ಟ್ರಂಪ್ ಹೇಳಿಕೆಯಿಂದ ಮಾರುಕಟ್ಟೆಯಲ್ಲಿ ಭಾರಿ ಕುಸಿತ: ಬೆಂಕಿಯಾದ ಕಚ್ಚಾ ತೈಲ, ರಕ್ತಪಾತದ ಹಾದಿಯಲ್ಲಿ ಸೂಚ್ಯಂಕ! Stock Market

Stock Market : ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್ ಚದುರಂಗದಾಟಕ್ಕೆ ಜಾಗತಿಕ ಷೇರು ಮಾರುಕಟ್ಟೆ ತಲ್ಲಣಗೊಳ್ಳುತ್ತಿದೆ. ನಿನ್ನೆಯಷ್ಟೇ ಟ್ರಂಪ್​ ಯುದ್ಧ ನಿಲ್ಲಿಸುವ ಮಾತುಗಳನ್ನಾಡಿದ ಬೆನ್ನಲ್ಲೇ ಸ್ಟಾಕ್​ ಮಾರ್ಕೆಟ್​ ಭರ್ಜರಿ ಚೇತರಿಕೆ ಕಂಡಿತು. ಇದೀಗ ತಮ್ಮ ವರಸೆ ಬದಲಿಸಿರುವ ಟ್ರಂಪ್​, ಇರಾನ್​ಗೆ ಮತ್ತೆ ದಾಳಿಯ ಎಚ್ಚರಿಕೆ ನೀಡಿದ್ದಾರೆ. ಅದರ ಪರಿಣಾಮ ಷೇರು ಮಾರುಕಟ್ಟೆ ಇಂದಿನ (ಏಪ್ರಿಲ್​ 02) ಆರಂಭಿಕ ವಹಿವಾಟುವಿನಲ್ಲಿ ಭಾರಿ ಕುಸಿತದೊಂದಿಗೆ ಆರಂಭಿಸಿದೆ. 

ಇಂದು ಬೆಳಗ್ಗೆ 9.16ರ ಸುಮಾರಿಗೆ ಬಿಎಸ್​ಇ ಸೆನ್ಸೆಕ್ಸ್​ ಸುಮಾರು 1,385.82 ಪಾಯಿಂಟ್‌ಗಳಷ್ಟು ಅಥವಾ ಶೇ. 1.89 ರಷ್ಟು ಕುಸಿದು 71,748.50 ಕ್ಕೆ ತಲುಪಿದರೆ, ನಿಫ್ಟಿ 50 ಕೂಡ 426.40 ಪಾಯಿಂಟ್‌ಗಳಷ್ಟು ಅಥವಾ ಶೇ. 1.88 ರಷ್ಟು ಕುಸಿದು 22,253.00 ಕ್ಕೆ ತಲುಪಿತು. 

ಇಂದಿನ ಆರಂಭಿಕ ವಹಿವಾಟಿನಲ್ಲಿ ಸುಮಾರು 566 ಷೇರುಗಳು ಮುನ್ನಡೆ ಸಾಧಿಸಿದರೆ, 1823 ಷೇರುಗಳು ಕುಸಿದವು ಮತ್ತು 130 ಷೇರುಗಳು ಯಾವುದೇ ಬದಲಾವಣೆಯಾಗದೇ ಯಥಾಸ್ಥಿತಿ ಕಾಯ್ದುಕೊಂಡವು. ಮಾರುಕಟ್ಟೆಯ ಬಹುತೇಕ ವಲಯಗಳಲ್ಲಿ ಮಾರಾಟದ ಒತ್ತಡ ಕಂಡುಬಂದಿದೆ. ವಿಶೇಷವಾಗಿ ಸಾರ್ವಜನಿಕ ವಲಯದ ಬ್ಯಾಂಕ್‌ಗಳು (PSU Banks), ಲೋಹ ಮತ್ತು ಹಣಕಾಸು ವಲಯದ ಷೇರುಗಳು ಹೆಚ್ಚಿನ ನಷ್ಟ ಅನುಭವಿಸಿವೆ. ಪ್ರಮುಖವಾಗಿ ಎನ್‌ಟಿಪಿಸಿ ಮತ್ತು ಸನ್ ಫಾರ್ಮಾ ಅತಿ ಹೆಚ್ಚು ನಷ್ಟ ಕಂಡ ಷೇರುಗಳ ಪಟ್ಟಿಯಲ್ಲಿದ್ದರೆ, ಮಾರುಕಟ್ಟೆಯ ಈ ಇಳಿಮುಖದ ಹಾದಿಯಲ್ಲೂ ಟ್ರೆಂಡ್, ಇಂಡಿಗೋ ಮತ್ತು ಬೆಲ್ ನಂತಹ ಕೆಲವು ಷೇರುಗಳು ಅಲ್ಪ ಲಾಭವನ್ನು ದಾಖಲಿಸುವ ಮೂಲಕ ಗಮನ ಸೆಳೆದಿವೆ.

ಇಂದು ಷೇರು ಮಾರುಕಟ್ಟೆಯ ಆರಂಭಿಕ ವಹಿವಾಟಿನಲ್ಲಿ ಹೂಡಿಕೆದಾರರ ಸಂಪತ್ತಿನಲ್ಲಿ ಸುಮಾರು 10 ಲಕ್ಷ ಕೋಟಿಯಿಂದ 15 ಲಕ್ಷ ಕೋಟಿಗೂ ಅಧಿಕ ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ.

ಇರಾನ್ ವಿರುದ್ಧದ ಯುದ್ಧವನ್ನು ಕೊನೆಗೊಳಿಸಲು ಯಾವುದೇ ಸ್ಪಷ್ಟ ಯೋಜನೆಯನ್ನು ನೀಡದ ಟ್ರಂಪ್, ಮುಂದಿನ ಎರಡು-ಮೂರು ವಾರಗಳಲ್ಲಿ ಅಮೆರಿಕವು ಇರಾನ್ ಮೇಲೆ "ಅತ್ಯಂತ ಕಠಿಣವಾಗಿ" ದಾಳಿ ಮಾಡಲಿದೆ ಎಂದು ಎಚ್ಚರಿಸಿದ್ದಾರೆ. ಈ ಹೇಳಿಕೆಯು ಜಾಗತಿಕ ರಾಜಕೀಯ ವಲಯದಲ್ಲಿ ತೀವ್ರ ಆತಂಕವನ್ನು ಸೃಷ್ಟಿಸಿದ್ದು, ಇದು ಕಚ್ಚಾ ತೈಲ ಬೆಲೆಗಳು ಗಗನಕ್ಕೇರಲು ಪ್ರಮುಖ ಕಾರಣವಾಗಿದೆ. ಈ ಬೆಳವಣಿಗೆಯಿಂದಾಗಿ ಹೂಡಿಕೆದಾರರಲ್ಲಿ ಭೀತಿ ಎದುರಾಗಿದ್ದು, ಮಾರುಕಟ್ಟೆಯ ಸ್ಥಿರತೆಯ ಮೇಲೆ ಇದು ನೇರ ಪರಿಣಾಮ ಬೀರಿದೆ.

 ಇದಿಷ್ಟೇ ಅಲ್ಲದೆ, ಇರಾನ್ ಯುದ್ಧದಲ್ಲಿ ವಾಷಿಂಗ್ಟನ್‌ನ "ಪ್ರಮುಖ ಕಾರ್ಯತಂತ್ರದ ಗುರಿಗಳು" ಪೂರ್ಣಗೊಳ್ಳುವ ಹಂತಕ್ಕೆ ಬಂದಿವೆ ಎಂದು ಟ್ರಂಪ್ ಹೇಳಿದ ಬೆನ್ನಲ್ಲೇ ಏಷ್ಯನ್ ಮಾರುಕಟ್ಟೆಗಳು ಶೇ. 1.2 ರಷ್ಟು ಕುಸಿತ ಕಂಡಿವೆ. ಆದಾಗ್ಯೂ, ಈ ಸಂಘರ್ಷವು ಯಾವಾಗ ಕೊನೆಗೊಳ್ಳಲಿದೆ ಎಂಬ ಬಗ್ಗೆ ಅವರು ಯಾವುದೇ ಸ್ಪಷ್ಟ ಮಾಹಿತಿ ಅಥವಾ ಮುನ್ಸೂಚನೆಯನ್ನು ನೀಡದ ಕಾರಣ ಹೂಡಿಕೆದಾರರಲ್ಲಿ ಅನಿಶ್ಚಿತತೆ ಮೂಡಿದ್ದು, ಇದು ಮಾರುಕಟ್ಟೆಯ ಇಳಿಕೆಗೆ ಕಾರಣವಾಗಿದೆ. ಈ ಅಸ್ಥಿರತೆಯಿಂದಾಗಿ ಹೂಡಿಕೆದಾರರು ಅಪಾಯ ಎದುರಿಸಲು ಸಿದ್ಧರಿಲ್ಲದೆ ದೊಡ್ಡ ಮಟ್ಟದಲ್ಲಿ ತಮ್ಮ ಷೇರುಗಳನ್ನು ಮಾರಾಟ ಮಾಡುತ್ತಿದ್ದಾರೆ. ಇದರ ಜೊತೆಗೆ, ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಭಾರತೀಯ ಮಾರುಕಟ್ಟೆಯಿಂದ ಸತತವಾಗಿ ಹಣ ಹಿಂಪಡೆಯುತ್ತಿರುವುದು ಮತ್ತು ರೂಪಾಯಿ ಮೌಲ್ಯವು ಸಾರ್ವಕಾಲಿಕ ಕುಸಿತ ಕಂಡಿರುವುದು ಮಾರುಕಟ್ಟೆಯ ಮೇಲೆ ತೀವ್ರ ಒತ್ತಡ ಹೇರಿದೆ, (ಏಜೆನ್ಸೀಸ್).