ಸಾಮಾನ್ಯರೊಬ್ಬರು 750 ಕೋಟಿ ರೂ. ವಹಿವಾಟು ನಡೆಸುವ ಬೇಕರಿ ಕಟ್ಟಿದ ಕಥೆ ಇದು. ಅಯ್ಯೋ ಏನ್ ಉದ್ಯೋಗ ಮಾಡೋದು ಸಾರ್? ಯಾರೂ ಕೆಲಸನೇ ಕೊಡ್ತಿಲ್ಲ, ಏನಾದ್ರು ಬಿಸಿನೆಸ್ ಮಾಡೋಣ ಅಂದ್ರೆ ಯಾರು ಸಹಾಯ ಮಾಡಲ್ಲ, ನನ್ನ ಹತ್ರ ಹಣನೂ ಇಲ್ಲ, ನನಗೆ ಯಾವ ಬಿಸಿನೆಸ್ ಮಾಡೋದು ಅಂತನೂ ಗೊತ್ತಿಲ್ಲ. ಹೀಗೆ ಬರೀ ಸಮಸ್ಯೆಗಳನ್ನೇ ಹೇಳಿಕೊಂಡು ಸಮಯ ವ್ಯರ್ಥ ಮಾಡೋ ಸಾಕಷ್ಟು ಮಂದಿ ನಮ್ಮ ನಡುವೆ ಇದ್ದಾರೆ. ಇಂಥವರು ಒಂದು ಕಡೆಯಾದರೆ ಸಮಸ್ಯೆಗಳನ್ನೇ ಸವಾಲಾಗಿ ಸ್ವೀಕರಿಸಿ ಸಾಧನೆಯ ಮೆಟ್ಟಿಲುಗಳನ್ನಾಗಿ ಮಾಡಿಕೊಳ್ಳುವ ಮತ್ತೊಂದು ವರ್ಗದ ಜನರೂ ನಮ್ಮ ನಡುವೆ ಇದ್ದಾರೆ. ಹೌದು, ಅಂತಹವರ ಸಾಲಿಗೆ ಮಿಸಸ್ ರಜನಿ ಬೆಕ್ಟರ್ ಸೇರುತ್ತಾರೆ. ಅಡುಗೆ ಮನೆಯಿಂದ ಕೇಕ್, ಬಿಸ್ಕೆಟ್ ಸ್ವೀಟ್ಸ್ ಬಿಸಿನೆಸ್ ಅನ್ನು ಸಣ್ಣದಾಗಿ ಅರಂಭಿಸಿದ ಮಿಸಸ್ ಬೆಕ್ಟರ್, ಪರಿಶ್ರಮ ಮತ್ತು ಛಲದಿಂದ ಸದ್ಯ ವಾರ್ಷಿಕ 750 ಕೋಟಿ ರೂ. ಮೊತ್ತದ ವಹಿವಾಟು ನಡೆಸುವ ಬೇಕರಿ ಮತ್ತು ಸ್ವೀಟ್ಸ್ ಉದ್ಯಮ ಕಟ್ಟಿದ್ದಾರೆ. 1970ರಲ್ಲಿ ರಜನಿ ಬೆಕ್ಟರ್ ಅವರು ವಸ್ತು ಪ್ರದರ್ಶವನವೊಂದರಲ್ಲಿ ಸ್ಟಾಲ್ ಹಾಕಿರುತ್ತಾರೆ. ಆ ಸ್ಟಾಲ್ನಲ್ಲಿ ಖರೀದಿಸಲು ಜನ ಮುಗಿ ಬೀಳುತ್ತಾರೆ. ಇವರ ಉತ್ಪನ್ನಗಳ ಬಗ್ಗೆ ಮೆಚ್ಚುಗೆ ಮಾತುಗಳನ್ನಾಡುತ್ತಾರೆ. ಅಂದು ಬೆಕ್ಟರ್ ಜೀವನದಲ್ಲಿ ಏನಾದರೂ ಸಾಧಿಸಬೇಕು ಎಂದು ನಿರ್ಧರಿಸುತ್ತಾರೆ. ಅದರಂತೆ ಸಣ್ಣದಾಗಿ ತಮ್ಮ ಅಡುಗೆ ಮನೆಯಿಂದಲೇ ಬೇಕರಿ ಉದ್ಯಮ ಆರಂಭಿಸುತ್ತಾರೆ. 1980ರಲ್ಲಿ ಮಿಸಸ್ ಬೆಕ್ಟರ್ ಅವರ ಪತಿ ಬೇಕರಿ ಪ್ರಾಡಕ್ಟ್ ಗಳಿಗೆ ಒಂದು ಒಳ್ಳೆಯ ಹೆಸರಿಟ್ಟು ಬ್ರಾ್ಯಂಡ್ ಮಾಡಬೇಕು ಎಂದು ಸಲಹೆ ನೀಡುತ್ತಾರೆ. ಅದರಂತೆ ಕ್ರಿಮಿಕಾ ಎಂದು ನಾಮಕರಣ ಮಾಡುತ್ತಾರೆ. ದಿನೇದಿನೆ ಬೆಕ್ಟರ್ನ ಕ್ರಿಮಿಕಾ ಪ್ರಾಡಕ್ಟ್ಗಳಿಗೆ ಜನಪ್ರಿಯತೆ ಹೆಚ್ಚಾಗುತ್ತಾ ಹೋಗುತ್ತದೆ. ನಂತರ 1995ರಲ್ಲಿ ಮ್ಯಾಕ್ ಡೊನಾಲ್ಡ್ ಕಂಪನಿ ತನ್ನ ಭಾರತದ ಸ್ಟಾಲ್ಗಳಿಗೆ ಬನ್ ಗಳನ್ನು ಪೂರೈಸುವ ಆರ್ಡರ್ ಅನ್ನು ಕ್ರಿಮಿಕಾಗೆ ಕೊಡುತ್ತದೆ. ಅಂದಿನಿಂದ ಕ್ರಿಮಿಕಾ ಹಿಂತಿರುಗಿ ನೋಡಿದ್ದೇ ಇಲ್ಲ. ಇವತ್ತಿಗೂ ಮಿಸಸ್ ರಜನಿ ಬೆಕ್ಟರ್ ಅವರ ಕ್ರಿಮಿಕಾ ಕಂಪನಿ ದೇಶದ ಪ್ರಮುಖ ಫಾಸ್ಟ್ ಫುಡ್ ಚೈನ್ಗಳಿಗೆ ಬನ್ ಪೂರೈಕೆ ಮಾಡುತ್ತಿದೆ. ಕೆಲ ದಿನಗಳ ಹಿಂದೆಯಷ್ಟೇ ಮಿಸಸ್ ಬೆಕ್ಟರ್ ಕ್ರಿಮಿಕಾ ಕಂಪನಿ ನಡೆಸಿದ ಐಪಿಒ (ಆರಂಭಿಕ ಸಾರ್ವಜನಿಕ ಹೂಡಿಕೆ) ಬಗ್ಗೆ ನೀವೆಲ್ಲ ಕೇಳಿರಲೇಬೇಕು. ಆ ಸಾರ್ವಜನಿಕ ಹೂಡಿಕೆ ಮೂಲಕ ಕಂಪನಿ 540 ಕೋಟಿ ರೂ. ಸಂಗ್ರಹ ಮಾಡಿದೆ. ಯಾಕೆ ಬೆಕ್ಟರ್ ಅವರ ಯಶೋಗಾಥೆಯನ್ನು ಇಲ್ಲಿ ಹೇಳಿದೆ ಅಂತ ನಿಮಗೆ ಅನಿಸಬಹುದು. ಮನಸ್ಸು ಮಾಡಿದರೆ ನೀವು ಕೂಡ ಹೀಗೆ ಬೇಕರಿ ಮತ್ತು ಸ್ವೀಟ್ಸ್ ಉದ್ಯಮವನ್ನು ಕಟ್ಟಿ ದೊಡ್ಡ ಯಶಸ್ಸು ಕಾಣಬಹುದು. ಬೇಕರಿ ಮತ್ತು ಸ್ವೀಟ್ಸ್ ಉದ್ಯಮದಲ್ಲಿ ಯಶಸ್ಸು ಕಾಣುವುದು ಹೇಗೆ ಎನ್ನುವುದರ ಬಗ್ಗೆ ಮಾಹಿತಿ ಈ ಅಂಕಣದಲ್ಲಿದೆ.
