ವಿಜಯಾನಂದ ಹೊಸ ಪೋಸ್ಟರ್​ ಬಿಡುಗಡೆ: ಶ್ರೀಮತಿ ಲಲಿತಾ ಸಂಕೇಶ್ವರ ಪಾತ್ರದಲ್ಲಿ ಸಿರಿ ಪ್ರಹ್ಲಾದ್​

ಬೆಂಗಳೂರು: ಈ ವರ್ಷದ ಬಹುನಿರೀತ ಬಹುಭಾಷಾ ಚಿತ್ರಗಳಲ್ಲಿ "ವಿಜಯಾನಂದ' ಪ್ರಮುಖವಾದುದು. ಪದ್ಮಶ್ರೀ ಡಾ. ವಿಜಯ ಸಂಕೇಶ್ವರ ಅವರ ಜೀವನಾಧಾರಿತ ಚಿತ್ರವಾದ ಕಾರಣ ಪ್ರಾರಂಭದಿಂದಲೂ "ವಿಜಯಾನಂದ' ಸಾಕಷ್ಟು ಕುತೂಹಲ ಮೂಡಿಸಿದೆ.

ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ ರಿಷಿಕಾ ಶರ್ಮಾ ಆಕ್ಷನ್​&ಕಟ್​ ಹೇಳುತ್ತಿದ್ದು, ಡಾ. ಆನಂದ ಸಂಕೇಶ್ವರ ನಿರ್ಮಿಸುತ್ತಿದ್ದಾರೆ. ಡಾ. ವಿಜಯ ಸಂಕೇಶ್ವರರ ಪಾತ್ರದಲ್ಲಿ ನಿಹಾಲ್​ ನಟಿಸುತ್ತಿದ್ದು, ಅವರ ತಂದೆ ಬಿ.ಜಿ. ಸಂಕೇಶ್ವರರ ಪಾತ್ರದಲ್ಲಿ ಹಿರಿಯ ನಟ ಅನಂತ್​ ನಾಗ್​, ಗುರುಗಳ ಪಾತ್ರದಲ್ಲಿ ರವಿಚಂದ್ರನ್​, ಡಾ. ಆನಂದ ಸಂಕೇಶ್ವರರ ಪಾತ್ರದಲ್ಲಿ ಭರತ್​ ಬೋಪಣ್ಣ ನಟಿಸುತ್ತಿದ್ದಾರೆ.

ಶ್ರೀಮತಿ ಲಲಿತಾ ಸಂಕೇಶ್ವರರ ಪಾತ್ರದಲ್ಲಿ ಸಿರಿ ಪ್ರಹ್ಲಾದ್​ ನಟಿಸುತ್ತಿದ್ದು, ಭಾನುವಾರ ಚಿತ್ರತಂಡ ಅವರ ಪಾತ್ರ ಪರಿಚಯಿಸುವ ಟೀಸರ್​ ಬಿಡುಗಡೆ ಮಾಡಿದೆ. ವಿಶೇಷವೆಂದರೆ, ಈ ಟೀಸರ್​ ಡಾ. ವಿಜಯ ಸಂಕೇಶ್ವರ ಮತ್ತು ಶ್ರೀಮತಿ ಲಲಿತಾ ಸಂಕೇಶ್ವರ ಅವರ ಮದುವೆಯ ಫೋಟೋ ಸೇರಿದಂತೆ ಹಲವು ಬ್ಲಾ$್ಯಕ್​ ಆಂಡ್​ ವೈಟ್​ ಫೋಟೋಗಳನ್ನು ಒಳಗೊಂಡಿದೆ.

ಇನ್ನು ಆ. 2ರಂದು "ವಿಜಯಾನಂದ' ಚಿತ್ರದ ಟೀಸರ್​ ಆನಂದ್​ ಆಡಿಯೋ ಯೂಟ್ಯೂಬ್​ ಚಾನಲ್​ನಲ್ಲಿ ಬಿಡುಗಡೆಯಾಗಿದ್ದು ಪ್ರೇಕ್ಷಕರಿಂದ ಅತ್ಯುತ್ತಮ ಪ್ರತಿಕ್ರಿಯೆ ಪಡೆದಿದೆ. ಕನ್ನಡದಲ್ಲಿ 82 ಲಕ್ಷ, ತೆಲುಗಿನಲ್ಲಿ 50 ಲಕ್ಷ, ತಮಿಳಿನಲ್ಲಿ 51 ಲಕ್ಷ ಹಾಗೂ ಮಲಯಾಳಂನಲ್ಲಿ 30 ಲಕ್ಷಕ್ಕೂ ಅಧಿಕ ಬಾರಿ ವೀಕ್ಷಣೆಗೊಂಡಿದೆ. ಆ ಮೂಲಕ ನಾಲ್ಕೂ ಭಾಷೆಗಳಿಂದ ಬರೋಬ್ಬರಿ 2 ಕೋಟಿ 10 ಲಕ್ಷಕ್ಕೂ ಹೆಚ್ಚು ವೀಕ್ಷಣೆಯಾಗಿದ್ದು ದಾಖಲೆ ನಿರ್ಮಿಸಿದೆ. ಇದೇ ವರ್ಷ "ವಿಜಯಾನಂದ' ಚಿತ್ರ ಬಿಡುಗಡೆಯಾಗಲಿದೆ.