ಕೇಂದ್ರ ಬಜೆಟ್ 2020| ಆದಾಯ ತೆರಿಗೆ ವಿಚಾರದಲ್ಲಿ ಬಿಗ್ ರಿಲೀಫ್​ ನೀಡಲಿದೆ ಕೇಂದ್ರ ಸರ್ಕಾರ ಎನ್ನುತ್ತಿವೆ ವರದಿಗಳು..

ನವದೆಹಲಿ: ಕೇಂದ್ರ ಬಜೆಟ್ 2020ಕ್ಕೆ ದಿನಗಣನೆ ಆರಂಭವಾಗಿದ್ದು, ಆದಾಯ ತೆರಿಗೆ ವಿಚಾರದಲ್ಲಿ ಈ ಸಲ ತೆರಿಗೆ ಪಾವತಿದಾರರಿಗೆ ಭಾರಿ ರಿಲೀಫ್ ಕೊಡಲಿದೆ ಕೇಂದ್ರ ಸರ್ಕಾರ ಎಂಬ ಸುದ್ದಿ ಹರಡಿದೆ.

ವೈಯಕ್ತಿಕ ಆದಾಯ ತೆರಿಗೆ ಸ್ಲ್ಯಾಬ್​ಗಳಲ್ಲಿ ಪರಿಷ್ಕರಣೆ ಮಾಡಲು ಸರ್ಕಾರ ಮುಂದಾಗಿದೆ. ಹಿಂದೆ 5 ಲಕ್ಷ ರೂಪಾಯಿ ತನಕ ಆದಾಯ ಇರುವಂಥವರು ಶೇಕಡ 5 ಆದಾಯ ತೆರಿಗೆ ಪಾವತಿಸುತ್ತಿದ್ದರು. ಈ ಸ್ಲ್ಯಾಬ್​ನಲ್ಲಿ ಆದಾಯ ಮಿತಿಯನ್ನು ಹೆಚ್ಚಿಸುವ ಕ್ರಮಕ್ಕೆ ಸರ್ಕಾರ ಮುಂದಾಗಿದೆ ಎನ್ನುತ್ತಿವೆ ಸುದ್ದಿಗಳು..

ವರದಿಗಳ ಪ್ರಕಾರ, ಫೆಬ್ರವರಿ 1 ರಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಮಂಡಿಸುವ ಬಜೆಟ್​ನಲ್ಲಿ ಈ ವಿಷಯ ಒಳಗೊಳ್ಳಲಿದೆ. ಆದಾಯ ತೆರಿಗೆ ಪರಿಷ್ಕರಣೆಗೆ ಸಂಬಂಧಿಸಿ ಎರಡು ಮಹತ್ವದ ಪರಿಷ್ಕರಣೆಗಳು ಇದರಲ್ಲಿವೆ.ಪ್ರಸ್ತಾವಿತ ಪರಿಷ್ಕರಣೆ ಪ್ರಕಾರ, ಶೇಕಡ 5ರ ತೆರಿಗೆ ಸ್ಲ್ಯಾಬ್​ನ ಆದಾಯ ಮಿತಿಯನ್ನು 7 ಲಕ್ಷ ರೂಪಾಯಿಗೂ, ಶೇಕಡ 10ರ ತೆರಿಗೆಯ ಸ್ಲ್ಯಾಬ್​ನ ಆದಾಯ ಮಿತಿ 7 ಲಕ್ಷ ರೂಪಾಯಿಯಿಂದ 10 ಲಕ್ಷ ರೂಪಾಯಿ ತನಕವೂ ಆಗುವ ಸಾಧ್ಯತೆ ಇದೆ.

ಕಳೆದ ಬಜೆಟ್​ನಲ್ಲಿ ವಾರ್ಷಿಕ 5 ಲಕ್ಷವರೆಗಿನ ಆದಾಯಕ್ಕೆ ವೈಯಕ್ತಿಕ ಆದಾಯ ತೆರಿಗೆ ವಿನಾಯಿತಿಯನ್ನು ಸರ್ಕಾರ ಘೋಷಿಸಿತ್ತು. ಈಗಿರುವ ಆದಾಯ ತೆರಿಗೆ ವ್ಯವಸ್ಥೆ ಪ್ರಕಾರ, 2.5 ಲಕ್ಷ ರೂಪಾಯಿ ತನಕದ ಆದಾಯಕ್ಕೆ ಯಾವುದೇ ವೈಯಕ್ತಿಕ ಆದಾಯ ತೆರಿಗೆ ಪಾವತಿಸಬೇಕಾಗಿಲ್ಲ. 2.5 ಲಕ್ಷ ರೂಪಾಯಿಯಿಂದ 5 ಲಕ್ಷ ರೂಪಾಯಿ ತನಕದ ಆದಾಯಕ್ಕೆ ಶೇಕಡ 5, 5 ಲಕ್ಷ ರೂಪಾಯಿಯಿಂದ 10 ಲಕ್ಷ ರೂಪಾಯಿ ತನಕದ ಆದಾಯಕ್ಕೆ ಶೇಕಡ 20, 10 ಲಕ್ಷ ರೂಪಾಯಿಗೂ ಹೆಚ್ಚು ಆದಾಯಕ್ಕೆ ಶೇಕಡ 30 ತೆರಿಗೆ ಪಾವತಿಸಬೇಕಾಗಿದೆ. ಇದಲ್ಲದೆ, 50 ಲಕ್ಷ ರೂಪಾಯಿಗೂ ಅಧಿಕ ಆದಾಯ ಹೊಂದಿದವರಿಗೆ ಸರ್ಚಾರ್ಜನ್ನೂ ಸರ್ಕಾರ ವಿಧಿಸುತ್ತಿದೆ. (ಏಜೆನ್ಸೀಸ್)