ಎಂಗೇಜ್​ ಆದ ಚಾಹಲ್​ಗೆ ವಿಶೇಷ ರೀತಿಯಲ್ಲಿ ಶುಭಾಶಯ ತಿಳಿಸಿದ ಸೆಹ್ವಾಗ್​, ರೋಹಿತ್​ ಶರ್ಮ

ನವದೆಹಲಿ: ಲಾಕ್​ಡೌನ್​ ಸಮಯದಲ್ಲಿ ವಿವಿಧ ತಮಾಷೆಯ ವಿಡಿಯೋಗಳ ಮೂಲಕ ಗಮನಸೆಳೆದಿದ್ದ ಟೀಮ್​ ಇಂಡಿಯಾ ಸ್ಪಿನ್ನರ್​ ಯಜುವೇಂದ್ರ ಚಾಹಲ್​ ಇದೀಗ ಅನ್​ಲಾಕ್​ ಸಮಯದಲ್ಲಿ ನಿಶ್ಚಿತಾರ್ಥದ ಮೂಲಕ ಸುದ್ದಿ ಮಾಡಿದ್ದಾರೆ. ಕೋರಿಯೋಗ್ರಾಫರ್​ ಧನಶ್ರೀ ಜತೆಗೆ ಸದ್ದಿಲ್ಲದೆ ನಿಶ್ಚಿತಾರ್ಥ ಮಾಡಿಕೊಂಡ ಚಾಹಲ್​ಗೆ ಟೀಮ್​ ಇಂಡಿಯಾ ಸಹ-ಆಟಗಾರ ರೋಹಿತ್​ ಶರ್ಮ ಮತ್ತು ಮಾಜಿ ಬ್ಯಾಟ್ಸ್​ಮನ್​ ವೀರೇಂದ್ರ ಸೆಹ್ವಾಗ್​ ವಿಶೇಷ ರೀತಿಯಲ್ಲಿ ಶುಭ ಹಾರೈಸಿದ್ದಾರೆ.

'ನಮ್ಮ ಕುಟುಂಬದ ಜತೆಗೆ ನಾವಿಬ್ಬರೂ ಯೆಸ್​ ಎಂದೆವು' ಎಂಬ ಕಮೆಂಟ್​ನೊಂದಿಗೆ ಶನಿವಾರ ನಿಶ್ಚಿತಾರ್ಥವನ್ನು ಪ್ರಕಟಿಸಿದ್ದ ಚಾಹಲ್​ಗೆ ರೋಹಿತ್​ ಶರ್ಮ ಕಾಲೆಳೆಯುತ್ತಲೇ ಶುಭಾಶಯ ತಿಳಿಸಿದ್ದಾರೆ. ಆರ್​ಸಿಬಿ ಅಟಗಾರ ಚಾಹಲ್​ 2050ರ ಐಪಿಎಲ್​ ವೇಳೆಗೆ ಹೇಗಿರಬಹುದು ಎಂಬ ಚಿತ್ರವನ್ನು ಪ್ರಕಟಿಸಿರುವ ರೋಹಿತ್​ ಶರ್ಮ, ನಿಶ್ಚಿತಾರ್ಥಕ್ಕೆ ಅಭಿನಂದನೆಗಳನ್ನು ತಿಳಿಸಿದ್ದಾರೆ.

ಇದನ್ನೂ ಓದಿ: ವೈದ್ಯೆ, ನೃತ್ಯ ಸಂಯೋಜಕಿ ಧನಶ್ರೀ ವರ್ಮ ಜತೆಗೆ ಲೆಗ್‌ಸ್ಪಿನ್ನರ್ ಯಜುವೇಂದ್ರ ಚಾಹಲ್ ನಿಶ್ಚಿತಾರ್ಥ

ಇನ್ನು ವೀರೇಂದ್ರ ಸೆಹ್ವಾಗ್​ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರ ಮೀಮ್ಸ್​ ಮೂಲಕ ಚಾಹಲ್​ಗೆ ಶುಭಾಶಯ ತಿಳಿಸಿದ್ದಾರೆ. 'ವಾಹ್​ ಯುಜಿ-ಚಾಹಲ್​, ಅಪ್ದಾ ಕೊ ಅವಸರ್​ ಮೈ ಬದಲ್​ ಡಾಲಾ, ಕಂಗ್ರಾಚುಲೇಷನ್ಸ್​' ಎಂದು ಸೆಹ್ವಾಗ್​ ಟ್ವೀಟಿಸಿದ್ದಾರೆ. ಈ ಮೂಲಕ ಚಾಹಲ್​ ಲಾಕ್​ಡೌನ್​ ಸಮಯವನ್ನು ಚೆನ್ನಾಗಿ ಬಳಸಿಕೊಂಡಿದ್ದಾರೆ ಎಂದು ಹೇಳಿದ್ದಾರೆ.

ಇಂಗ್ಲೆಂಡ್​ ಮಹಿಳಾ ಕ್ರಿಕೆಟ್​ ತಂಡದ ಬ್ಯಾಟುಗಾರ್ತಿ ಡೇನಿಯಲ್​ ವ್ಯಾಟ್​ ಕೂಡ ಚಾಹಲ್​ ನಿಶ್ಚಿತಾರ್ಥಕ್ಕೆ ಅಭಿನಂದನೆ ತಿಳಿಸಿದ್ದಾರೆ. ಚಾಹಲ್​ ಅವರ ಇನ್​ಸ್ಟಾಗ್ರಾಂ ಪೋಸ್ಟ್​ಗೆ ವ್ಯಾಟ್​, 'ಕಂಗ್ರಾಟ್ಸ್​ ಯೂಜಿ' ಎಂದು ಕಮೆಂಟ್​ ಹಾಕಿದ್ದಾರೆ. ಚಾಹಲ್​-ವ್ಯಾಟ್​ ಈ ಹಿಂದೆ ಸಾಮಾಜಿಕ ಜಾಲತಾಣಗಳಲ್ಲಿ ಪರಸ್ಪರ ಕಾಲೆಳೆಯುವ ಮೂಲಕ ಸುದ್ದಿಯಾಗಿದ್ದರು. ಆದರೆ ನಾವು ಎಂದೂ ಪರಸ್ಪರ ಭೇಟಿಯಾದದ್ದಿಲ್ಲ ಎಂದು ವ್ಯಾಟ್​ ಹೇಳಿಕೊಂಡಿದ್ದರು.