ಷೇರುಪೇಟೆಗೆ ಎಲ್​ಐಸಿ

ವಿಮಾ ಕ್ಷೇತ್ರದ ದಿಗ್ಗಜ ಸಂಸ್ಥೆಯಾದ ಭಾರತೀಯ ಜೀವವಿಮಾ ನಿಗಮದ ಷೇರುಗಳನ್ನು ಮಾರಾಟ ಮಾಡಲು ಕ್ರಮ ಕೈಗೊಳ್ಳಲಾಗುವುದೆಂದು ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಘೋಷಿಸಿದರು. ಸರ್ಕಾರಿ ಸ್ವಾಮ್ಯದ ಉದ್ದಿಮೆಗಳಿಂದ ಬಂಡವಾಳ ಹಿಂಪಡೆಯುವ ಉಪಕ್ರಮದ ಭಾಗವಾಗಿ ಎಲ್​ಐಸಿಯನ್ನು ಕೂಡ ಗುರುತಿಸಲಾಗಿದೆ. ಇದರಿಂದ ಹೆಚ್ಚು ಆರ್ಥಿಕ ಶಿಸ್ತು ಉಂಟಾಗುತ್ತದೆ ಎಂದು ಸಚಿವೆ ಹೇಳಿದರು. ಎಲ್​ಐಸಿಯಲ್ಲಿರುವ ಸರ್ಕಾರಿ ಬಂಡವಾಳದಲ್ಲಿನ ಸ್ವಲ್ಪ ಭಾಗವನ್ನು ಮಾರಾಟ ಮಾಡಲಾಗುತ್ತದೆ. ಪ್ರಸ್ತುತ ಎಲ್​ಐಸಿ ಸಂಪೂರ್ಣ ಸರ್ಕಾರಿ ವಿಮಾ ಕಂಪನಿಯಾಗಿದೆ.

ನೌಕರರ ವಿರೋಧ: ಎಲ್​ಐಸಿ ಬಂಡವಾಳ ಮಾರಾಟ ಮಾಡುವ ಕೇಂದ್ರದ ಯೋಜನೆಯನ್ನು ವಿಮಾ ನೌಕರರ ಸಂಘಟನೆಗಳು ತೀವ್ರವಾಗಿ ವಿರೋಧಿಸಿವೆ. ‘ಇದು ದೇಶದ ಹಿತಕ್ಕೆ ಮಾರಕವಾದ ಕ್ರಮವಾಗಿದೆ’ ಎಂದು ಅಭಿಪ್ರಾಯಪಟ್ಟಿವೆ. ದೇಶದ ಆರ್ಥಿಕ ಅಭಿವೃದ್ಧಿಗೆ ಎಲ್​ಐಸಿ ಅಪಾರ ಕೊಡುಗೆ ನೀಡಿದೆ. ಅದರ ಷೇರುಗಳನ್ನು ಮಾರುವುದರಿಂದ ದೇಶದ ಆರ್ಥಿಕ ಸಾರ್ವಭೌಮತ್ವಕ್ಕೆ ಅಪಾಯವುಂಟಾಗುತ್ತದೆ ಎಂದು ಸಂಘಟನೆಯ ಪದಾಧಿಕಾರಿ ಹೇಳಿದರು. ಖಾಸಗೀಕರಣ ಯೋಜನೆ ಕೈಬಿಡದಿದ್ದರೆ ದೇಶಾದ್ಯಂತ ಚಳವಳಿ ನಡೆಸುವುದಾಗಿ ಎಚ್ಚರಿಸಿದರು.

1956ರಲ್ಲಿ ಸ್ಥಾಪನೆ: ಸ್ವಾತಂತ್ರ್ಯ ಪೂರ್ವದಲ್ಲಿ ದೇಶದಲ್ಲಿ ವಿಮಾ ಸೇವೆ ಒದಗಿ ಸುವ ಹಲವು ವಿಮಾ ಕಂಪನಿಗಳಿದ್ದವು. ಅನೇಕ ವಿಮಾ ಸಂಸ್ಥೆಗಳು ಸಾರ್ವಜನಿಕರಿಗೆ ಮೋಸ ಮಾಡುತ್ತಿದ್ದುದನ್ನು ಸಂಸದ ಫಿರೋಜ್ ಗಾಂಧಿ ಪ್ರಸ್ತಾಪಿಸಿ ಈ ಕ್ಷೇತ್ರದ ರಾಷ್ಟ್ರೀಕರಣದ ಅಗತ್ಯವನ್ನು ಪ್ರತಿಪಾದಿಸಿದ್ದರು. ವಂಚನೆ ಪ್ರಕರಣಗಳ ತನಿಖೆ ನಡೆಸಿ ಕೆಲವು ವಿಮಾ ಉದ್ಯಮಿಗಳು ಜೈಲು ಪಾಲಾಗಿದ್ದರು. ಈ ಹಿನ್ನೆಲೆಯಲ್ಲಿ, 1956 ಜೂನ್ 19ರಂದು ಸಂಸತ್ತು ಭಾರತೀಯ ಜೀವ ವಿಮಾ ಕಾನೂನನ್ನು ಅಂಗೀಕರಿಸುವ ಮೂಲಕ ಸುಮಾರು 245ಕ್ಕೂ ಹೆಚ್ಚು ವಿಮಾ ಕಂಪನಿ ಮತ್ತು ಪ್ರಾವಿಡೆಂಟ್ ಸೊಸೈಟಿಗಳನ್ನು ವಿಲೀನಗೊಳಿಸಿ ಭಾರತೀಯ ಜೀವ ವಿಮಾ ನಿಗಮವನ್ನು (ಎಲ್​ಐಸಿ) ಸ್ಥಾಪಿಸಲಾಯಿತು. ಇದು ಸಂಪೂರ್ಣವಾಗಿ ಸರ್ಕಾರಿ ಒಡೆತನದ ಸಂಸ್ಥೆ. ವಿಮೆ ಪಾಲಿಸಿಗಳಿಂದ ಬಂದ ಹಣವನ್ನು ಸರ್ಕಾರಿ ಉದ್ದಿಮೆಗಳಲ್ಲಿ ಹೂಡುವ ಮೂಲಕ ಸರ್ಕಾರಿ ರಂಗಕ್ಕೆ ಚೈತನ್ಯ ತುಂಬುತ್ತಾ ಬಂದಿದೆ. ಖಾಸಗಿ ಕಂಪನಿಗಳಲ್ಲೂ ಎಲ್​ಐಸಿ ಹೂಡಿಕೆಯಿದೆ. ಪಂಚವಾರ್ಷಿಕ ಯೋಜನೆಗಳಿಗೆ ಎಲ್​ಐಸಿ ಕೊಡುಗೆಯೂ ಅಪಾರವಾಗಿದೆ.