ತಾಲೂಕಿನ ಬಲ್ಲಟಗಿ ಗ್ರಾಮದ ಯುವಕ ರವಿ ಪಾಟೀಲ್ 2015ರಲ್ಲಿ ಇಂಜಿನಿಯರಿಂಗ್ ಮುಗಿಸಿ ಬಿಇಎಲ್ನಲ್ಲಿ 7-8 ತಿಂಗಳು ಗುತ್ತಿಗೆದಾರರಾಗಿ ಕೆಲಸ ಮಾಡಿದರು. ಆ ಕೆಲಸ ಸರಿ ಹೋಗದೆ ಕೃಷಿಯಲ್ಲಿ ಏನಾದರೂ ಸಾಧನೆ ಮಾಡಬೇಕು ಎಂದು ಗ್ರಾಮಕ್ಕೆ ಆಗಮಿಸಿದರು. ಎಕರೆ ಹೊಲದಲ್ಲಿ ಪೇರಲ ಬೆಳೆಯಲು ನಿರ್ಧಾರ ಮಾಡಿ, ಈಗ ತಿಂಗಳಿಗೆ 70 ರಿಂದ 1 ಲಕ್ಷ ರೂ.ವರೆಗೆ ಲಾಭ ಪಡೆಯುತ್ತಿದ್ದಾರೆ. ತೈವಾನ್ ತಳಿಯ ಪೇರಲ ಗಿಡಗಳನ್ನು ಎಕರೆ ಹೊಲದಲ್ಲಿ 2 ಲಕ್ಷ ರೂ. ಖರ್ಚು ಮಾಡಿ 900ಕ್ಕೂ ಹೆಚ್ಚು ಸಸಿಗಳನ್ನು ನಾಟಿ ಮಾಡಿದ್ದಾರೆ. ಸಸಿ ನಾಟಿಯಾದ ಎಂಟು ತಿಂಗಳಲ್ಲಿ ಫಲ ನೀಡಲು ಆರಂಭಿಸಿದೆ. ವರ್ಷದಲ್ಲಿ 7-8 ತಿಂಗಳು ಫಲ ನೀಡುವ ಪೇರಲ, ತಿಂಗಳಿಗೆ 70 ರಿಂದ 1 ಲಕ್ಷ ರೂ.ವರೆಗೆೆ ಲಾಭ ಪಡೆಯುತ್ತಿದ್ದಾರೆ. ಬೆಳೆದ ಪೇರಲ ಹೊಲದಲ್ಲೆ ಮಾರಾಟವಾಗುತ್ತಿದೆ. ಬಿಡಿ ವ್ಯಾಪಾರಸ್ಥರು ತೋಟಕ್ಕೆ ಬಂದು ಹಣ್ಣುಗಳನ್ನು ಕೊಳ್ಳುತ್ತಿದ್ದಾರೆ. ಮೊದಲ ವರ್ಷ 30-40 ಸಾವಿರ ಲಾಭ ತಂದು ಕೊಟ್ಟಿರುವ ಪೇರಲ ಈ ವರ್ಷ ಅಧಿಕ ಲಾಭ ತರಲಿದೆ. ಪ್ರತಿದಿನ 2 ಕ್ವಿಂಟಲ್ ಪೇರಲ ಮಾರಾಟವಾಗುತ್ತಿದೆ. ಕೆಜಿಗೆ 30 ರೂ. ನಂತೆ ವ್ಯಾಪಾರಸ್ಥರು ತೋಟಕ್ಕೆ ಬಂದು ತೆಗೆದುಕೊಳ್ಳುತ್ತಿದ್ದಾರೆ ಎನ್ನುತ್ತಾರೆ ರೈತ ರವಿ ಪಾಟೀಲ್. ಒಂದು ಎಕರೆಯಲ್ಲಿ ಬೆಳೆದ ಪೇರಲ ಗಿಡಗಳಿಗೆ ಕೊಳವೆ ಬಾವಿಯಿಂದ ಹನಿ ನೀರಾವರಿ ಮೂಲಕ ಬೆಳೆಸುತ್ತಿದ್ದಾರೆ.
