ಅಪರೂಪಕ್ಕೆ ಜಿಲ್ಲೆಗೆ ಆಗಮಿಸಿದ್ದ ಉಸ್ತುವಾರಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಅವರು ಮೊನ್ನೆ ಕೆಡಿಪಿ ಸಭೆಯಲ್ಲಿ ಕೇಂದ್ರ ಸರ್ಕಾರ ನರೇಗಾ ಯೋಜನೆಯ ಹಣ ಬಿಡುಗಡೆ ಮಾಡುತ್ತಿಲ್ಲ ಎಂದು ಅಪ್ಪಟ ಸುಳ್ಳು ಹೇಳಿದ್ದಾರೆ. ನಮ್ಮ ಶಾಸಕರು ಯಾರೂ ಆ ಸಭೆಯಲ್ಲಿ ಇರಲಿಲ್ಲ. ಈ ಹಿಂದೆ ಯುಪಿಎ ಸರ್ಕಾರ ಇರುವಾಗ ನರೇಗಾಕ್ಕೆ 33 ಸಾವಿರ ಕೋಟಿಯನ್ನು ಬಜೆಟ್ನಲ್ಲಿ ಘೋಷಿಸಿತ್ತು. ನರೇಂದ್ರ ಮೋದಿ ಸರ್ಕಾರ ಬಂದ ಬಳಿಕ ಕಳೆದ ವರ್ಷ ವಾರ್ಷಿಕ ಬಜೆಟ್ನಲ್ಲಿ 86 ಸಾವಿರ ಕೋಟಿ ರೂ. ಅನುದಾನ ನೀಡಲಾಗಿದೆ. ಅವರ ಸರ್ಕಾರ ಇರುವಾಗ ಕನಿಷ್ಠ ಕೂಲಿ 155 ರೂ. ಇತ್ತು. ಈಗ 380 ರೂ. ಇದೆ. ಅವರೇ ಉಸ್ತವಾರಿ ಆಗಿರುವ ಉಡುಪಿ ಜಿಲ್ಲೆಗೆ 2024-25ನೇ ಸಾಲಿಗೆ 7 ಲಕ್ಷ 93 ಸಾವಿರ ಮಾನವ ದಿನಗಳನ್ನು ಸೃಜಿಸಲಾಗಿದ್ದು, ಅದಕ್ಕೆ 51.50 ಕೋಟಿ ರೂ. ಕೂಲಿ ಹಣ ಬಿಡುಗಡೆ ಮಾಡಿದೆ. ಪ್ರಸಕ್ತ ಏಪ್ರಿಲ್, ಮೇ ಹಾಗೂ ಜೂನ್ ತಿಂಗಳಿಗೆ 6.21 ಕೋಟಿ ರೂ., ಬಿಡುಗಡೆ ಮಾಡಿದೆ. ಇದು ಕೇವಲ ಉಡುಪಿ ಜಿಲ್ಲೆಗೆ ಮಾತ್ರ. ಆಡಳಿತ ವೆಚ್ಚದಲ್ಲಿ ಶೇ.6 ಅನುದಾನ ಸಹ ಕೇಂದ್ರದಿಂದ ಬಿಡುಗಡೆ ಆಗಿಲ್ಲ ಎಂದಿದ್ದಾರೆ. ನಾನು ಗ್ರಾಮೀಣಾಭಿವೃದ್ಧಿ ಇಲಾಖೆಯ ಪ್ರ.ಕಾರ್ಯದರ್ಶಿ ಬಳಿ ವಿಚಾರಿಸಿದಾಗ ಕೇಂದ್ರದಿಂದ ಹಣ ಬಂದಿದ್ದಾಗಿ ತಿಳಿಸಿದ್ದಾರೆ. ಹೀಗಾಗಿ ಲಕ್ಷ್ಮೀಯವರೇ ಕೇಂದ್ರ ಸರ್ಕಾರ, ಸಂಸದರನ್ನು ಟೀಕಿಸುವ ಮೊದಲು ನಿಮ್ಮದೇ ಅಧಿಕಾರಿಗಳಲ್ಲಿ ವಿಚಾರಿಸಿ, ತಿಳಿದು ಮಾತನಾಡಿ ಎಂದು ಸಂಸದ ಪೂಜಾರಿ ಸಲಹೆ ನೀಡಿದರು.
