ಮೋದಿ ಸರ್ಕಾರದಿಂದ ಹೊಸ ಸಾಲ ಯೋಜನೆ- ಏನದು?

ನವದೆಹಲಿ: ಕೋವಿಡ್​ 19 ಸೋಂಕು ಮತ್ತು ಲಾಕ್​ಡೌನ್​ಗಳು ಜನಜೀವನದ ಮೇಲೆ ಅಗಾಧವಾದ ಪರಿಣಾಮ ಬೀರಿದೆ. ಆರೋಗ್ಯ ಸಂಕಷ್ಟವನ್ನಷ್ಟೇ ಅಲ್ಲ, ಆರ್ಥಿಕ ಸಂಕಷ್ಟವನ್ನೂ ತಂದೊಡ್ಡಿದೆ. ಇಂತಹ ಸನ್ನಿವೇಶದಲ್ಲಿ ಮೋದಿ ಸರ್ಕಾರ ಹೊಸದೊಂದು ಸಾಲ ಯೋಜನೆಯನ್ನು ರೂಪಿಸಿದೆ. ಈ ಸಾಲ ಯೋಜನೆಯ ಫಲಾನುಭವಿಗಳು ಬೀದಿಬದಿಯ ವ್ಯಾಪಾರಿಗಳು.

ಪಿಎಂ ಸ್ಟ್ರೀಟ್​ ವೆಂಡರ್ಸ್​ ಆತ್ಮನಿರ್ಭರ್ ನಿಧಿ (PM SVANidhi) ಎಂಬುದು ಸಾಲ ಯೋಜನೆಯ ಹೆಸರು. 2020ರ ಜೂನ್ 1ರಂದು ಚಾಲ್ತಿಗೆ ಬಂದ ಈ ಯೋಜನೆ ಪ್ರಧಾನ ಮಂತ್ರಿ ಘೋಷಿಸಿದ ಆತ್ಮನಿರ್ಭರ ಪ್ಯಾಕೇಜ್​ನ ಭಾಗವಾಗಿದೆ. ಕೇಂದ್ರ ಸರ್ಕಾರ ಜುಲೈ 17ರಂದು ಇದರ ಮೊಬೈಲ್ ಆ್ಯಪ್ ಕೂಡ ಬಿಡುಗಡೆ ಮಾಡಿದೆ. 2020ರ ಮಾರ್ಚ್​ 24 ಅಥವ ಅದಕ್ಕೂ ಮೊದಲೇ ಬೀದಿ ಬದಿ ವ್ಯಾಪಾರದಲ್ಲಿ ತೊಡಗಿದ್ದ 50 ಲಕ್ಷಕ್ಕೂ ಹೆಚ್ಚು ಬೀದಿ ಬದಿ ವ್ಯಾಪಾರಿಗಳು ಈ ಯೋಜನೆಯ ಫಲಾನುಭವಿಗಳು. ಈ ಯೋಜನೆಯ ಪ್ರಕಾರ ಫಲಾನುಭವಿಗಳಿಗೆ 10,000 ರೂಪಾಯಿ ತನಕ ಕೆಲಸದ ಬಂಡವಾಳ ರೂಪದಲ್ಲಿ ಸಾಲ ಸಿಗಲಿದೆ. ಇದನ್ನು ಒಂದು ವರ್ಷದ ಅವಧಿಯಲ್ಲಿ ಮಾಸಿಕ ಕಂತುಗಳ ರೂಪದಲ್ಲಿ ಮರುಪಾವತಿಸಬೇಕು.

ಸರಿಯಾದ ಸಮಯದಲ್ಲಿ ಅಥವಾ ಅದಕ್ಕೂ ಮುಂಚಿತವಾಗಿಯೇ ಸಾಲ ಮರುಪಾವತಿ ಮಾಡಿದರೆ ನೇರ ನಗದು ವರ್ಗಾವಣೆ ಯೋಜನೆ ಮೂಲಕ ಫಲಾನುಭವಿಯ ಬ್ಯಾಂಕ್ ಖಾತೆಗೆ ಶೇಕಡ 7 ವಾರ್ಷಿಕ ಬಡ್ಡಿಯ ಸಹಾಯಧನ ಜಮೆಯಾಗಲಿದೆ. ಮುಂಚಿತವಾಗಿ ಸಾಲ ಮರುಪಾವತಿ ಮಾಡಿದರೆ ಯಾವುದೇ ಶುಲ್ಕ ಅಥವಾ ದಂಡ ಪಾವತಿಸಬೇಕಾಗಿಲ್ಲ. ಡಿಜಿಟಲ್ ವಹಿವಾಟು ನಡೆಸಿದರೆ ಇದೇ ಯೋಜನೆಯಲ್ಲಿ ಫಲಾನುಭವಿಯ ಖಾತೆಗೆ ಪ್ರತಿ ತಿಂಗಳೂ 100 ರೂಪಾಯಿ ತನಕ ಕ್ಯಾಶ್ ಬ್ಯಾಕ್ ಇನ್​ಸೆಂಟಿವ್ ಲಭ್ಯವಾಗುತ್ತದೆ.

ಅರ್ಹತೆ ಏನು: ಬೀದಿಬದಿ ವ್ಯಾಪಾರಿಗಳ ಕಾಯ್ದೆ 2014ರ ಪ್ರಕಾರ ಬೀದಿಬದಿ ವ್ಯಾಪಾರಸ್ಥರು ಸ್ಥಳೀಯಾಡಳಿತದ ಪರವಾನಗಿ ಅಥವಾಗ ಗುರುತಿನ ಚೀಟಿ ಹೊಂದಿರಬೇಕು. ಅದರಲ್ಲಿ ಸರ್ವೇ ರೆಫರೆನ್ಸ್ ನಂಬರ್ ಇದ್ದು, ಅದನ್ನು ಸಾಲದ ಅರ್ಜಿಯಲ್ಲಿ ನಮೂದಿಸಬೇಕಾಗುತ್ತದೆ.

https://www.vijayavani.net/software-engineer-hacks-into-his-former-companys-database-to-get-back-job-arrested/