3 ತಿಂಗಳ ಕೂಸಿಗಾಗಿ 180 ಕಿ.ಮೀ ರಿಲೇ!: ಮಂಗಳೂರಿಂದ ಹೊನ್ನಾವರಕ್ಕೆ ಔಷಧ ತಲುಪಿಸಿದ ಕರೊನಾ ವಾರಿಯರ್ಸ್

ಮಂಗಳೂರು: ಹೊನ್ನಾವರದ ತಾಯಿ ಮನೆಯಲ್ಲಿದ್ದ ಮೂರು ತಿಂಗಳ ಮಗುವಿಗೆ ತುರ್ತಾಗಿ ಬೇಕಿದ್ದ ಔಷಧವನ್ನು 180 ಕಿ.ಮೀ ದೂರದ ಮಂಗಳೂರಿನಿಂದ ರಿಲೇ ಮಾದರಿ ಕಾರ್ಯಾಚರಣೆ ನಡೆಸಿ ತಲುಪಿಸುವ ಮೂಲಕ ಕರೊನಾ ವಾರಿಯರ್ಸ್ ತಂಡ ಸಾರ್ಥಕತೆ ಕಂಡಿದೆ. ಮಗುವಿಗೆ ಬೇಕಾದ ಔಷಧ ಮಂಗಳೂರಿನ ತೊಕ್ಕೊಟ್ಟು ಕಲ್ಲಾಪು ನಿವಾಸಿ ರಾಬಿನ್ ಡಿಸೋಜ ಬಳಿ ಇತ್ತು. ಆದರೆ ಲಾಕ್​ಡೌನ್​ನಿಂದಾಗಿ ಅದನ್ನು ಹೊನ್ನಾವರದಲ್ಲಿದ್ದ ಪತ್ನಿಗೆ ತಲುಪಿಸಲು ಸಾಧ್ಯವಾಗಿರಲಿಲ್ಲ. ಈ ಕಷ್ಟಕ್ಕೆ ದನಿಯಾದ ಮಾಹಿತಿ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಕಾರ್ಯದರ್ಶಿ ಕ್ಯಾ. ಮಣಿವಣ್ಣನ್ ನೇತೃತ್ವದಲ್ಲಿ ಹುಟ್ಟುಹಾಕಲಾಗಿರುವ ಕೊವಿಡ್ ವಾರಿಯರ್ಸ್ ತಂಡ ಔಷಧವನ್ನು ಮಗುವಿನ ತಾಯಿಗೆ ತಲುಪಿಸುವಲ್ಲಿ ಯಶಸ್ವಿಯಾಗಿದೆ. ಏ.17ರಂದು ಆರಂಭವಾದ ಈ ರಿಲೇ ಮಾದರಿ ಕಾರ್ಯಾಚರಣೆ ಮರುದಿನ ಯಶಸ್ವಿಯಾಗಿ ಪೂರ್ಣಗೊಂಡಿದೆ.

ಹೇಗಿತ್ತು ಕಾರ್ಯಾಚರಣೆ?

ಏ.16ರಂದು ಬೆಂಗಳೂರಿನ ಡಿಐಪಿಆರ್ ಮುಖ್ಯ ಟೀಂನಿಂದ ಕೊವಿಡ್ ವಾರಿಯರ್ಸ್ ಬಳಗದ ದ.ಕ- ಉಡುಪಿಯ ಪ್ರಧಾನ ಸ್ವಯಂಸೇವಕಿ ಸಹನಾಗೆ ಕರೆ ಬಂದಿತ್ತು. ಔಷಧವನ್ನು ಹೊನ್ನಾವರಕ್ಕೆ ತಲುಪಿಸಬೇಕೆಂಬ ಮಾಹಿತಿ ನೀಡಲಾಯಿತು. ಅವರು ಇನ್ನೋರ್ವ ಸ್ವಯಂಸೇವಕ ಸುದೀಪ್ ಘಾಟೆ ಸಹಿತ ಉಡುಪಿ ಸ್ವಯಂಸೇವಕರ ತಂಡವನ್ನೂ ಅಲರ್ಟ್ ಮಾಡಿದರು. ಮರುದಿನ ಬೆಳಗ್ಗೆ ರಾಬಿನ್​ರಿಂದ ಸುದೀಪ್ ಔಷಧ ಕೊಂಡೊಯ್ದು ಸಾಜಿದ್ ಸುಬೇರ್​ಗೆ ಹಸ್ತಾಂತರಿಸಿದರು.

ಉಡುಪಿ- ದ.ಕ ಗಡಿ ಹೆಜಮಾಡಿ ಕ್ರಾಸ್​ನಿಂದ ಉಡುಪಿ ಟೀಂನ ಸುಕೇತ್ ಕೊಂಡೊಯ್ದು ಉಡುಪಿಯಲ್ಲಿ ಅನೀಶ್ ಎಂಬುವವರಿಗೆ ಹಸ್ತಾಂತರಿಸಿದರು. ಶಿರೂರು ಕ್ರಾಸ್ ತಲುಪಿದಾಗ ಅನೀಶ್​ಗೆ ಹೊಸ ಸವಾಲು ಎದುರಾಯಿತು. ಒಮ್ಮೆ ಉತ್ತರ ಕನ್ನಡ ಜಿಲ್ಲೆ ಪ್ರವೇಶಿಸಿದರೆ ಉಡುಪಿಗೆ ಮರಳುವಂತಿಲ್ಲ ಎಂದು ಪೊಲೀಸರು ಎಚ್ಚರಿಸಿದರು. ಈ ನಡುವೆ ಉಡುಪಿಯ ರೆಡ್​ಕ್ರಾಸ್ ಸದಸ್ಯ ನಿತಿನ್ ಶೆಟ್ಟಿ ಅವರನ್ನು ಸಂರ್ಪಸಿದಾಗ ಹೊನ್ನಾವರದ ಆರೋಗ್ಯ ಇಲಾಖೆ ಸಿಬ್ಬಂದಿ ಸಂಪರ್ಕ ಲಭ್ಯವಾಯಿತು. ಅವರು ನೀಡಿದ ಸಲಹೆಯಂತೆ ಔಷಧದ ಕಟ್ಟನ್ನು ಪೊಲೀಸರ ಬಳಿ ನೀಡಿ ಅನೀಶ್ ಉಡುಪಿಗೆ ಮರಳಿದರು. ಮರುದಿನ ಆಗಮಿಸಿದ ಹೊನ್ನಾವರದ ವೈದ್ಯಕೀಯ ಸಿಬ್ಬಂದಿ ಮಹೇಶ್ ನಾಯಕ್ ಭಟ್ಕಳದವರೆಗೆ ಕೊಂಡೊಯ್ದರೆ, ಇನ್ನೋರ್ವ ಸಹಾಯಕ ಯೋಗೇಶ್ ಅದನ್ನು ಹೊನ್ನಾವರದಲ್ಲಿ ಮಗುವಿನ ಕಡೆಯವರಿಗೆ ತಲುಪಿಸಿದರು.

ಹಣ ಮರಳಿಸಿದರು

ಮಗುವಿನ ತಂದೆ ಹೋಗಿ ಬರುವ ಖರ್ಚನ್ನು ಸ್ವಯಂಸೇವಕರಿಗೆ ನೀಡಿ ಕಳುಹಿಸಿದ್ದರು. ಶಿರೂರಿನಿಂದ ಮುಂದೆ ತೆರಳದೆ ಅನೀಶ್ ಹಿಂದೆ ಮರಳಿದ ಕಾರಣ ಆ ವೆಚ್ಚವನ್ನೂ ರಾಬಿನ್​ಗೇ ಹಿಂದಿರುಗಿಸಿರುವುದು ವಿಶೇಷ.

ಕೊವಿಡ್ ವಾರಿಯರ್ಸ್ ಸೇವೆ ಮರೆಯ ಲಾಗದು. ಸಕಾಲದಲ್ಲಿ ಔಷಧ ಸಿಕ್ಕಿದ್ದರಿಂದ ಮಗು ಆರೋಗ್ಯವಾಗಿದೆ.

| ರಾಬಿನ್ ಡಿಸೋಜ ಮಗುವಿನ ತಂದೆ

ವೇಣುವಿನೋದ್ ಕೆ.ಎಸ್

https://www.vijayavani.net/what-should-be-given-to-this-officer-to-be-granted-leave/