ಬೆಂಗಳೂರು: ‘ಮೂರು ವರ್ಷಗಳ ಶ್ರಮ ನನಗೆ ಮಾತ್ರ ಗೊತ್ತು. ಸಣ್ಣ ಆಗಿ, ದಪ್ಪ ಆಗಿ ಸಾಕಷ್ಟು ಶ್ರಮ ಹಾಕಿದ್ದೆ. ಹೇಗೆ ಬೇಕಾದರೂ ಮಾಡಬಹುದು ಅಂತಿದ್ದರೆ, ಡ್ಯೂಪ್ ಹಾಕಬಹುದಿತ್ತು, ಗ್ರಾಫಿಕ್ಸ್ನಲ್ಲಿ ಏನಾದರೂ ಮಾಡಬಹುದಿತ್ತು. ಆದರೆ, ಅದ್ಯಾವುದೂ ಮಾಡದೇ, ಕಷ್ಟಪಟ್ಟು ಮಾಡಿದ್ದಕ್ಕೆ ಯಾವ ಸೀನ್ ಮಾಡಬೇಕು, ಯಾವುದನ್ನು ಮಾಡಬಾರದೆಂದು ಚೆನ್ನಾಗಿ ಅರ್ಥವಾಯಿತಲ್ಲ, ಯಾವುದಕ್ಕೆ ಎಷ್ಟು ಬೆಲೆ ಇದೆ ಅಂತ ಗೊತ್ತಾಯಿತಲ್ಲ, ಇನ್ನು ಮುಂದೆ ಮಾಡಿಕೊಂಡು ಹೋಗ್ತೀನಿ. ಪಟಪಟ ಅಂತ ಮಾಡಿಕೊಂಡು ಹೋಗ್ತೀನಿ ...’ ಇತ್ತೀಚಿನ ವಿವಾದಗಳಿಂದ ಧ್ರುವ ಸರ್ಜಾಗೆ ಬೇಸರವಾಗಿದೆಯಾ? ನೋವಾಗಿದೆಯಾ? ಇಲ್ಲದಿದ್ದರೆ, ಅವರು ಈ ರೀತಿ ಮಾತನಾಡಿದ್ದು ಏಕೆ? ಎಂಬ ಪ್ರಶ್ನೆ ಸಹಜವಾಗಿಯೇ ಬರುತ್ತದೆ. ಈ ಪ್ರಶ್ನೆಯನ್ನು ಅವರ ಮುಂದಿಟ್ಟರೆ, ಬೇಸರವೂ ಇಲ್ಲ, ನೋವೂ ಇಲ್ಲ, ತನಗೆ ಅರಿವಾಗಿದೆ ಎನ್ನುತ್ತಾರೆ ಧ್ರುವ.
