಯ ನಡುವೆ ಸ್ಥಳಿಯ ಟಿ20 ಟೂರ್ನಿಯನ್ನು ಯಶಸ್ವಿಯಾಗಿ ಆಯೋಜಿಸಿದ ಅನುಭವವೂ ಶ್ರೀಲಂಕಾ ಕ್ರಿಕೆಟ್ ಮಂಡಳಿಗೆ ಇದೆ. ಕಳೆದ ವರ್ಷ ಅಕ್ಟೋಬರ್-ನವೆಂಬರ್ನಲ್ಲಿ 5 ತಂಡಗಳ ಲಂಕಾ ಪ್ರೀಮಿಯರ್ ಲೀಗ್ ನಡೆದಿತ್ತು. ಐಪಿಎಲ್ ಟೂರ್ನಿಗೆ ಮುಂದಿನ ಸೆಪ್ಟೆಂಬರ್ನಲ್ಲಿ ಆತಿಥ್ಯ ವಹಿಸಲು ಲಂಕಾ ಕ್ರಿಕೆಟ್ ಮಂಡಳಿ ಬಯಸಿದೆ.
ಐಪಿಎಲ್ ಆಯೋಜನೆಗೆ ಶ್ರೀಲಂಕಾವನ್ನು ಆತಿಥೇಯ ಸ್ಥಳವಾಗಿ ಬಿಸಿಸಿಐ ಪರಿಗಣಿಸುವುದಾದರೆ ಅಲ್ಲಿನ ಹಾಲಿ ಕರೊನಾ ಪರಿಸ್ಥಿತಿಯನ್ನೂ ಗಮನಿಸಬೇಕಾಗುತ್ತದೆ. ಯಾಕೆಂದರೆ ಸದ್ಯ ಶ್ರೀಲಂಕಾದಲ್ಲೂ ಕೋವಿಡ್-19 ಪರಿಸ್ಥಿತಿ ಮತ್ತೊಮ್ಮೆ ಹದಗೆಡುತ್ತಿದೆ. ಕಳೆದ ಒಂದು ವಾರದಲ್ಲಿ ಶ್ರೀಲಂಕಾದಲ್ಲಿ ಪ್ರತಿದಿನ 2 ಸಾವಿರ ಹೊಸ ಪ್ರಕರಣಗಳು ದಾಖಲಾಗಿವೆ. ಕಳೆದ ಏಪ್ರಿಲ್ನಲ್ಲಿ ಈ ಸಂಖ್ಯೆ ಪ್ರತಿದಿನಕ್ಕೆ 300ರಷ್ಟಿತ್ತು.
ಪೃಥ್ವಿ ಷಾ ಟೀಮ್ ಇಂಡಿಯಾಗೆ ಮರಳಬೇಕಾದರೆ ಈ ಷರತ್ತು ಪೂರೈಸಬೇಕಂತೆ!