ಷೇರುಪೇಟೆ ಪಲ್ಟಿ: ಕೊರೊನಾಗೆ ಕರಗಿದ ಸಂಪತ್ತು, 5 ನಿಮಿಷಕ್ಕೆ 5.50 ಲಕ್ಷ ಕೋಟಿ ರೂ. ನಷ್ಟ

ಮುಂಬೈ: ಚೀನಾದಲ್ಲಿ ಕಾಣಿಸಿಕೊಂಡ ಬಳಿಕ 35 ರಾಷ್ಟ್ರಗಳಿಗೆ ವ್ಯಾಪಿಸಿರುವ ಕರೊನಾ (ಕೋವಿಡ್-19) ಮಾರಿಯ ಆರ್ಭಟಕ್ಕೆ ವಿಶ್ವ ಆರ್ಥಿಕತೆಯಲ್ಲಿ ಕಂಪನ ಶುರುವಾಗಿರುವ ಬೆನ್ನಲ್ಲೇ ಶುಕ್ರವಾರ ಒಂದೇ ದಿನ ಕೇವಲ ಐದು ನಿಮಿಷದ ಅವಧಿಯಲ್ಲಿ ಭಾರತ ಷೇರು ಮಾರುಕಟ್ಟೆಯಲ್ಲಿ 5.50 ಲಕ್ಷ ಕೋಟಿ ರೂ. ಕರಗಿ ಹೋಗಿದೆ.

ಮುಂಬೈ ಷೇರುಪೇಟೆಯ ಸೆನ್ಸೆಕ್ಸ್​ನಲ್ಲಿ 1,448.37 (ಶೇ. 3.64) ಪಾಯಿಂಟ್​ಗಳ ಮಹಾಪತನವಾಗಿ ದಿನದ ವಹಿವಾಟಿನ ಅಂತ್ಯಕ್ಕೆ 38,297.29ಕ್ಕೆ ಇಳಿಕೆ ಕಂಡರೆ, ರಾಷ್ಟ್ರೀಯ ಷೇರುಪೇಟೆ ನಿಫ್ಟಿಯಲ್ಲಿ 431.55 (ಶೇ.3.71) ಅಂಶ ಕುಸಿತ ಕಂಡು 11,201.75ಕ್ಕೆ ಸ್ಥಿರಗೊಂಡಿದೆ. ಸೆನ್ಸೆಕ್ಸ್ ಈ ವಾರದ ಆರಂಭದಿಂದಲೂ ಇಳಿಮುಖವಾಗಿಯೇ ಇದ್ದು, 30 ಪ್ರಮುಖ ಕಂಪನಿಗಳ ಷೇರು ಮೌಲ್ಯ ಶುಕ್ರವಾರದ ಕರಡಿ ಕುಣಿತಕ್ಕೆ ತಲ್ಲಣಿಸಿದೆ. ಮಹಿಂದ್ರಾ ಆಂಡ್ ಮಹಿಂದ್ರಾ, ಟೆಕ್ ಮಹಿಂದ್ರಾ, ಟಾಟಾ ಸ್ಟೀಲ್, ಎಚ್​ಸಿಎಲ್ ಟೆಕ್, ಎಸ್​ಬಿಐ, ಬಜಾಜ್ ಫೈನಾನ್ಸ್ ಕಂಪನಿಗಳ ಷೇರು ಬೆಲೆ ಶೇ. 8.14ರಷ್ಟು ಇಳಿದಿದೆ. ಈ ಹಿಂಜರಿತದ ಮಧ್ಯೆಯೂ ಐಟಿಸಿ ಷೇರು ಮೌಲ್ಯ ಸ್ಥಿರವಾಗಿತ್ತು. ನಿಫ್ಟಿಯಲ್ಲಿ ಲೋಹ, ಮಾಧ್ಯಮ ವಲಯದ ಷೇರು ಮೌಲ್ಯ ತರಗೆಲೆಯಂತೆ ಉದುರಿತು. ಶೇ. 7.34ರಷ್ಟು ನಷ್ಟ ಅನುಭವಿಸಿತು.

ತಜ್ಞರ ವಾದವೇನು?: ಷೇರುಪೇಟೆಯ ಮಹಾಪತನಕ್ಕೆ ಕರೊನಾ ಜತೆಗೆ ಆರ್ಥಿಕ ಹಿಂಜರಿತ, ಸಿಎಎ, ಎನ್​ಆರ್​ಸಿ ಕುರಿತ ಪ್ರತಿಭಟನೆ, ಉದ್ಯಮಿಗಳಲ್ಲಿ ಉಂಟಾಗಿರುವ ಅಭದ್ರತೆಯ ಭಾವವೂ ಕಾರಣವಾಗಿದೆ ಎಂಬುದು ಷೇರುಪೇಟೆ ತಜ್ಞರ ಅಭಿಪ್ರಾಯ. ಕರೊನಾ ಸೋಂಕಿನ ಪರಿಣಾಮ ಜಾಗತಿಕ ರಫ್ತು ಪ್ರಮಾಣ ಭಾರಿ ಕುಸಿತವಾಗಿದೆ. ಪ್ರವಾಸೋದ್ಯಮಕ್ಕೂ ಹೊಡೆತ ಬಿದ್ದಿದೆ. ಕರೊನಾ ವೈರಸ್ ಸಾಂಕ್ರಾಮಿಕ ಸ್ವರೂಪ ಪಡೆಯುತ್ತಿದೆ. ಇದರಿಂದ ಜಾಗತಿಕ ಮಟ್ಟದಲ್ಲಿ ಷೇರುಪೇಟೆಯಲ್ಲಿ ಗಾಢಾಂಧಕಾರ ಉಂಟಾಗಿದೆ. ಇದು ಈ ವರ್ಷ ಪೂರ್ವಾರ್ಧದವರೆಗೂ ಮುಂದುವರಿಯುವ ಲಕ್ಷಣ ಗೋಚರಿಸುತ್ತಿದೆ ಎಂದು ಜಾಗತಿಕ ಆರ್ಥಿಕತೆ ರೇಟಿಂಗ್ ಸಂಸ್ಥೆ ಮೂಡಿ‘ಸ್ ಅಭಿಪ್ರಾಯಪಟ್ಟಿದೆ.

ಗಂಭೀರ ಸವಾಲು: ಚೀನಾಗೆ ಕರೊನಾ ವ್ಯಾಪಿಸಿದ ನಂತರ ಭಾರತದ ವಿವಿಧ ಕ್ಷೇತ್ರಗಳ ಮೇಲೆ ಗಂಭೀರ ಪರಿಣಾಮ ಉಂಟಾಗಿದೆ. ಭಾರತದಿಂದ ರಫ್ತಾಗುತ್ತಿದ್ದ ಹಾಗೂ ಚೀನಾದಿಂದ ಆಮದಾಗುತ್ತಿದ್ದ ವಸ್ತುಗಳ ಪೂರೈಕೆ ವ್ಯತ್ಯಯವಾಗಿ ವಿವಿಧ ಉದ್ದಿಮೆಗಳು ನೆಲಕಚ್ಚಿವೆ. ಇದೀಗ 35 ರಾಷ್ಟ್ರಗಳಿಗೆ ಮಹಾಮಾರಿ ಲಗ್ಗೆ ಇಟ್ಟಿರುವುದರಿಂದ ಭವಿಷ್ಯದಲ್ಲಿ ಮತ್ತಷ್ಟು ಪರಿಣಾಮ ಉಂಟಾಗುವ ಸಾಧ್ಯತೆ ದಟ್ಟವಾಗಿದೆ.

ಕುಸಿತಕ್ಕೆ ಕಾರಣ, ಪರಿಣಾಮ

• ಷೇರು ಮಾರಾಟಕ್ಕೆ ಮುಂದಾದ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು
• ಈಗಾಗಲೇ 9,380 ಕೋಟಿ ರೂ. ಮೌಲ್ಯದ ಷೇರು ಮಾರಾಟ
• ಉತ್ಪಾದನಾ ವಲಯದ ಮೇಲೆ ಗಂಭೀರ ಪರಿಣಾಮ
• ವಿವಿಧ ಕಂಪನಿಗಳಿಗೆ ಬಾಗಿಲು ಮುಚ್ಚುವ ಪರಿಸ್ಥಿತಿ
• ಉದ್ಯೋಗ ಕಡಿತದ ಆತಂಕ

ಯಾರಿಗೆ ಎಷ್ಟು ನಷ್ಟ?

• ರಿಲಯನ್ಸ್ ಇಂಡಸ್ಟ್ರಿಸ್, ಮುಕೇಶ್ ಅಂಬಾನಿ -5.09 ಬಿಲಿಯನ್ ಡಾಲರ್ (ಆರ್​ಐಎಲ್ ಷೇರು ಶೇ.11 ಇಳಿಕೆ)
• ಆದಿತ್ಯ ಬಿರ್ಲಾ ಗ್ರೂಪ್, ಕುಮಾರ್ ಮಂಗಳಂ ಬಿರ್ಲಾ -884 ಮಿಲಿಯನ್ ಡಾಲರ್
• ವಿಪ್ರೋ, ಅಜೀಮ್ ಪ್ರೇಮ್ ಜೀ-869 ಮಿ.ಡಾಲರ್ (ಒಟ್ಟು ಆಸ್ತಿ 17.4 ಬಿ.ಡಾಲರ್)
• ಅದಾನಿ ಗ್ರೂಪ್, ಗೌತಮ್ ಅದಾನಿ -496 ಮಿಲಿಯನ್ ಡಾಲರ್
• ಟಾಟಾ ಸನ್ಸ್​ನಲ್ಲಿ ಹೆಚ್ಚು ಷೇರು ಹೊಂದಿರುವ ಪಲ್ಲೊನ್​ಜಿ ಮಿಸ್ತ್ರಿ- 463 ಮಿಲಿಯನ್​ಡಾಲರ್
• ಕೊಟಕ್ ಸಮೂಹದ ಮುಖ್ಯಸ್ಥ ಉದಯ್ ಕೊಟಕ್- 126 ಮಿಲಿಯನ್ ಡಾಲರ್

ಜಿಡಿಪಿ ತುಸು ಏರಿಕೆ

2019-20ರ ಆರ್ಥಿಕ ಸಾಲಿನ ಅಕ್ಟೋಬರ್​ನಿಂದ ಡಿಸೆಂಬರ್​ವರೆಗಿನ ಮೂರನೇ ತ್ರೖೆಮಾಸಿಕದಲ್ಲಿ ದೇಶಿಯ ಒಟ್ಟು ಉತ್ಪನ್ನ ದರ (ಜಿಡಿಪಿ) ಶೇ. 0.2 ಸುಧಾರಿಸಿದ್ದು, ಶೇ. 4.07ಕ್ಕೆ ಸ್ಥಿರಗೊಂಡಿದೆ. ಎರಡನೇ ತ್ರೖೆಮಾಸಿಕದಲ್ಲಿ ಇದು ಶೇ. 4.5ಕ್ಕೆ ಕುಸಿದು ಆತಂಕಕ್ಕೆ ಕಾರಣವಾಗಿತ್ತು. ಅಂತಿಮ ಮೂರು ತಿಂಗಳಲ್ಲಿ ಜಿಡಿಪಿ ಶೇ. 5ಕ್ಕೆ ತಲುಪುವ ನಿರೀಕ್ಷೆಯನ್ನು ಸರ್ಕಾರ ಹೊಂದಿದೆ.

ಸೆನ್ಸೆಕ್ಸ್ 1,448, ನಿಫ್ಟಿ 431 ಅಂಶ ಪತನ ಯಾವ ಕ್ಷೇತ್ರಗಳಿಗೆ ಸಂಕಷ್ಟ

• ಎಲೆಕ್ಟ್ರಾನಿಕ್ಸ್, ಗೃಹ ಬಳಕೆ ವಸ್ತುಗಳು
• ಗ್ರಾನೈಟ್ ಉದ್ಯಮ
• ಕೋಳಿ ಮಾಂಸ ಮಾರಾಟ ಶೇ.50 ಕುಸಿತ
• ವಾಹನ ಹಾಗೂ ಆಹಾರ ಉತ್ಪನ್ನಗಳು