ಸಮುದಾಯದ ಕುಲಶಾಸ್ತ್ರ ಅಧ್ಯಯನ ನಡೆಸುವುದು ಎಂದರೆ ಆ ಸಮುದಾಯದ ಪೂರ್ವ ಇತಿಹಾಸ, ಕಲೆ, ಬದುಕು, ಬವಣೆ, ವೃತ್ತಿ, ಜೀವನಶೈಲಿ, ಪೂರ್ವಾಪರ ಇತಿಹಾಸ ಕಲೆ ಹಾಕುವುದಾಗಿದೆ. ಅದರಂತೆ ನಾವು ರಾಜ್ಯದ ಪ್ರಮುಖ ಸ್ಥಳಗಳಲ್ಲಿ ಅಂದರೆ, ವಿಶ್ವಕರ್ಮ ಸಮುದಾಯದ ಐತಿಹಾಸಿಕ, ಸಾಮಾಜಿಕ, ಕೌಶಲಭರಿತ ವೃತ್ತಿ ಜೀವನ ಮುಂತಾದ ಪ್ರಾಮುಖ್ಯತೆ ಹೊಂದಿರುವ ಸ್ಥಳಗಳಿಗೆ ಭೇಟಿ ನೀಡಿ, ಅಲ್ಲಿನ ಸ್ಥಳ ಪುರಾಣ ಮತ್ತು ಜನ ಜೀವನ ಕುರಿತಂತೆ ಮಾಹಿತಿ ದಾಖಲಿಸುವುದು. ವಿಶ್ವಕರ್ಮರ ಪಂಚ ಕಸುಬುಗಳಾದ ಬಡಗಿ, ಕಮ್ಮಾರಿಕೆ, ಆಭರಣ ತಯಾರಿಕೆ, ಲೋಹ ಹಾಗೂ ಕಾಷ್ಟ ಶಿಲ್ಪಿ ಮುಂತಾದ ವೃತ್ತಿ ಅವಲಂಬಿಸಿರುವವರನ್ನು ಭೇಟಿ ಮಾಡಿ ವಿಸ್ತೃತ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಅದರಂತೆ ಮಂಡ್ಯ ಜಿಲ್ಲೆಯ ಚಿಕ್ಕಲ್ಲೂರು, ಹಲಗೂರಿನ ಜಿಲ್ಲಾಪುರ, ನಾಗಮಂಗಲದ ಮೌನೇಶ್ವರ ಸೇರಿದಂತೆ ಹಲವು ಸ್ಥಳಗಳಿಗೂ ಭೇಟಿ ನೀಡಿ ಮಾಹಿತಿ ಕಲೆಹಾಕಲಾಗುತ್ತಿದೆ. ಒಂದು ವರ್ಷದಲ್ಲಿ ಈ ಎಲ್ಲ ಮಾಹಿತಿಯನ್ನು ಅಭ್ಯಸಿಸಿ ಸರ್ಕಾರಕ್ಕೆ ವರದಿ ನೀಡಲಾಗುವುದು ಎಂದು ತಿಳಿಸಿದರು.
