ಕಡೆಗೂ ಹೊರಬಿತ್ತು ಯಶ್​​ 'ಟಾಕ್ಸಿಕ್'​ ರಿಲೀಸ್​ ಡೇಟ್​! ಆಗಸ್ಟ್​ ತಿಂಗಳ ಈ ದಿನಾಂಕದಂದು ಸಿನಿಮಾ ತೆರೆಗೆ

ಬೆಂಗಳೂರು: ಸ್ಯಾಂಡಲ್​ವುಡ್​ನ ರಾಕಿಂಗ್​ ಸ್ಟಾರ್,​ ನಟ ಯಶ್ ಅಭಿನಯದ ಹಾಗೂ ಮಾಲಿವುಡ್​ ನಿರ್ದೇಶಕಿ ಗೀತು ಮೋಹನ್ ದಾಸ್ ನಿರ್ದೇಶನದ ಬಹುನಿರೀಕ್ಷಿತ 'ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್ ಅಪ್ಸ್' (Toxic) ಚಿತ್ರದ ಹವಾ ಸದ್ಯ ಭಾರತೀಯ ಚಿತ್ರೋದ್ಯಮದಲ್ಲಿ ಬಲು ಜೋರಾಗಿದೆ. ಈಗಾಗಲೇ ಹಲವು ಬಾರಿ ರಿಲೀಸ್ ಡೇಟ್​ನಲ್ಲಿ ಮುಂದೂಡಿಕೆಯಾಗಿದ್ದ ಚಿತ್ರಕ್ಕೆ ಕಡೆಗೂ ಅಧಿಕೃತ ಬಿಡುಗಡೆ ದಿನಾಂಕ ಫಿಕ್ಸ್ ಆಗಿದೆ.

ಆರಂಭದಲ್ಲಿ ಸಿನಿಮಾದ ಮೊದಲು ಮತ್ತು ಎರಡನೇ ಟೀಸರ್​ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುವುದರ ಜತೆಗೆ ಸಾಕಷ್ಟು ವಿವಾದಗಳನ್ನು ಸೃಷ್ಟಿಸಿತು. ಜಾಗತಿಕ ಮಟ್ಟದಲ್ಲಿ ಚಿತ್ರ ತೆರೆ ಕಾಣುತ್ತಿರುವ ಹಿನ್ನೆಲೆ ಸಿನಿಮಾದ ರಿಲೀಸ್​ ಡೇಟ್​ ಪದೇ ಪದೇ ಮುಂದೂಡಿಕೆಯಾಯಿತು. ಆದರೀಗ, ಯಶ್​ ಚಿತ್ರದ ಬಿಡುಗಡೆ ದಿನಾಂಕ ಅಧಿಕೃತವಾಗಿ ಫೈನಲ್​ ಆಗಿದ್ದು, ಇದೇ ಆಗಸ್ಟ್​ 26ರಂದು ಬಹುತೇಕ ಚಿತ್ರಮಂದಿರಗಳಲ್ಲಿ ತೆರೆ ಕಾಣಲು ಸಿದ್ಧವಾಗಿದೆ.

ಈ ವರ್ಷದ ಮಾರ್ಚ್​ 19ರಂದು ಬಹುತೇಕ ಚಿತ್ರಮಂದಿರಗಳಲ್ಲಿ ರಿಲೀಸ್​ ಆಗಲು ಸಜ್ಜಾಗಿದ್ದ ಟಾಕ್ಸಿಕ್​, ಕನ್ನಡ, ಮಲಯಾಳಂ, ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಏಕಕಾಲಕ್ಕೆ ತೆರೆಕಾಣಲು ಮುಂದಾಗಿತ್ತು. ಮತ್ತೊಂದೆಡೆ, ಇದೇ ದಿನದಂದು ರಣವೀರ್ ಸಿಂಗ್ ಅಭಿನಯದ ಬ್ಲಾಕ್​ಬಸ್ಟರ್​ 'ಧುರಂಧರ್​' ಸಿನಿಮಾ ಸೀಕ್ವೆಲ್​ ಕೂಡ ಬಿಡುಗಡೆಯಾಗಲು ಸಜ್ಜಾಗಿತ್ತು. ಆದರೆ, ಮುಂದೂಡಿಕೆಯಿಂದ, ಜಾಗತಿಕ ಹಾಗೂ ದೇಶಿಯ ಬಾಕ್ಸ್​ ಆಫೀಸ್​ ಕ್ಲ್ಯಾಶ್​​ ತಪ್ಪಿತು.

'ಗುಲ್ಟೇ' ಸಿನಿ ವರದಿ ಪ್ರಕಾರ, ಯಶ್​ ಅವರ ಟಾಕ್ಸಿಕ್​ ಚಿತ್ರದ ರನ್​ಟೈಮ್​ ಬರೋಬ್ಬರಿ 3 ಗಂಟೆ 15 ನಿಮಿಷವಿದೆ. ಅಮೆರಿಕನ್​ ಶೋಗಳನ್ನು ಗಮನದಲ್ಲಿಟ್ಟುಕೊಂಡು ಇಷ್ಟು ಗಂಟೆಗಳ ಕಾಲ ಸಿನಿಮಾವನ್ನು ತಯಾರಿಸಲಾಗಿದೆ. 'ಧುರಂಧರ್​ 2: ದಿ ರಿವೆಂಜ್​' ಚಿತ್ರವು 3 ಗಂಟೆ 50 ನಿಮಿಷಗಳ ಲೆಂಥಿ ರನ್​ಟೈಮ್​ ಹೊಂದಿತ್ತು. ಈ ಬ್ಲಾಕ್​ಬಸ್ಟರ್​ ಹಿಟ್​ ಸಿನಿಮಾ ಬಳಿಕ ಈಗ ಯಶ್​ ಚಿತ್ರವನ್ನು ಸಿನಿಪ್ರೇಮಿಗಳು ಮೂರು ಗಂಟೆಗೂ ಹೆಚ್ಚು ಸಮಯ ಕುಳಿತು ನೋಡಬೇಕಿದೆ ಎಂದು ವರದಿಗಳು ಉಲ್ಲೇಖಿಸಿವೆ.

'ಕೆಜಿಎಫ್'​ ಸರಣಿಯ ಭರ್ಜರಿ ಯಶಸ್ಸಿನ ಬಳಿಕ ಪ್ಯಾನ್​ ಇಂಡಿಯಾ ಸ್ಟಾರ್​ ಆಗಿ ಬೆಳೆದಿರುವ ನಟ ರಾಕಿಂಗ್​ ಸ್ಟಾರ್​ ಯಶ್ 40ನೇ ವಸಂತಕ್ಕೆ ಬಹುನಿರೀಕ್ಷಿತ 'ಟಾಕ್ಸಿಕ್​' ಚಿತ್ರದ ಮೊದಲ ಟೀಸರ್​ ರಿಲೀಸ್ ಆಯಿತು. ಟೀಸರ್​ನ ಆರಂಭದಲ್ಲಿ ಮೂಡಿಬಂದ ಹಸಿಬಿಸಿ ದೃಶ್ಯವಂತು ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿ, ಹಲವು ಕಾನೂನು ದೂರುಗಳಿಗೂ ಕಾರಣವಾಯಿತು. ಸಿನಿಮಾದ ನಿರ್ದೇಶಕಿ ವಿರುದ್ಧ ತೀವ್ರ ಟೀಕೆಗಳು ಹರಿದುಬಂದಿತು. ಈಗ ಎರಡನೇ ಟೀಸರ್​ ಯಶ್​ ಪಾತ್ರದ ಮೇಲೆ ಭಾರೀ ಕುತೂಹಲವನ್ನು ಕೆರಳಿಸಿದೆ. ಕಾರಣ, ಇದರಲ್ಲಿ ತೋರಿಸಲಾದ ಸ್ಟಾರ್​ ನಟನ ದ್ವಿಪಾತ್ರ.