ವೈಜ್ಞಾನಿಕ ಲೋಕಕ್ಕೆ ಆದರ್ಶರಾದ ಸುನೀತಾ, ವಿಲ್ಮೋರ್...

Published on:

20 Mar 2025, 1:31 pm

ಹಿರಿಯ ಭೌತಶಾಸ್ತ್ರಜ್ಞ ಪ್ರೊ. ಡಾ. ಎ.ಪಿ. ಭಟ್ ಶ್ಲಾಘನೆ

ಜಿಲ್ಲಾ ನಾಗರಿಕ ಸಮಿತಿಯಿಂದ ಸಂಭ್ರಮಾಚರಣೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಆತಂಕಕಾರಿ ರೀತಿಯಲ್ಲಿ 286 ದಿನ ಆಕಾಶವಾಸದಲ್ಲಿದ್ದ ವಿಜ್ಞಾನಿಗಳಾದ ಸುನೀತಾ ವಿಲಿಯಮ್ಸ್, ಬುಚ್ ವಿಲ್ಮೋರ್ ಭೂಮಿಗೆ ಆಗಮಿಸಿದ್ದು, ಪ್ರಪಂಚದಾದ್ಯಂತ ಜನ ಸಂಭ್ರಮಿಸುತ್ತಿದ್ದಾರೆ. ಜೀರೋ ಗ್ರ್ಯಾವಿಟಿಯಲ್ಲಿ ಬದುಕಿ ಬಂದಿರುವುದು ಸಾಮಾನ್ಯ ಬೆಳವಣಿಗೆಯಲ್ಲ. ಅವರಿಬ್ಬರೂ ವೈಜ್ಞಾನಿಕ ಲೋಕಕ್ಕೆ ಹಾಗೂ ಅಧ್ಯಯನಕ್ಕೆ ಹೊಸ ಆದರ್ಶರಾಗಿದ್ದಾರೆ ಎಂದು ಹಿರಿಯ ಭೌತಶಾಸ್ತ್ರಜ್ಞ ಪ್ರೊ. ಡಾ. ಎ.ಪಿ. ಭಟ್ ಶ್ಲಾಘಿಸಿದರು.

ಬಾಹ್ಯಾಕಾಶದಿಂದ ಇಬ್ಬರೂ ಗಗನಯಾತ್ರಿಗಳು ಸುರಕ್ಷಿತವಾಗಿ ಮರಳಿದ ಹಿನ್ನೆಲೆಯಲ್ಲಿ ಉಡುಪಿಯ ಜಿಲ್ಲಾ ನಾಗರಿಕ ಸಮಿತಿ ಟ್ರಸ್ಟ್ ವತಿಯಿಂದ ಉಡುಪಿಯ ನೇತ್ರ ಜ್ಯೋತಿ ಕಾಲೇಜ್ ಆಫ್ ಫಿಸಿಯೊಥೆರಪಿಯಲ್ಲಿ ಮಾ.20ರಂದು ಸಂಜೆ ಆಯೋಜಿಸಿದ್ದ ಸಂಭ್ರಮಾಚರಣೆ ಹಾಗೂ ಅಭಿನಂದನಾ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಧರ್ಮದಿಂದ ಜ್ಞಾನ ವೃದ್ಧಿ

ಅಮೆರಿಕದ ನಾಸಾದಿಂದ ತೆರಳಿದ್ದ ಇಬ್ಬರು ಋಷಿಗಳು ಮತ್ತೆ ಭೂಮಿಗೆ ಬಂದಿದ್ದಾರೆ. ಮಾನಸಿಕ ದೈಹಿಕ ಮತ್ತು ಭೌತಿಕ ತಪಸ್ಸಿನಿಂದ ಅವರಿಗೆ ಈ ಸಾಧನೆ ಸಾಧ್ಯವಾಗಿದೆ. ಕೋಟ್ಯಂತರ ರೂ. ಖರ್ಚು ಮಾಡಿ ಎರಡು ಜೀವಗಳನ್ನು ಉಳಿಸಿದ ರೀತಿ ಪ್ರಪಂಚದಲ್ಲಿಯೇ ದೊಡ್ಡ ಮಾನವೀಯತೆಯಾಗಿ ಉಳಿದಿದೆ, ಮೆರೆದಿದೆ. ಸುನೀತಾ ಅವರೇ ಹೇಳಿದಂತೆ ಭಗವದ್ಗೀತೆ, ಉಪನಿಷತ್ ಹಾಗೂ ಗಣೇಶನ ಆರಾಧನೆಯಿಂದ ಸಮಗ್ರ ಜ್ಞಾನ ವೃದ್ಧಿಗೆ ಕಾರಣವಾಗಿದೆ. ಈ ಸಂದರ್ಭದಲ್ಲಿ ನಮಗೆ ಕಲ್ಪನಾ ಚಾವ್ಲಾ ನೆನಪಾಗುತ್ತಾರೆ. ವಿಜ್ಞಾನ ತಂತ್ರಜ್ಞಾನ ಎಷ್ಟೇ ಬೆಳೆದರೂ ಸಹ ಆತಂಕ ಇದ್ದೇ ಇರುತ್ತದೆ ಎಂದರು.

ಕಾಲೇಜಿನ ಮುಖ್ಯಸ್ಥ ಡಾ. ಕೃಷ್ಣಪ್ರಸಾದ, ಧಾರ್ಮಿಕ ಮುಖಂಡ ಕೃಷ್ಣ್ಣಮೂರ್ತಿ ಆಚಾರ್ಯ, ಡಾ. ಗೌರಿ ಪ್ರಭು, ಸಚಿನ ಶೇಟ್, ರಶ್ಮಿ ಕೃಷ್ಣಪ್ರಸಾದ, ತಾರಾಶ್ರೀಧರ, ದಯಾನಂದ ಇತರರಿದ್ದರು.

ಶುಭ ಕೋರಿದ ವಿದ್ಯಾರ್ಥಿನಿಯರು

ಉಡುಪಿ ಜಿಲ್ಲಾ ನಾಗರಿಕ ಸಮಿತಿ ಟ್ರಸ್ಟ್ನ ಸಂಚಾಲಕ ಹಾಗೂ ಸಮಾಜ ಸೇವಕ ನಿತ್ಯಾನಂದ ಒಳಕಾಡು ಕಾರ್ಯಕ್ರಮ ಆಯೋಜಿಸಿದ್ದರು. ಕಾಲೇಜಿನ ಮುಂಭಾಗದಲ್ಲಿ ಪಟಾಕಿ ಸಿಡಿಸಿ, ಗಗನಯಾತ್ರಿಗಳ ಸಾಧನೆ ಪ್ರೋತ್ಸಾಹಿಸಿ ಸಂಭ್ರಮಿಸಲಾಯಿತು. ಕಾಲೇಜಿನ ವಿದ್ಯಾರ್ಥಿನಿಯರು ಸುನೀತಾ ವಿಲಿಯಮ್ಸ್ ಅವರ ಭಾವಚಿತ್ರ ಹಿಡಿದು ಶುಭ ಕೋರಿದರು. ಗಗನಯಾತ್ರೆಯ ಸಾಹಸ, ತಾಂತ್ರಿಕ ಸಮಸ್ಯೆ, ವಿಜ್ಞಾನಿಗಳಿಗಾದ ತೊಂದರೆ ಮತ್ತು ಅಮೆರಿಕದ ನಾಸಾ ಸಂಸ್ಥೆ ಇಬ್ಬರು ಗಗನಯಾತ್ರಿಗಳನ್ನು ಸುರಕ್ಷಿತವಾಗಿ ಭೂಮಿಗೆ ಕರತಂದ ರೀತಿಯ ಬಗ್ಗೆ ಪ್ರೊ. ಎ.ಪಿ. ಭಟ್ ಸಮಗ್ರ ಮಾಹಿತಿ ನೀಡಿದರು.

Udupi