ಯೆಸ್​ ಬ್ಯಾಂಕ್​ ಗ್ರಾಹಕರಿಗೆ ಶುಭ ಸುದ್ದಿ; ಬ್ಯಾಂಕ್​ನ ಎಲ್ಲ ಸೇವೆಗಳೂ ಪ್ರಾರಂಭ, ಹಿರಿಯ ನಾಗರಿಕ ಗ್ರಾಹಕರಿಗೆ ಸಮಯ ಮಿತಿ ಹೆಚ್ಚಳ

ಮುಂಬೈ: ಆರ್​ಬಿಐ ವಿಧಿಸಿದ್ದ ತಾತ್ಕಾಲಿಕ ನಿಷೇಧವನ್ನು ಇಂದು (ಮಾ.18)ಸಂಜೆ 6ಗಂಟೆಗೆ ಹಿಂಪಡೆದ ಕೂಡಲೇ ಯೆಸ್​ ಬ್ಯಾಂಕ್​ ತನ್ನ ಎಲ್ಲ ಬ್ಯಾಂಕಿಂಗ್​ ಸೇವೆಗಳನ್ನೂ ಮರುಪ್ರಾರಂಭ ಮಾಡಿದೆ.

ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿದ್ದ ಯೆಸ್​ ಬ್ಯಾಂಕ್​ ಮೇಲೆ ಆರ್​ಬಿಐ ಮಾ.5ರಂದು ನಿಷೇಧ ಹೇರಿತ್ತು. ಆಡಳಿತ ಮಂಡಳಿಯನ್ನು ರದ್ದುಗೊಳಿಸಿತ್ತು. ಹಾಗೇ ಗ್ರಾಹಕರ ಹಣ ವಿತ್​ಡ್ರಾ ಮಿತಿಯನ್ನು 50 ಸಾವಿರ ರೂಪಾಯಿಗೆ ಮಿತಿಗೊಳಿಸಿತ್ತು.

ಮಾ.5ರಂದು ಹೇರಿದ್ದ ನಿಷೇಧ 30 ದಿನಗಳವರೆಗೆ ಇರಲಿದೆ ಎಂದು ಈ ಹಿಂದೆ ಆರ್​ಬಿಐ ಗವರ್ನರ್​ ಶಕ್ತಿಕಾಂತ ದಾಸ್ ತಿಳಿಸಿದ್ದರು. ಅದರ ಅನ್ವಯ ಏಪ್ರಿಲ್ 3ರವರೆಗೂ ನಿಷೇಧ ಇರಬೇಕಿತ್ತು. ಆದರೆ ಯೆಸ್​ ಬ್ಯಾಂಕ್​ನ ಪುನಶ್ಚೇತನಕ್ಕೆ ಎಸ್​ಬಿಐ ಆಸಕ್ತಿ ತೋರಿಸಿ, 7,250 ಕೋಟಿ ರೂಪಾಯಿ ಹೂಡಿಕೆ ಮಾಡುವುದಾಗಿ ಹೇಳಿದೆ. ಸಂಕಷ್ಟದಲ್ಲಿರುವ ಯೆಸ್​ಬ್ಯಾಂಕ್​ಗೆ ಎಸ್​ಬಿಐ ಆಸರೆಯಾಗಿ ನಿಲ್ಲುವ ಯೋಜನೆ ಹಾಕಿಕೊಂಡಿದ್ದರಿಂದ ಆರ್​ಬಿಐ ಹೇರಿದ್ದ ನಿಷೇಧವನ್ನು ಅವಧಿಗೂ ಮುಂಚಿತವಾಗಿಯೇ ಹಿಂಪಡೆದಿದೆ.

ಸದ್ಯ ಯೆಸ್​ಬ್ಯಾಂಕ್​ನ ಎಲ್ಲ ಸೇವೆಗಳೂ ಪ್ರಾರಂಭವಾಗಿದ್ದು, ಗ್ರಾಹಕರಿಗೆ ಲಭ್ಯವಿದೆ. ಮಾ.17ರಿಂದಲೇ ಬ್ಯಾಂಕ್​ ಗ್ರಾಹಕರ ಮೊಬೈಲ್​ಗಳಿಗೆ ಸಿಇಒ ಪ್ರಶಾಂತ್​ ಕುಮಾರ್ ಹೆಸರಿನಲ್ಲಿ ಮೆಸೇಜ್​ಗಳು ರವಾನೆಯಾಗುತ್ತಿದ್ದು, ಬ್ಯಾಂಕಿಂಗ್​ ಸೇವೆಗಳು ಪ್ರಾರಂಭ ಆಗುವ ಬಗ್ಗೆ ತಿಳಿಸಲಾಗುತ್ತಿತ್ತು.

ಯೆಸ್​ ಬ್ಯಾಂಕ್​ನ ಹಿರಿಯ ನಾಗರಿಕ ಗ್ರಾಹಕರಿಗಾಗಿ ಮಾ.19ರಿಂದ 27ರವರೆಗೆ ಬ್ಯಾಂಕ್​ನ ಸಮಯವನ್ನು 4.30 ರಿಂದ 5.30 ಗಂಟೆಗೆ ಏರಿಸಲಾಗುವುದು ಎಂದೂ ತಿಳಿಸಲಾಗಿದೆ. ಯೆಸ್​ಬ್ಯಾಂಕ್​ಗೆ ಸಂಬಂಧಪಟ್ಟ ನೆಟ್​ ಬ್ಯಾಂಕಿಂಗ್, ಆ್ಯಪ್​ಗಳು, ಯುಪಿಐ ಸೇವೆಗಳೂ ಕೂಡ ಪ್ರಾರಂಭವಾಗಿವೆ.(ಏಜೆನ್ಸೀಸ್​)

https://www.vijayavani.net/moratorium-on-yes-bank-to-be-lifted-on-wednesday-6-pm/

https://www.vijayavani.net/jasmin-price-down-corrona-effect/