ಅಕ್ಷಯ್ ಜತೆ ಮೃಣಾಲ್

ಬಾಲಿವುಡ್ ನಟ ಹೃತಿಕ್ ರೋಷನ್ ಜತೆ ‘ಸೂಪರ್ 30’ ಹಾಗೂ ನಟ ಜಾನ್ ಅಬ್ರಹಾಂ ಅವರೊಂದಿಗೆ ‘ಬಾಟ್ಲಾ ಹೌಸ್’ ಚಿತ್ರ ಸೇರಿ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿರುವ ನಟಿ ಮೃಣಾಲ್ ಠಾಕೂರ್, ಇದೀಗ ಬಾಲಿವುಡ್ ಖಿಲಾಡಿ ಅಕ್ಷಯ್ ಕುಮಾರ್​ಗೆ ಜತೆ ಆಗುತ್ತಿದ್ದಾರೆ.

ಅಕ್ಷಯ್ ನಟನೆಯ ‘ಬೆಲ್​ಬಾಟಂ’ ಚಿತ್ರದ ಪ್ರಮುಖ ಪಾತ್ರದಲ್ಲಿ ಮೃಣಾಲ್ ಅಭಿನಯಿಸಲಿದ್ದಾರೆ. ರಂಜಿತ್ ತಿವಾರಿ ನಿರ್ದೇಶನದ ಈ ಚಿತ್ರದಲ್ಲಿ ನಟ ಅಕ್ಷಯ್ಕುಮಾರ್ ಅವರದು ಅಪರಾಧ ಪತ್ತೆ ಮಾಡುವ ಪೊಲೀಸ್ ಅಧಿಕಾರಿ ಪಾತ್ರವಾದರೆ, ಮೃಣಾಲ್ ಠಾಕೂರ್ ಅವರದು ನಾಯಕಿಯ ಪಾತ್ರ ಎಂದು ಹೇಳಲಾಗುತ್ತಿದೆ. ಈ ಹಿಂದಿನ ಚಿತ್ರಗಳಲ್ಲಿ ಅಭಿನಯದ ಮೂಲಕ ಮೃಣಾಲ್ ಠಾಕೂರ್ ‘ಪ್ರತಿಭಾನ್ವಿತ ನಟಿ’ ಎಂದು ಕರೆಸಿಕೊಂಡಿದ್ದರು. ಇದೀಗ ಈ ಸಿನಿಮಾದಲ್ಲಿ ಅಕ್ಷಯ್ ಜತೆಗೆ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ. ಥ್ರಿಲ್ಲರ್, ರೊಮ್ಯಾಂಟಿಕ್, ಆಕ್ಷನ್, ಎಮೋಷನ್ ಕಥಾಹಂದರದ ಈ ಚಿತ್ರ, 1980ರ ರೆಟ್ರೋ ಶೈಲಿಯದ್ದಾಗಿದೆ. ಹಿಂದಿಯ ಈ ‘ಬೆಲ್ ಬಾಟಂ’ ಚಿತ್ರವು ಜಯತೀರ್ಥ ನಿರ್ದೇಶನದ, ರಿಷಬ್ ಶೆಟ್ಟಿ ನಾಯಕ ನಟನೆಯ ಕನ್ನಡದ ‘ಬೆಲ್ ಬಾಟಂ’ ಚಿತ್ರದ ರಿಮೇಕ್ ಎನ್ನಲಾಗಿತ್ತು. ಅಲ್ಲದೆ, ಚಿತ್ರದ ಪೋಸ್ಟರ್ ಕೂಡ ಈ ಅನುಮಾನಕ್ಕೆ ಪೂರಕವಾಗಿತ್ತು. ಆದರೆ ಹಿಂದಿಯ ‘ಬೆಲ್​ಬಾಟಂ’ ರಿಮೇಕ್ ಅಲ್ಲ ಎನ್ನುವ ಮೂಲಕ ನಟ ಅಕ್ಷಯ್ ಕುಮಾರ್ ಈ ಅನುಮಾನಕ್ಕೆ ತೆರೆ ಎಳೆದಿದ್ದರು. ಈ ಚಿತ್ರಕ್ಕೆ ನಿಖಿಲ್ ಅಡ್ವಾಣಿ, ವಾಸು ಭಾಗನಾನಿ, ಜಾಕಿ ಭಾಗನಾನಿ ಜತೆ ಅಕ್ಷಯ್ಕುಮಾರ್ ಕೂಡ ಬಂಡವಾಳ ಹೂಡಿದ್ದಾರೆ. -ಏಜೆನ್ಸೀಸ್