ಡೊನೇಷನ್, ಪರೀಕ್ಷಾ ಅಕ್ರಮದ ಸಮಸ್ಯೆಗಳು ಒಂದೆಡೆಯಾದರೆ, ಇನ್ನು ಆಂತರಿಕವಾಗಿ ಶಿಕ್ಷಣ ವ್ಯವಸ್ಥೆಯು ಹಲವು ಸಮಸ್ಯೆಗಳನ್ನು ಎದುರಿಸುತ್ತಿದೆ. ವಿದ್ಯಾರ್ಥಿಗಳು ದಾರಿ ತಪ್ಪುತ್ತಿದ್ದಾರೆ. ರ್ಯಾಗಿಂಗ್, ಅಕ್ರಮ ಚಟುವಟಿಕೆಗಳಲ್ಲಿ ಭಾಗಿಯಾಗುವ ಮೂಲಕ ತಮ್ಮ ಭವಿಷ್ಯವನ್ನೇ ಹಾಳು ಮಾಡಿಕೊಳ್ಳುತ್ತಿದ್ದಾರೆ. ಇದು ಹೀಗೆ ಮುಂದುವರಿದರೆ ಮುಂದೊಂದು ದಿನ ಇಡೀ ನಾಗರಿಕ ಸಮಾಜ ತಲೆತಗ್ಗಿಸುವಂತಾಗಬಹುದು ಎಂಬ ಎಚ್ಚರಿಕೆಯೊಂದಿಗೆ ನಿರ್ದೇಶಕ ಅರುಣ್ ಅಮುಕ್ತ್ ‘ವಿದ್ಯಾರ್ಥಿ ವಿದ್ಯಾರ್ಥಿನಿಯರೇ’ ನಿರೂಪಿಸಿದ್ದಾರೆ. ಪ್ರಾಥಮಿಕ ಹಾಗೂ ಪ್ರೌಢಶಾಲೆ ವಿದ್ಯಾರ್ಥಿಗಳ ಸುತ್ತ ಹೆಣೆದ ಕಥೆಯಾಗಿದ್ದು, ಹದಿಹರೆಯದ ವಯಸ್ಸಿನವರ ತವಕ-ತಲ್ಲಣಗಳನ್ನು ತೋರಿಸಲಾಗಿದೆ. ಮಕ್ಕಳ ಕೆಟ್ಟ ಜೀವನ ಶೈಲಿ, ಮೊಬೈಲ್ ಅಡಿಕ್ಷನ್, ಸಂಬಂಧಗಳಿಗೆ ಬೆಲೆ ನೀಡದ ಪರಿಸ್ಥಿತಿ ಎದುರಾದಾಗ ಪಾಲಕರು ನಿರ್ವಹಿಸಬೇಕಾದ ಜವಾಬ್ದಾರಿ, ಮೂಡಿಸಬೇಕಾದ ಅರಿವಿನ ಕುರಿತು ಅರುಣ್ ಬೆಳಕು ಚೆಲ್ಲಿದ್ದಾರೆ.
