ಈ ಕುರಿತು ಹಿಂದೊಮ್ಮೆ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಪುನೀತ್, ‘ನಾನು ಆರೇಳು ವರ್ಷದವನಿದ್ದಾಗ ಅಪ್ಪಾಜಿ ಕಲರ್ ಶರ್ಟ್ ಮತ್ತು ಲುಂಗಿ ತೊಡುವುದನ್ನು ನೋಡಿದ್ದೆ. ಮಿಕ್ಕಂತೆ, ನನಗೆ ನೆನಪಿರುವಂತೆ ಅಪ್ಪಾಜಿ ಯಾವತ್ತೂ ವೈಟ್ ಆಂಡ್ ವೈಟ್ನಲ್ಲೇ ಹೆಚ್ಚು ಕಾಣಿಸಿಕೊಳ್ಳುತ್ತಿದ್ದರು. ಹಾಗಾಗಿ ಅವರಿಗೆ ಬಟ್ಟೆಯನ್ನು ಗಿಫ್ಟ್ ಮಾಡುವುದಕ್ಕೆ ಬಹಳ ಕಷ್ಟವಾಗುತ್ತಿತ್ತು. ಬೇರೆ ಬಣ್ಣದ ಬಟ್ಟೆ ಹಾಕದ ಕಾರಣ, ಅದನ್ನು ತಂದುಕೊಡುವುದಕ್ಕೆ ಆಗುತ್ತಿರಲಿಲ್ಲ. ಹಾಗಾಗಿ ಬಟ್ಟೆಗಳನ್ನು ಬಿಟ್ಟು, ಅವರಿಗೆ ಕೂರುವುದಕ್ಕೆ ಅನುಕೂಲವಾಗುವಂತಹ ಸೋಫಾಗಳು, ಟಿವಿ, ಸಂಜೆ ವಾಕಿಂಗ್ ಮಾಡುವುದಕ್ಕೆ ಎಂದು ಶೂಗಳನ್ನು ಗಿಫ್ಟ್ ಮಾಡಿದ್ದುಂಟು. ಅದರಲ್ಲೂ ಶೂಗಳನ್ನು ಕೊಡುವಾಗ, ಅದರ ಬೆಲೆಯಿಂದ ಒಂದು ಸೊನ್ನೆ ಕಡಿಮೆ ಮಾಡಿ ಹೇಳುತ್ತಿದ್ದೆ. ಏಕೆಂದರೆ, ಅದರ ನಿಜವಾದ ರೇಟ್ ಹೇಳಿದರೆ, ಅವರು ಶೂ ಹಾಕುತ್ತಲೇ ಇರಲಿಲ್ಲ. ಇಷ್ಟೊಂದು ಬೆಲೆ ಬಾಳುವ ಶೂಗಳು ತಮಗೇಕೆ ಎಂದು ವಾಪಸ್ಸು ಮಾಡಿಬಿಡುತ್ತಿದ್ದರು. ಹಾಗಾಗಿ ಬೆಲೆ ಕಡಿಮೆ ಮಾಡಿ ಹೇಳಬೇಕಿತ್ತು’ ಎಂದು ಪುನೀತ್ ಹೇಳಿಕೊಂಡಿದ್ದರು.
