ಕಷ್ಟಕಾಲದಲ್ಲಿ ಚಿನ್ನ ಕೈ ಹಿಡಿಯುತ್ತದೆ. ಚಿನ್ನದ ಮೇಲೆ ಸುಲಭವಾಗಿ ಸಾಲ ಪಡೆಯಬಹುದಾಗಿದೆ. ಈಗಂತೂ ಎಲ್ಲ ಬ್ಯಾಂಕುಗಳು ಚಿನ್ನದ ಮೇಲೆ ಸಾಲ ನೀಡುತ್ತವೆ. ಚಿನ್ನದ ಮೌಲ್ಯದ ಶೇ.90 ಸಾಲ ಪಡೆಯಬಹುದಾಗಿದೆ. ಆದರೆ, ಷೇರುಗಳ ಮೇಲೆ ಶೇ.60ಕ್ಕಿಂತ ಹೆಚ್ಚಿನ ಸಾಲ ಪಡೆಯುವುದು ಕಷ್ಟ. ಹೂಡಿಕೆಯ ಅವಧಿಯು ಚಿನ್ನ ಹಾಗೂ ಷೇರುಗಳಿಂದ ಆಗುವ ಲಾಭದ ಮೇಲೆ ಪ್ರಭಾವ ಬೀರುತ್ತದೆ. ಷೇರು ಮಾರುಕಟ್ಟೆ ದೀರ್ಘಾವಧಿಯ ಹೂಡಿಕೆಯ ತಂತ್ರಗಳಿಗೆ ಸೂಕ್ತವಾಗಿದೆ. ಒಳ್ಳೆಯ ಕಂಪನಿಗಳ ಷೇರುಗಳನ್ನು ಖರೀದಿಸಿ ಹತ್ತಿಪ್ಪತ್ತು ವರ್ಷ ಹಾಗೇ ಬಿಟ್ಟರೆ ಇವು ಉತ್ತಮ ಲಾಭ ತಂದುಕೊಡುತ್ತವೆ. ಚಿನ್ನವು ಅಲ್ಪಾವಧಿ ಹಾಗೂ ದೀರ್ಘಾವಧಿಯಲ್ಲೂ ಲಾಭದಾಯಕವಾಗಿದೆ. ವಿಶೇಷವಾಗಿ ಆರ್ಥಿಕ ಅನಿಶ್ಚಿತತೆಯ ಅವಧಿಯಲ್ಲಿ ತ್ವರಿತ ಲಾಭ ನೀಡುತ್ತದೆ. ಚಿನ್ನ ಅಥವಾ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆಯು ನಮ್ಮ ಲಾಭದ ನಿರೀಕ್ಷೆ ಹಾಗೂ ನಾವು ಎಷ್ಟರ ಮಟ್ಟಿಗೆ ನಷ್ಟ ತಡೆದುಕೊಳ್ಳಬಲ್ಲೆವು ಎಂಬುದರ ಮೇಲೆ ಅವಲಂಬಿತವಾಗಿದೆ. ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆಯಿಂದ ಹೆಚ್ಚಿನ ಲಾಭ ಪಡೆಯಬಹುದು. ಆದರೆ, ಇದು ಅನಿಶ್ಚಿತ. ಮಾರುಕಟ್ಟೆ ಯಾವಾಗಲಾದರೂ ಕೆಳಗೆ ಇಳಿಯಬಹುದು. ನಮ್ಮ ದೇಶವಷ್ಟೇ ಅಲ್ಲದೆ ಜಾಗತಿಕ ಆರ್ಥಿಕ ನಿರ್ಣಯಗಳು, ಯುದ್ಧಗಳು, ನೈಸರ್ಗಿಕ ಪ್ರಕೋಪಗಳು ಮಾರುಕಟ್ಟೆ ಮೇಲೆ ಪ್ರಭಾವ ಬೀರುವ ಸಾಧ್ಯತೆ ಇರುತ್ತದೆ.
