ಎಟಿಎಂ ವಿತ್​ಡ್ರಾ ಶುಲ್ಕ ಹೆಚ್ಚಳ?

ಮುಂಬೈ: ನಿರ್ವಹಣಾ ವೆಚ್ಚ ಹೆಚ್ಚಾಗುತ್ತಿರುವ ಹಿನ್ನೆಲೆ ಎಟಿಎಂ ಗ್ರಾಹಕರ ನಗದು ಹಿಂಪಡೆಯುವಿಕೆ ಮೇಲಿನ ಶುಲ್ಕ ಹೆಚ್ಚಿಸುವಂತೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾಗೆ (ಆರ್​ಬಿಐ) ಎಟಿಎಂ ಆಪರೇಟರ್ಸ್ ಅಸೋಸಿಯೇಷನ್ ಮನವಿ ಮಾಡಿದೆ.

ಸುರಕ್ಷತೆ ಮತ್ತು ನಿರ್ವಹಣೆ ಕುರಿತಂತೆ ಆರ್​ಬಿಐ ಮಾನದಂಡಗಳ ಪಾಲನೆಯಿಂದ ಎಟಿಎಂ ಯಂತ್ರಗಳ ನಿರ್ವಹಣಾ ವೆಚ್ಚ ಹೆಚ್ಚಾಗಿದೆ. ಸದ್ಯ ನಗದು ವಿತ್​ಡ್ರಾ ಮೇಲೆ ಆರ್​ಬಿಐ ಮೊದಲ ಐದು ವಹಿವಾಟುಗಳನ್ನು ಉಚಿತವಾಗಿ, ನಂತರದ ಪ್ರತಿ ವಹಿವಾಟಿಗೆ 15 ರೂ. ನಿಗದಿಪಡಿಸಿದೆ. ಆದರೆ ಈ ಮೊತ್ತ ಎಟಿಎಂಗಳ ದೈನಂದಿನ ಕಾರ್ಯಾಚರಣೆಗೆ ಸಾಕಾಗುವುದಿಲ್ಲ ಎಂಬುದು ಆಪರೇಟರ್​ಗಳ ಅಳಲು.

10 ಲಕ್ಷಕ್ಕಿಂತ ಅಧಿಕ ಜನಸಂಖ್ಯೆ ಇರುವ ನಗರ ಪ್ರದೇಶಗಳ ಎಟಿಎಂಗಳ ನಗದು ಹಿಂಪಡೆಯುವಿಕೆ ಶುಲ್ಕವನ್ನು 17 ರೂ.ಗೆ ಹೆಚ್ಚಿಸಬೇಕು, ಹಣಕಾಸೇತರ ವ್ಯವಹಾರಗಳ ಶುಲ್ಕವನ್ನು 7ರೂ.ಗೆ ಏರಿಸಬೇಕು. ಜತಗೆ ಉಚಿತ ನಗದು ಹಿಂಪಡೆಯುವಿಕೆ ಮಿತಿಯನ್ನು 5 ರಿಂದ 3ಕ್ಕೆ ಇಳಿಸಬೇಕು ಎಂಬುದು ಪ್ರಮುಖ ಬೇಡಿಕೆಗಳಾಗಿವೆ.