ದೂರದಿಂದಲೇ ಮನೆಯವರ ಜತೆ ಚಹಾ, ಮಾತುಕತೆ, ಇದು ಕರೊನಾ ವಾರಿಯರ್​ ವೈದ್ಯರ ಸ್ಥಿತಿ

ನವದೆಹಲಿ: ರಾಷ್ಟ್ರಾದ್ಯಂತ ಲಾಕ್​ಡೌನ್​ ಘೋಷಿಸಿರುವ ಹಿನ್ನೆಲೆಯಲ್ಲಿ ನಾವೆಲ್ಲರೂ ಮನೆಯೊಳಗೆ ಬಂದಿಗಳಾಗಿ, ಸುರಕ್ಷಿತವಾಗಿದ್ದರೆ, ತಮ್ಮ ಹಾಗೂ ತಮ್ಮ ಕುಟುಂಬದವರ ಸುರಕ್ಷತೆಯನ್ನು ಲೆಕ್ಕಿಸದ ವೈದ್ಯರು ನಿರಂತರವಾಗಿ ಕರೊನಾ ಪೀಡಿತರ ಸೇವೆಯಲ್ಲಿ ತೊಡಗಿದ್ದಾರೆ. ಬಿಡುವಾದಾಗ, ಕುಟುಂಬಸ್ಥರನ್ನು ನೋಡಬೇಕೆಂದರೂ ಅವರನ್ನು ಕರೊನಾ ವೈರಸ್​ ಸೋಂಕಿನ ಭೀತಿ ಬಿಟ್ಟುಬಿಡದಂತೆ ಕಾಡುತ್ತಿದೆ. ಹೀಗಾಗಿ ಹಲವು ವೈದ್ಯರು ಮನೆಗೆ ತೆರಳದೆ, ಸಿಕ್ಕ ಅವಕಾಶದಲ್ಲಿ ಸ್ವಲ್ಪ ವಿಶ್ರಾಂತಿ ಪಡೆದು, ಕರ್ತವ್ಯಕ್ಕೆ ಮರಳುತ್ತಿದ್ದಾರೆ.

ದೆಹಲಿಯ ಆಸ್ಪತ್ರೆಯೊಂದರಲ್ಲಿ ಕರೊನಾ ವಾರಿಯರ್​ ಆಗಿ ಕೋವಿಡ್​ 19 ಪೀಡಿತರ ಸೇವೆಯಲ್ಲಿ ತೊಡಗಿದ್ದ ವೈದ್ಯರೊಬ್ಬರಿಗೆ ಕುಟುಂಬಸ್ಥರನ್ನು ಭೇಟಿಯಾಗಬೇಕು ಎನಿಸಿತು. ಮನೆಗೆ ಹೋಗಿ ಪತ್ನಿ, ಮಕ್ಕಳನ್ನು ನೋಡಿ ಆರಾಮವಾಗಿ ಕುಳಿತು ಚಹಾ ಕುಡಿಯಬೇಕು ಎಂಬ ಬಯಕೆ ಮನದಲ್ಲಿ ಹುಟ್ಟಿತು.

ತಡಮಾಡದ ಅವರು ಮಂಗಳವಾರ ಆಸ್ಪತ್ರೆಯಿಂದ ಮನೆಗೆ ತೆರಳಿದರು. ಮನೆಯ ಗೇಟ್​ ಬಳಿ ಬರುತ್ತಲೇ ಕರೊನಾ ವೈರಸ್​ ಸೋಂಕಿನ ಭೀತಿ ಆವರಿಸಿತು. ತಕ್ಷಣವೇ ಗೇಟ್​ನಿಂದ ಅನತಿ ದೂರದಲ್ಲಿ ಕುಳಿತ ಅವರು, ಪತ್ನಿಗೆ ಹೇಳಿ ಚಹಾ ಮಾಡಿಸಿಕೊಂಡು ಕುಡಿದರು. ದೂರದಿಂದಲೇ ಮಕ್ಕಳೊಂದಿಗೆ ಮಾತನಾಡಿ ನಿರಾಳರಾಗಿ ಮತ್ತೆ ಕರ್ತವ್ಯಕ್ಕೆ ಮರಳಿದರು.

https://www.vijayavani.net/meet-this-cop-who-uses-his-horse-to-spread-awareness-about-covid-19/