ಬೆಂಗಳೂರು: ‘ಮುಂಗಾರು ಮಳೆ’ ಸಿನಿಮಾ ತೆರೆಕಂಡು 18 ವರ್ಷಗಳ ಬಳಿಕ ನಿರ್ದೇಶಕ ಯೋಗರಾಜ್ ಭಟ್ ಹಾಗೂ ನಿರ್ಮಾಪಕ ಇ.ಕೃಷ್ಣಪ್ಪ ‘ಮನದ ಕಡಲು’ ಮೂಲಕ ಮತ್ತೆ ಒಂದಾಗಿರುವುದು ಗೊತ್ತಿದೆ. ಈ ಸಿನಿಮಾದಲ್ಲಿ ‘ಫಿಸಿಕ್ಸ್ ಟೀಚರ್’ ಸುಮುಖ ನಾಯಕನಾಗಿದ್ದು, ಅವರಿಗೆ ಅಂಜಲಿ ಅನೀಶ್ ಹಾಗೂ ರಾಶಿಕಾ ಶೆಟ್ಟಿ ಜೋಡಿಯಾಗಿದ್ದಾರೆ. ಇತ್ತೀಚೆಗಷ್ಟೆ ಚಿತ್ರೀಕರಣ ಪೂರ್ಣಗೊಳಿಸಿರುವ ಚಿತ್ರತಂಡ, ‘ತುರ್ರಾ’ ಎಂದು ಸಾಗುವ ಚಿತ್ರದ ಎರಡನೇ ಹಾಡನ್ನು ಬಿಡುಗಡೆ ಮಾಡಿದೆ. ಅರ್ಥವಿಲ್ಲದ, ಅರ್ಥವಾಗದ ಪದಗಳನ್ನೇ ಸೇರಿಸಿ ಯೋಗರಾಜ್ ಭಟ್ ಸಾಹಿತ್ಯ ಬರೆದಿದ್ದಾರೆ. ವಿ. ಹರಿಕೃಷ್ಣ ಸಂಗೀತ ನೀಡಿದ್ದು, ಸಂಜಿತ್ ಹೆಗ್ಡೆ, ಪ್ರಾರ್ಥನಾ ಜತೆ ಅವರೂ ಹಾಡಿಗೆ ಧ್ವನಿಗೂಡಿಸಿದ್ದಾರೆ. ಸಾಂಗ್ನಲ್ಲಿ ಸುಮುಖ, ಅಂಜಲಿ ಅನೀಶ್, ರಂಗಾಯಣ ರಘು ಸೇರಿ ಹಲವರು ಭರ್ಜರಿಯಾಗಿ ಕುಣಿದು ಕುಪ್ಪಳಿಸಿದ್ದಾರೆ. ವಿ.ಹರಿಕೃಷ್ಣ, ‘ಇದು ಖುಷಿಯಿಂದ ಹಾಡಿದ ಹಾಡಲ್ಲ. ಲಿರಿಕ್ಸ್ ಶೀಟ್ ಹಿಡಿದು ತುಂಬಾ ಕಷ್ಟಪಟ್ಟು ಹಾಡಿದ ಹಾಡು. ವಿಶಿಷ್ಠ ಸಾಹಿತ್ಯದ ಮೂಲಕ ಜನರನ್ನು ಮೆಚ್ಚಿಸುವುದೇ ದೊಡ್ಡ ಕೆಲಸ, ಅದನ್ನು ‘ತುರ್ರಾ’ ಹಾಡು ಮಾಡುತ್ತದೆ. ಇಲ್ಲಿ ಭಾಷೆಯೇ ಮಾತನಾಡುತ್ತದೆ. ಮೀನಿಂಗ್ ಏನು ಎಂದು ಕೇಳಿದರೆ, ಮುಖದಲ್ಲಿ ಸ್ಮೈಲ್ ಹೊರಹೊಮ್ಮುತ್ತದೆ ಅಷ್ಟೇ’ ಎಂದರು.
