ಹೂಡಿಕೆಯಲ್ಲಿ ಯುವೋತ್ಸಾಹ

ಸಂಬಳ ಕೈಸೇರಿದ ತಕ್ಷಣ ‘ಎಫ್​ಡಿ ಇಡು, ಪೋಸ್ಟ್ ಆಫೀಸ್ ಸೇವಿಂಗ್ಸ್ ಮಾಡು, ಚಿನ್ನ ಖರೀದಿಸು’ ಎನ್ನುತ್ತಿದ್ದ ಜಮಾನಾ ಮುಗಿಯಿತು. ‘ಷೇರುಪೇಟೆ ಅಂದ್ರೆ ಬರೀ ಜೂಜು’ ಎಂಬ ಎಚ್ಚರಿಕೆಯ ಮಾತೂ ಹಳತಾಯಿತು. ಇಂದಿನ ಜೆನ್​ಜೀ ಮತ್ತು ಮಿಲೇನಿಯಲ್ ಪಡೆ, ತನ್ನ ಬಳಿ ಇರುವ ಕಡಿಮೆ ದುಡ್ಡಿನಲ್ಲೇ ಕೋಟಿಗಳ ಸಾಮ್ರಾಜ್ಯ ಕಟ್ಟಲು ಮುಂದಾಗಿದೆ. ಕೈಯಲ್ಲಿರುವ ಸ್ಮಾರ್ಟ್​ಫೋನ್ ಮೂಲಕವೇ ಬಂಡವಾಳ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಬರೀ ಹಣ ಉಳಿಸಿದರೆ ಪ್ರಯೋಜನವಿಲ್ಲ, ಆ ಹಣದಿಂದ ಮತ್ತಷ್ಟು ಹಣ ಗಳಿಸುವುದು ಹೇಗೆ ಎಂಬ ಸೂಕ್ಷ್ಮವನ್ನು ಯುವಪಡೆ ಕರಗತ ಮಾಡಿಕೊಳ್ಳುತ್ತಿದೆ. ರಿಸ್ಕುಗಳೇ ರಿವಾರ್ಡ್ ಆಗಿ ಆರ್ಥಿಕ ಸ್ವಾತಂತ್ರ್ಯಕ್ಕೆ ನಾಂದಿ ಹಾಡುತ್ತಿವೆ.

30ರೊಳಗಿನವರೇ ಹೆಚ್ಚು: ಸೆಬಿ (ಸೆಕ್ಯುರಿಟೀಸ್ ಆಂಡ್ ಎಕ್ಸ್ ಚೇಂಜ್ ಬೋರ್ಡ್) ಮತ್ತು ಎನ್​ಎಸ್​ಇ (ನ್ಯಾಷನಲ್ ಸ್ಟಾಕ್ ಎಕ್ಸ್​​ಚೇಂಜ್) ಇತ್ತೀಚೆಗೆ ಬಿಡುಗಡೆ ಮಾಡಿರುವ ಅಂಕಿಅಂಶಗಳ ಪ್ರಕಾರ, ಮಾರುಕಟ್ಟೆಗೆ ಹೊಸದಾಗಿ ಕಾಲಿಡುತ್ತಿರುವ ಹೂಡಿಕೆದಾರರಲ್ಲಿ ಶೇ. 50ಕ್ಕೂ ಹೆಚ್ಚು ಮಂದಿ 30 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು.

ಎಸ್​ಐಪಿ ಎಂಬ ಮಾಸಿಕ ಹಬ್ಬ: ಅಸೋಸಿಯೇಷನ್ ಆಫ್ ಮ್ಯೂಚುವಲ್ ಫಂಡ್ಸ್ ಇನ್ ಇಂಡಿಯಾ (ಎಎಂಎಫ್​ಐ) ಡೇಟಾ ಪ್ರಕಾರ, ದೇಶದಲ್ಲಿ ಮಾಸಿಕ ಎಸ್​ಐಪಿ ಹರಿವು ತಿಂಗಳಿಗೆ 23,000ದಿಂದ 25,000 ಕೋಟಿ ರೂ.ಗಳ ಹೊಸ ಎತ್ತರ ತಲುಪಿದೆ. ಇದರಲ್ಲಿ ಗಣನೀಯ ಪಾಲು ಕಾಲೇಜು ಮುಗಿಸಿ ವೃತ್ತಿಜೀವನ ಆರಂಭಿಸಿರುವ 20ರಿಂದ 28 ವರ್ಷದ ಯುವಕರದ್ದಾಗಿದೆ.

2, 3ನೇ ಸ್ತರದ ನಗರಗಳ ಪ್ರಾಬಲ್ಯ: ಮುಂಬೈ, ಬೆಂಗಳೂರು, ದೆಹಲಿಯಂತಹ ದೊಡ್ಡ ನಗರಗಳು ಮಾತ್ರವಲ್ಲದೆ ಹುಬ್ಬಳ್ಳಿ, ಮೈಸೂರು, ಜೈಪುರ, ಇಂದೋರ್, ಕೊಯಮತ್ತೂರಿನಂತಹ 2-3ನೇ ಸ್ತರದ ನಗರಗಳಿಂದ ಶೇ. 45ಕ್ಕೂ ಹೆಚ್ಚು ಹೊಸ ಯುವ ಹೂಡಿಕೆದಾರರು ಮಾರುಕಟ್ಟೆಗೆ ಲಗ್ಗೆ ಇಡುತ್ತಿದ್ದಾರೆ.

ಆಧಾರ್, ಯುಪಿಐ ಕಮಾಲ್: ಆಧಾರ್ ಆಧಾರಿತ ಇ-ಕೆವೈಸಿ ಬಂದ ಮೇಲೆ ಕೇವಲ 5 ನಿಮಿಷಗಳಲ್ಲಿ ಡಿಮ್ಯಾಟ್ ಖಾತೆ ತೆರೆಯಬಹುದು. ಯುಪಿಐ ಮೂಲಕ ಆನ್​ಲೈನ್ ಶಾಪಿಂಗ್ ಮಾಡಿದಷ್ಟೇ ಸುಲಭವಾಗಿ ಕ್ಷಣಾರ್ಧದಲ್ಲಿ ಹೂಡಿಕೆ ಮಾಡಬಹುದು.

100ರ ಎಸ್​ಐಪಿ: ಪಾಕೆಟ್ ಮನಿಯಲ್ಲೇ ತಿಂಗಳಿಗೆ ನೂರು ರೂ.ನಷ್ಟು ಕಡಿಮೆ ಮೊತ್ತವನ್ನು ಹೂಡಿಕೆ ಮಾಡುವ ಸೌಲಭ್ಯವು ವಿದ್ಯಾರ್ಥಿಗಳನ್ನೂ ಹೂಡಿಕೆದಾರರನ್ನಾಗಿ ಮಾಡಿದೆ.

ಬಳಕೆದಾರಸ್ನೇಹಿ ಇಂಟರ್​ಫೇಸ್: ಸಂಕೀರ್ಣ ಗ್ರಾಫ್​ಗಳು, ಕ್ಲಿಷ್ಟಕರ ಬ್ಯಾಲೆನ್ಸ್ ಶೀಟ್​ಗಳನ್ನು ಸರಳೀಕರಿಸಿ, ಮೊಬೈಲ್ ಗೇಮ್ ಆಡಿದಷ್ಟೇ ಸುಲಭವಾಗಿ ಪೋರ್ಟ್​ಫೋಲಿಯೋ ನಿರ್ವಹಿಸುವ ತಂತ್ರಜ್ಞಾನ ಯುವಜನರನ್ನು ಆಕರ್ಷಿಸಿದೆ.

ಹಿಂದೆ ಹಣಕಾಸು ಜ್ಞಾನ ಸಿಎ ಓದಿದವರಿಗೆ ಅಥವಾ ಬ್ಯಾಂಕರ್​ಗಳಿಗೆ ಸೀಮಿತವಾಗಿತ್ತು. ಈಗ ಯುಟ್ಯೂಬ್, ಇನ್​ಸ್ಟಾಗ್ರಾಂ ರೀಲ್ಸ್ ಮತ್ತು ಪಾಡ್​ಕಾಸ್ಟ್​ಗಳು ಆರ್ಥಿಕ ಸಾಕ್ಷರತೆಯನ್ನು ಜನಸಾಮಾನ್ಯರ ಮನೆಬಾಗಿಲಿಗೆ ತಂದಿವೆ.

ಸರಳ ಹಣಕಾಸು ಪಾಠಗಳು: ಫಿನ್​ಫ್ಲುಯೆನ್ಸರ್​ಗಳು ಚಕ್ರಬಡ್ಡಿಯ ಶಕ್ತಿ (ಪವರ್ ಆಫ್ ಕಂಪೌಂಡಿಂಗ್), ಇಂಡೆಕ್ಸ್ ಫಂಡ್​ಗಳ ಮಹತ್ವ, ಪ್ರೖೆಸ್ ಟು ಅರ್ನಿಂಗ್ಸ್ (ಪಿ/ಇ) ರೇಷಿಯೋ ಮುಂತಾದ ವಿಷಯಗಳನ್ನು 60 ಸೆಕೆಂಡಿನ ರೀಲ್ಸ್​ಗಳಲ್ಲಿ ‘ಯುವಕರ ಭಾಷೆ’ಯಲ್ಲೇ ವಿವರಿಸುತ್ತಿದ್ದಾರೆ.

ಫೈರ್ ಪರಿಕಲ್ಪನೆ: ಫೈನಾನ್ಷಿಯಲ್ ಇಂಡಿಪೆಂಡೆನ್ಸ್, ರಿಟೈರ್ ಅರ್ಲಿ- (ಎಫ್​ಐಆರ್​ಇ- ಫೈರ್- ಆರ್ಥಿಕ ಸ್ವಾವಲಂಬನೆ, ಶೀಘ್ರ ನಿವೃತ್ತಿ) ಎಂಬುದು ಇಂದಿನ ಯುವಕರ ಧ್ಯೇಯವಾಗಿದೆ. 60 ವರ್ಷದವರೆಗೆ ಆಫೀಸಿನಲ್ಲಿ ಬೆವರು ಸುರಿಸುವ ಬದಲು, 35 ಅಥವಾ 40 ವರ್ಷಕ್ಕೆ ನಿವೃತ್ತಿ ಪಡೆದು ಜಗತ್ತನ್ನು ಸುತ್ತಬೇಕು ಎಂಬ ಕನಸು, 22ನೇ ವಯಸ್ಸಿನಿಂದಲೇ ಶಿಸ್ತಿನಿಂದ ಹೂಡಿಕೆ ಮಾಡಲು ಪ್ರೇರೇಪಿಸುತ್ತಿದೆ.

ಎಫ್ ಆಂಡ್ ಒ ಎಂಬ ಸುಳಿ: ಸೆಬಿ ನಡೆಸಿದ ಅಧ್ಯಯನದ ಪ್ರಕಾರ, ಈಕ್ವಿಟಿ ಫ್ಯೂಚರ್ಸ್ ಮತ್ತು ಆಪ್ಷನ್ಸ್ ವಿಭಾಗದಲ್ಲಿ ಟ್ರೇಡಿಂಗ್ ಮಾಡುವ ಶೇ. 90ಕ್ಕೂ ಹೆಚ್ಚು ಹೂಡಿಕೆದಾರರು ನಷ್ಟ ಅನುಭವಿಸುತ್ತಿದ್ದಾರೆ. ಅವರಲ್ಲಿ 30 ವರ್ಷದೊಳಗಿನ ಯುವಕರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ರಾತ್ರೋರಾತ್ರಿ ಶ್ರೀಮಂತರಾಗುವ ಆಸೆಗೆ ಬಿದ್ದು, ಸಾಲ ಮಾಡಿ ಆಪ್ಷನ್ ಟ್ರೇಡಿಂಗ್​ನಲ್ಲಿ ಲಕ್ಷಾಂತರ ರೂ. ಕಳೆದುಕೊಳ್ಳುತ್ತಿರುವ ಪ್ರಕರಣಗಳು ಹೆಚ್ಚುತ್ತಿವೆ.

ಫೋಮೋ (ಫಿಯರ್ ಆಫ್ ಮಿಸ್ಸಿಂಗ್ ಔಟ್): ಸ್ನೇಹಿತನೊಬ್ಬ ನಿರ್ದಿಷ್ಟ ಪೆನ್ನಿ ಸ್ಟಾಕ್ ಅಥವಾ ಕ್ರಿಪ್ಟೋಕರೆನ್ಸಿಯಲ್ಲಿ ದುಪ್ಪಟ್ಟು ಲಾಭ ಗಳಿಸಿದನೆಂದು ಕೇಳಿ, ಮೂಲಭೂತ ಅಂಶಗಳನ್ನು ಪರಿಶೀಲಿಸದೆ ಕಣ್ಮುಚ್ಚಿ ಹಣ ಸುರಿಯುವ ಪ್ರವೃತ್ತಿ ಅಪಾಯಕಾರಿಯಾಗಿದೆ.

ಅನಧಿಕೃತ ಸಲಹೆಗಾರರ ವಂಚನೆ: ‘ದಿನಕ್ಕೆ 10,000 ಗಳಿಸಿ’ ಎಂದು ಸಾಮಾಜಿಕ ಜಾಲತಾಣಗಳ ಮೂಲಕ ಆಮಿಷವೊಡ್ಡುವ, ನೋಂದಣಿಯಾಗದ ನಕಲಿ ಟ್ರೇಡಿಂಗ್ ಟೆಲಿಗ್ರಾಂ ಚಾನೆಲ್​ಗಳಿಗೆ ಬಲಿಯಾಗುತ್ತಿರುವ ಯುವಕರ ಸಂಖ್ಯೆ ಕಡಿಮೆಯೇನಿಲ್ಲ.

ಇನ್ನೊಂದು ಮುಖ ಅರಿಯದ ತಲೆಮಾರು: 2020ರ ಕರೊನಾ ಕುಸಿತದ ನಂತರ ಮಾರುಕಟ್ಟೆ ಸತತವಾಗಿ ಏರುಗತಿಯಲ್ಲೇ ಸಾಗಿದೆ. ಈ ಅವಧಿಯಲ್ಲಿ ಪ್ರವೇಶಿಸಿದ ಬಹುತೇಕ ಯುವಕರು ‘ಬುಲ್ ಮಾರ್ಕೆಟ್’ ಮಾತ್ರ ನೋಡಿದ್ದಾರೆ. 2008ರಂತಹ ಭಾರಿ ಕುಸಿತ ಅಥವಾ ದೀರ್ಘಕಾಲದ ಬೇರ್ ಮಾರ್ಕೆಟ್​ಅನ್ನು ಅವರಿನ್ನೂ ಅನುಭವಿಸಿಲ್ಲ. ಮಾರುಕಟ್ಟೆ ನಿರಂತರವಾಗಿ ಕುಸಿದಾಗ ತಾಳ್ಮೆ ಕಾಯ್ದುಕೊಳ್ಳುವುದು ಈ ಪೀಳಿಗೆಗೆ ನಿಜವಾದ ಅಗ್ನಿಪರೀಕ್ಷೆ.

ತುರ್ತು ನಿಧಿ ಮೊದಲು: ಷೇರುಪೇಟೆಗೆ ಕಾಲಿಡುವ ಮುನ್ನ ಕನಿಷ್ಠ 6 ತಿಂಗಳ ಖರ್ಚಿಗೆ ಬೇಕಾಗುವಷ್ಟು ಹಣವನ್ನು ಉಳಿತಾಯ ಖಾತೆ ಅಥವಾ ಲಿಕ್ವಿಡ್ ಫಂಡ್​ನಲ್ಲಿ ಇರಿಸಿಕೊಳ್ಳಬೇಕು.

ಆರೋಗ್ಯ, ಜೀವವಿಮೆ ಕಡ್ಡಾಯ: ಕುಟುಂಬಕ್ಕೆ ಆರ್ಥಿಕ ಭದ್ರತೆ ನೀಡಲು ಟಮ್ರ್ ಇನ್ಶೂರೆನ್ಸ್ ಮತ್ತು ಆರೋಗ್ಯ ವಿಮೆ ಅತ್ಯಗತ್ಯ.

ಸಟ್ಟಾ ವ್ಯಾಪಾರ ಬೇಡ: ಇಂಟ್ರಾಡೇ ಅಥವಾ ಆಪ್ಷನ್ ಟ್ರೇಡಿಂಗ್​ನಂತಹ ಊಹಾತ್ಮಕ ವಹಿವಾಟುಗಳಿಂದ ದೂರವಿದ್ದು, ಬಲಿಷ್ಠ ಕಂಪನಿಗಳ ಷೇರುಗಳಲ್ಲಿ ಅಥವಾ ಲಾರ್ಜ್ ಕ್ಯಾಪ್/ ಫ್ಲೆಕ್ಸಿಕ್ಯಾಪ್ ಮ್ಯೂಚುವಲ್ ಫಂಡ್​ಗಳಲ್ಲಿ ಹೂಡಿಕೆ ಮಾಡಬೇಕು.

ತಾಳ್ಮೆ, ಶಿಸ್ತು: ಮಾರುಕಟ್ಟೆಯ ಏರಿಳಿತಗಳಿಗೆ ಹೆದರದೆ, ಪ್ರತಿ ತಿಂಗಳು ಸತತವಾಗಿ ಎಸ್​ಐಪಿ ಮುಂದುವರಿಸುವ ಶಿಸ್ತು ಬೆಳೆಸಿಕೊಳ್ಳಬೇಕು. ಚಕ್ರಬಡ್ಡಿಯ ನಿಜವಾದ ಮ್ಯಾಜಿಕ್ ಕಾಣಲು ಕನಿಷ್ಠ 7ರಿಂದ 10 ವರ್ಷ ಬೇಕು.