ಕಲ್ಮಕಾರು ಪೇಟೆಯಿಂದ ಗುಳಿಕಾನ ಭಾಗಕ್ಕೆ ಸಂಪರ್ಕಿಸುವ ಸೇತುವೆ ಎರಡು ವರ್ಷದ ಹಿಂದಿನ ಮಳೆಗಾಲಕ್ಕೆ ಒಂದು ಭಾಗದ ಪಿಲ್ಲರ್ ಸಮೇತ ನೀರುಪಾಲಾಗಿ ಸಂಪರ್ಕ ಕಡಿತವಾಗಿತ್ತು. ಅಲ್ಲಿ ಮೋರಿ, ಮಣ್ಣು ಹಾಕಿ ತಾತ್ಕಾಲಿಕ ವ್ಯವಸ್ಥೆ ಅಂದು ಮಾಡಲಾಗಿತ್ತು. ಇದೀಗ ಮಳೆಗಾಲದಲ್ಲಿ ಜನ ಆತಂಕ ಪಡುತ್ತಲೇ ಇದ್ದಾರೆ. ಇನ್ನು ಹರಿಹರ ಪಲ್ಲತ್ತಡ್ಕ ಹಾಗೂ ಕೊಲ್ಲಮೊಗ್ರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಎರಡು ವರ್ಷಗಳ ಹಿಂದೆ ಸಂಭವಿಸಿದ ಪ್ರವಾಹದಲ್ಲಿ ಉಂಟಾದ ಹಾನಿಗೆ ಇಂದಿಗೂ ಪೂರ್ಣ ಪ್ರಮಾಣದ ಶಾಶ್ವತ ಪರಿಹಾರ ಸಿಕ್ಕಿಲ್ಲ. ಹಲವೆಡೆ ರಸ್ತೆ ಬದಿ ತಡೆಗೋಡೆ, ಸಂಪರ್ಕ ರಸ್ತೆ, ಸಂಪರ್ಕ ಸೇತುವೆ ಅಭಿವೃದ್ಧಿ ಆಗಬೇಕಿದೆ. ಕೆಲವೆಡೆ ಸಂಪರ್ಕ ಸೇತುವೆ ಕಾಮಗಾರಿಗಳು ಅರ್ಧದಲ್ಲಿವೆ. ಈ ಎಲ್ಲ ಬೇಡಿಕೆಗಳಿಗೆ ಸಂಬಂಧಿಸಿದವರು ಕೂಡಲೇ ಸ್ಪಂದಿಸಲಿ ಎಂದು ಊರವರು ಒತ್ತಾಯಿಸಿದ್ದಾರೆ.
