ಚಿನ್ನ-ಬೆಳ್ಳಿಯ ಬೆಲೆ ಕುಸಿಯುತ್ತಿರುವುದೇಕೆ? ಇನ್ನಷ್ಟು ಕಡಿಮೆಯಾಗುತ್ತಾ ಹಳದಿ ಲೋಹದ ದರ? ತಜ್ಞರು ಹೇಳುವುದೇನು? Gold, Silver Prices

ನವದೆಹಲಿ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿಯ ಬೆಲೆಯಲ್ಲಿ ( Gold, Silver Prices ) ಭಾರಿ ಕುಸಿತ ಕಂಡುಬಂದಿದ್ದು, ಹೂಡಿಕೆದಾರರಿಗೆ ಇದೊಂದು ಕಳವಳಕಾರಿ ಬೆಳವಣಿಗೆಯಾಗಿದೆ. ಆದರೆ, ಗ್ರಾಹಕರ ವಿಚಾರದಲ್ಲಿ ಶುಭ ಸುದ್ದಿಯಾಗಿದೆ. ಅಮೆರಿಕದ ಬಡ್ಡಿ ದರ ಏರಿಕೆಯ ನಿರೀಕ್ಷೆಗಳು, ಬಲಗೊಳ್ಳುತ್ತಿರುವ ಡಾಲರ್ ಸೂಚ್ಯಂಕ ಮತ್ತು ಹೆಚ್ಚುತ್ತಿರುವ ಬಾಂಡ್ ಇಳುವರಿಯಿಂದಾಗಿ ಹಳದಿ ಲೋಹ ಹಾಗೂ ಬೆಳ್ಳಿಯ ಬೇಡಿಕೆಗೆ ತೀವ್ರ ಪೆಟ್ಟುಬಿದ್ದಿದ್ದು, ಬೆಲೆಯ ಮೇಲೆ ಪರಿಣಾಮ ಬೀರಿದೆ.

ಅಮೆರಿಕದ ಡಾಲರ್ ಮೌಲ್ಯ ಹಾಗೂ ಬಾಂಡ್ ಇಳುವರಿ ಏರಿಕೆಯಾಗುತ್ತಿರುವುದಲ್ಲದೆ, ಕಚ್ಚಾ ತೈಲ ಬೆಲೆಗಳು ಗಗನಕ್ಕೇರುತ್ತಿರುವ ಕಾರಣ ಸೋಮವಾರದಂದು ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಶೇ. 2.8ರವರೆಗೆ ಕುಸಿದಿವೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ COMEX ಚಿನ್ನದ ಬೆಲೆಯು ಶೇ. 1.57ರಷ್ಟು ಇಳಿಕೆಯಾಗಿ ಪ್ರತಿ ಔನ್ಸ್‌ಗೆ 4,253.40 ಡಾಲರ್‌ಗೆ ತಲುಪಿದ್ದರೆ, COMEX ಬೆಳ್ಳಿಯು ಶೇ. 2.76ರಷ್ಟು ಕುಸಿದು ಪ್ರತಿ ಔನ್ಸ್‌ಗೆ 63.01 ಡಾಲರ್‌ಗೆ ತಲುಪಿದೆ ಎಂದು ಮಾರುಕಟ್ಟೆ ವರದಿಗಳು ತಿಳಿಸಿವೆ.

ಕಳೆದ ವಾರವೂ ಕೂಡ ಈ ಅಮೂಲ್ಯ ಲೋಹಗಳು ನಷ್ಟವನ್ನು ಎದುರಿಸಿದ್ದವು. ಡಿಸೆಂಬರ್ ಡೆಲಿವರಿಯ COMEX ಚಿನ್ನದ ಫ್ಯೂಚರ್ಸ್ ಶೇ. 2.34ರಷ್ಟು (103.70 ಡಾಲರ್) ಕುಸಿದು ಪ್ರತಿ ಔನ್ಸ್‌ಗೆ 4,321.20 ಡಾಲರ್‌ಗೆ ಮುಕ್ತಾಯಗೊಂಡರೆ, ಬೆಳ್ಳಿಯು ಶೇ. 3.5ರಷ್ಟು (2.35 ಡಾಲರ್) ಇಳಿಕೆಯಾಗಿ ಪ್ರತಿ ಔನ್ಸ್‌ಗೆ 64.80 ಡಾಲರ್‌ಗೆ ತಲುಪಿತು. ಇನ್ನು ದೇಶೀಯ ಮಾರುಕಟ್ಟೆಯಲ್ಲಿ ಅಕ್ಟೋಬರ್ ಡೆಲಿವರಿಯ MCX ಚಿನ್ನದ ಫ್ಯೂಚರ್ಸ್ ಶೇ. 2.3ರಷ್ಟು ಇಳಿಕೆಯಾಗಿ ಪ್ರತಿ 10 ಗ್ರಾಂಗೆ ಸುಮಾರು 1.5 ಲಕ್ಷ ರೂ.ಗಳಿದ್ದರೆ, ಬೆಳ್ಳಿ ಫ್ಯೂಚರ್ಸ್ ಶೇ. 3ರಷ್ಟು ಕುಸಿದು ಪ್ರತಿ ಕೆಜಿಗೆ 2.34 ಲಕ್ಷ ರೂ.ಗೆ ತಲುಪಿದೆ.

ಅಮೆರಿಕದ ಫೆಡರಲ್ ರಿಸರ್ವ್ ಅಕ್ಟೋಬರ್‌ನಲ್ಲಿ ಮತ್ತೊಮ್ಮೆ ಬಡ್ಡಿ ದರವನ್ನು ಹೆಚ್ಚಿಸುವ ಸಾಧ್ಯತೆಯಿದೆ ಎಂಬ ಮಾರುಕಟ್ಟೆಯ ನಿರೀಕ್ಷೆಯೇ ಈ ಕುಸಿತಕ್ಕೆ ಪ್ರಮುಖ ಕಾರಣವಾಗಿದೆ. ಬಡ್ಡಿ ದರಗಳು ಮತ್ತು ಬಾಂಡ್ ಇಳುವರಿ ಹೆಚ್ಚಾದಾಗ, ಯಾವುದೇ ಬಡ್ಡಿಯನ್ನು ನೀಡದ ಚಿನ್ನ ಮತ್ತು ಬೆಳ್ಳಿಯಂತಹ ಸ್ವತ್ತುಗಳ ಮೇಲಿನ ಆಕರ್ಷಣೆ ಹೂಡಿಕೆದಾರರಿಗೆ ತಗ್ಗುತ್ತದೆ. ಅದರಲ್ಲೂ ಅಮೆರಿಕದ 30 ವರ್ಷಗಳ ಬಾಂಡ್ ಇಳುವರಿಯು 2004ರ ನಂತರದ ಗರಿಷ್ಠ ಮಟ್ಟಕ್ಕೆ ತಲುಪಿದ್ದು, ಇದು ಬುಲಿಯನ್ ಬೆಲೆಗಳ ಮೇಲೆ ತೀವ್ರ ಒತ್ತಡವನ್ನು ಹೇರಿದೆ.

ಮತ್ತೊಂದೆಡೆ, ಅಮೆರಿಕದ ಡಾಲರ್ ಸೂಚ್ಯಂಕವು (US Dollar Index) ಎರಡು ತಿಂಗಳ ಗರಿಷ್ಠ ಮಟ್ಟವಾದ 101.39ಕ್ಕೆ ಏರಿಕೆಯಾಗಿದೆ. ಡಾಲರ್ ಬಲಗೊಂಡಷ್ಟೂ ಡಾಲರ್ ಆಧಾರಿತ ಸರಕುಗಳಾದ ಚಿನ್ನದ ಮೇಲಿನ ಬೇಡಿಕೆ ಕುಸಿಯುತ್ತದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ. ಅಲ್ಲದೆ, ಅಮೆರಿಕ-ಇರಾನ್ ಉದ್ವಿಗ್ನತೆ ಮತ್ತು ಹೊರ್ಮುಜ್ ಜಲಸಂಧಿಯ ಬೆಳವಣಿಗೆಗಳಿಂದಾಗಿ ಕಚ್ಚಾ ತೈಲ ಬೆಲೆ ಏರಿಕೆಯಾಗಿದ್ದು, ಬ್ರೆಂಟ್ ಕಚ್ಚಾ ತೈಲವು ಪ್ರತಿ ಬ್ಯಾರಲ್‌ಗೆ 106 ಡಾಲರ್‌ಗೆ ತಲುಪಿದೆ. ಇದು ಹಣದುಬ್ಬರದ ಆತಂಕವನ್ನು ಹೆಚ್ಚಿಸುವುದರೊಂದಿಗೆ ಬಡ್ಡಿ ದರಗಳನ್ನು ದೀರ್ಘಕಾಲದವರೆಗೆ ಗರಿಷ್ಠ ಮಟ್ಟದಲ್ಲಿಡಲು ಕಾರಣವಾಗಬಹುದು.

ಈ ವಾರ ಅಮೆರಿಕದಿಂದ ಪ್ರಕಟಗೊಳ್ಳಲಿರುವ ಗ್ರಾಹಕರ ವಿಶ್ವಾಸಾರ್ಹತೆ, ಜಿಡಿಪಿ (GDP), ಪಿಸಿಇ ಹಣದುಬ್ಬರ, ಉತ್ಪಾದನಾ ದತ್ತಾಂಶ ಹಾಗೂ ಸೆಪ್ಟೆಂಬರ್ ತಿಂಗಳ ನಾನ್-ಫಾರ್ಮ್ ಪೇರೋಲ್ಸ್ (ಉದ್ಯೋಗ) ವರದಿಯು ಮಾರುಕಟ್ಟೆಯ ದಿಕ್ಕನ್ನು ನಿರ್ಧರಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿವೆ. ಉದ್ಯೋಗ ಮಾರುಕಟ್ಟೆಯ ದತ್ತಾಂಶವು ಬಲವಾಗಿದ್ದರೆ ಫೆಡ್ ರಿಸರ್ವ್ ಕಠಿಣ ಹಣಕಾಸು ನೀತಿಯನ್ನು ಮುಂದುವರಿಸುವ ಸಾಧ್ಯತೆಯಿದ್ದು, ಇದು ಚಿನ್ನದ ಬೆಲೆಯ ಮೇಲೆ ಮತ್ತಷ್ಟು ಒತ್ತಡ ತರಬಹುದು ಎಂದು ಎಲ್‌ಕೆಪಿ ಸೆಕ್ಯುರಿಟೀಸ್‌ನ ಜತೀನ್ ತ್ರಿವೇದಿ ಅಭಿಪ್ರಾಯಪಟ್ಟಿದ್ದಾರೆ.

ಭಾರತೀಯ ಹೂಡಿಕೆದಾರರ ದೃಷ್ಟಿಯಿಂದ ರೂಪಾಯಿಯ ಮೌಲ್ಯದ ಚಲನೆಯೂ ಕೂಡ ಅತ್ಯಂತ ಮುಖ್ಯವಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬೆಲೆಗಳು ಡಾಲರ್‌ನಲ್ಲಿರುವುದರಿಂದ, ರೂಪಾಯಿ ದೌರ್ಬಲ್ಯವು ದೇಶೀಯ ಮಾರುಕಟ್ಟೆಯಲ್ಲಿ ಬೆಲೆ ಕುಸಿತದ ಪರಿಣಾಮವನ್ನು ಸ್ವಲ್ಪ ಮಟ್ಟಿಗೆ ಸರಿದೂಗಿಸಬಹುದು. ಒಟ್ಟಾರೆಯಾಗಿ, ಆರ್ಥಿಕ ದತ್ತಾಂಶಗಳು, ಬಡ್ಡಿ ದರಗಳ ನಿರೀಕ್ಷೆಗಳು ಮತ್ತು ಭೌಗೋಳಿಕ ರಾಜಕೀಯ ಬೆಳವಣಿಗೆಗಳಿಂದಾಗಿ ಈ ವಾರ ಪೂರ್ತಿ ಚಿನ್ನ ಮತ್ತು ಬೆಳ್ಳಿ ಮಾರುಕಟ್ಟೆಯಲ್ಲಿ ಭಾರೀ ಏರಿಳಿತಗಳು ಮುಂದುವರಿಯುವ ನಿರೀಕ್ಷೆಯಿದೆ, (ಏಜೆನ್ಸೀಸ್​).