ಅಂದು ಮೀರಾ ಜಾಸ್ಮಿನ್​ ಹಿಂದೆ ಕುಣಿಯುತ್ತಿರುವ ಈ ಜೂನಿಯರ್​ ಆರ್ಟಿಸ್ಟ್​ ಇಂದು ಅಭಿಮಾನಿಗಳ ನೆಚ್ಚಿನ ಸೌತ್ ಬ್ಯೂಟಿ

ಚೆನ್ನೈ: ಸಿಂಪಲ್​ ಲುಕ್​, ಮೋಡಿ ಮಾಡುವ ಅಭಿನಯ ಅಷ್ಟೇ! ಸರಳವಾಗಿರುವ ಹೆಣ್ಣು ಮಕ್ಕಳನ್ನು ಇಷ್ಟಪಡುವ ಹುಡುಗರ ಎದೆಬಡಿತವನ್ನು ಹೆಚ್ಚಿಸುವ ನಟಿ ಈಕೆ. ಸೌತ್ ಸಿನಿಮಾಗಳಲ್ಲಿ ತಮ್ಮದೇ ವಿಶೇಷ ಛಾಪು ಮೂಡಿಸಿ, ಇಂದು ಕೋಟ್ಯಂತರ ಅಭಿಮಾನಿಗಳ ಹೃದಯದಲ್ಲಿ ನೆಚ್ಚಿನ ಹಾಗೂ ಚಿತ್ರೋದ್ಯಮದಲ್ಲಿ ಬಹುಬೇಡಿಕೆಯ ನಟಿಯಾಗಿ ಬೆಳೆದಿರುವ ಈ ಬ್ಯೂಟಿ ಅಂದಿನ ಸ್ಟಾರ್​ ಹೀರೋಯಿನ್​ ಚಿತ್ರಗಳಲ್ಲಿ ಜೂನಿಯರ್​ ಆರ್ಟಿಸ್ಟ್​ ಆಗಿ ಕುಣಿದ ದಿನಗಳ ಬಗ್ಗೆ ಇಲ್ಲಿ ಮೆಲುಕು ಹಾಕೋಣ ಬನ್ನಿ.

ಈ ನಟಿಯ ಹೆಸರು ತೆಗೆದರೆ ಸಾಕು, ಕೇವಲ ಅವರ ಸೂಪರ್ ಹಿಟ್ ಸಿನಿಮಾಗಳ ಬಗ್ಗೆ ಅಲ್ಲದೇ ಹಲವಾರು ಕುತೂಹಲಕಾರಿ ವಿಷಯಗಳ ಬಗ್ಗೆ ಜನ ಚರ್ಚಿಸುತ್ತಾರೆ. ಡಿ-ಗ್ಲಾಮರಸ್ ರೋಲ್, ಸರಳತೆ, ನೋ-ಮೇಕಪ್ ಲುಕ್, ಒಳ್ಳೆಯ ಕಥಾಹಂದರದ ಚಿತ್ರಗಳ ಆಯ್ಕೆಗೆ ಈಕೆ ಸಿಕ್ಕಾಪಟ್ಟೆ ಫೇಮಸ್​. ಜೊತೆಗೆ, ಹಲವು ದೊಡ್ಡ ಸ್ಟಾರ್ ನಟರ ಸಿನಿಮಾಗಳಲ್ಲಿ ನಟಿಸಲು ನಿರಾಕರಿಸಿ ವಿವಾದಗಳಿಗೂ ತುತ್ತಾಗಿದ್ದಾರೆ. ಅಲ್ಲದೆ, ಜನರ ನಂಬಿಕೆಗೆ ದ್ರೋಹ ಮಾಡುವ ಜಾಹೀರಾತುಗಳನ್ನು ನಿರಾಕರಿಸಿ ಜನರ ಮೆಚ್ಚಿಗೆಗೂ ಪಾತ್ರರಾಗಿದ್ದಾರೆ.

ತಮಿಳಿನ ಸ್ಟಾರ್​ ನಿರ್ದೇಶಕ ಮಣಿರತ್ನಂ ಅವರಂತಹ ಬಹುಬೇಡಿಕೆಯ​ ನಿರ್ದೇಶಕರು ಸಾಯಿ ಪಲ್ಲವಿ ಜತೆ ಸಿನಿಮಾ ಮಾಡುವ ಆಸಕ್ತಿಯನ್ನು ವ್ಯಕ್ತಪಡಿಸುತ್ತಾರೆಂದರೆ ನಟಿಯ ಪ್ರತಿಭೆ ಎಂಥದ್ದು ಎಂಬುದನ್ನು ಇಲ್ಲಿ ಅರ್ಥೈಸಿಕೊಳ್ಳಬಹುದು. ಇತ್ತೀಚೆಗೆ, ಶಿವಕಾರ್ತಿಕೇಯನ್ ಜತೆಗೆ 'ಅಮರನ್' ಚಿತ್ರದಲ್ಲಿ ನಟಿಸಿದ ಸಾಯಿ ಪಲ್ಲವಿ ಬ್ಲಾಕ್​ಬಸ್ಟರ್​ ಹಿಟ್​ ಕಂಡರು. ಅದರಲ್ಲೂ, ಇಡೀ ಚಿತ್ರದಲ್ಲಿ ನಾಯಕನಿಗಿಂತ ಹೆಚ್ಚು ಗಮನ ಸೆಳೆಯುವುದೇ ನಾಯಕಿ ಎಂಬುದು ಮತ್ತೊಂದು ವಿಶೇಷ. ತಮಿಳು, ತೆಲುಗು ಮತ್ತು ಮಲಯಾಳಂನಲ್ಲಿ ಭಾರೀ ಜನಪ್ರಿಯತೆ ಗಳಿಸಿರುವ ಸಾಯಿ ಪಲ್ಲವಿ, ಅಂದು ಸ್ಟಾರ್ ನಟಿ ಮೀರಾ ಜಾಸ್ಮಿನ್ ಅವರ ಹಿಂದೆ ಜೂನಿಯರ್​ ಆರ್ಟಿಸ್ಟ್​ ಆಗಿ ಅವಕಾಶದ ಹಿಂದೆ ಓಡಿ, ಇಂದು ಬೆಳೆದು ನಿಂತಿರುವ ಪರಿ ನಿಜಕ್ಕೂ ಅದ್ಭುತವೇ.

‘ಕಸ್ತೂರಿಮಾನ್’ ತಮಿಳು ಡಬ್ ಚಿತ್ರದ ಹಾಡೊಂದರಲ್ಲಿ ನಾಯಕಿ ಮೀರಾ ಜಾಸ್ಮಿನ್ ಬೆನ್ನ ಹಿಂದೆ ಹೆಜ್ಜೆ ಹಾಕುತ್ತಿರುವ ಜೂನಿಯರ್​ ಕಲಾವಿದರಲ್ಲಿ ಸಾಯಿಯೂ ಒಬ್ಬರು. ನಟ ಜಯಂ ರವಿ ಅಭಿನಯದ ‘ಧಾಮ್ ಧೂಮ್’ ಸಿನಿಮಾದಲ್ಲೂ ಇದೇ ರೀತಿಯ ದೃಶ್ಯಗಳಲ್ಲಿ ಅವರು ಕಾಣಿಸಿಕೊಂಡಿದ್ದಾರೆ. ಈ ಘಟನೆ ನಡೆದದ್ದು ಸಾಯಿ ಪಲ್ಲವಿ ಆರನೇ ತರಗತಿಯಲ್ಲಿದ್ದಾಗ ಎನ್ನಲಾಗಿದೆ. ಸಾಯಿ ಮತ್ತು ಆಕೆಯ ಸ್ನೇಹಿತರು ಕ್ಲಾಸ್​ ಮುಗಿಸಿ, ಸಿನಿಮಾಗಳಲ್ಲಿ ಡ್ಯಾನ್ಸ್ ಮಾಡಲು ಹೋಗುತ್ತಿದ್ದರಂತೆ. ಬಾಲ್ಯದಲ್ಲಿ ಅವರ ತಾಯಿ, ಐಶ್ವರ್ಯಾ ರೈ ಮತ್ತು ಮಾಧುರಿ ದೀಕ್ಷಿತ್ ಅವರ ಡ್ಯಾನ್ಸ್ ವಿಡಿಯೋಗಳನ್ನು ತೋರಿಸಿ ನೃತ್ಯ ಕಲಿಸುತ್ತಿದ್ದರಂತೆ. ಹೀಗೆ, ಸಮಯ ಮತ್ತು ಅವಕಾಶಗಳು ಸಿಕ್ಕಾಗ ಉಪಯೋಗಿಸಿಕೊಂಡ ಪಲ್ಲವಿ, ಇಂದು 4000 ಬಜೆಟ್​ ಚಿತ್ರದ 'ರಾಮಾಯಣ'ದಲ್ಲಿ ಸೀತೆಯಾಗಿ ಪ್ರೇಕ್ಷಕರ ಎದುರು ಹಾಜರಾಗಲು ಸಜ್ಜಾಗಿದ್ದಾರೆ.

ಪ್ರಸ್ತುತ ಭಾರತದ ಅತ್ಯಂತ ದುಬಾರಿ ಚಿತ್ರ ಎನ್ನಲಾದ ನಿತೀಶ್ ತಿವಾರಿ ನಿರ್ದೇಶನದ 'ರಾಮಾಯಣ' ಹಿಂದಿ ಚಿತ್ರದಲ್ಲಿ ಸೀತಾ ಮಾತೆಯ ಪಾತ್ರವನ್ನು ಸಾಯಿ ಪಲ್ಲವಿ ನಿಭಾಯಿಸಿದ್ದಾರೆ. ಈ ಪಾತ್ರವು ಪ್ರಶಂಸೆ ಮತ್ತು ಟೀಕೆ ಎರಡಕ್ಕೂ ಗುರಿಯಾಗಿದೆ. ಕೆಲವರು, ಸಾಯಿ ಅವರನ್ನು ಲುಕ್​ ಕಂಡು ಮೆಚ್ಚಿ, ಹೊಗಳಿದರೆ, ಈಕೆ ಸೀತಾ ಪಾತ್ರಕ್ಕೆ ಸರಿ ಹೊಂದುವುದಿಲ್ಲ ಎಂದು ಕೆಲವರು ಟೀಕಿಸಿದ್ದಾರೆ. ಇದೆಲ್ಲದರ ನಡುವೆ ಚಿತ್ರ ತೆರೆಗೆ ಅಪ್ಪಳಿಸಲು ಸಕಲ ಸಿದ್ಧತೆಯನ್ನು ಮಾಡಿಕೊಂಡಿದೆ,(ಏಜೆನ್ಸೀಸ್).