'ಉರಿ-ದಿ ಸರ್ಜಿಕಲ್​ ಸ್ಟ್ರೈಕ್​' ಸಿನಿಮಾ ತೆರೆಕಂಡು ಇಂದಿಗೆ ಸರಿಯಾಗಿ ಒಂದು ವರ್ಷ: ಆ ದಿನಗಳನ್ನು ನೆನಪಿಸಿಕೊಂಡ ರಾಷ್ಟ್ರಪ್ರಶಸ್ತಿ ಭಾಜನ ನಟ ವಿಕ್ಕಿ ಕೌಶಾಲ್​​

'ಉರಿ: ದಿ ಸರ್ಜಿಕಲ್​ ಸ್ಟ್ರೈಕ್​' ಸರಿಯಾಗಿ ಒಂದು ವರ್ಷದ ಹಿಂದೆ ಸಂಚಲನ ಮೂಡಿಸಿದ್ದ ಬಾಲಿವುಡ್​ ಸಿನಿಮಾ.

2016ರ ಸೆಪ್ಟೆಂಬರ್​ನಲ್ಲಿ ಪಾಕ್​ ಉಗ್ರರು ಜಮ್ಮು-ಕಾಶ್ಮೀರದ ಉರಿಯಲ್ಲಿ ಭಾರತೀಯ ಸೈನಿಕ ಶಿಬಿರದ ಮೇಲೆ ದಾಳಿ ನಡೆಸಿದ್ದರು. ಈ ದಾಳಿಯಲ್ಲಿ ಸುಮಾರು 19 ಯೋಧರು ಮರಣಹೊಂದಿದ್ದರು. ಅದಕ್ಕೆ ಪ್ರತಿಯಾಗಿ ಭಾರತೀಯ ಸೇನೆ ಕೆಲವೇ ದಿನಗಳಲ್ಲಿ ಉರಿ ಸರ್ಜಿಕಲ್​ ಸ್ಟ್ರೈಕ್​ ನಡೆಸಿ ಪ್ರತೀಕಾರ ತೀರಿಸಿಕೊಂಡಿತ್ತು.

ಇದೇ ಕಥಾಹಂದರವನ್ನಿಟ್ಟುಕೊಂಡು ನಿರ್ದೇಶಕ ಆದಿತ್ಯ ಧಾರ್​ ಉರಿ-ದಿ ಸರ್ಜಿಕಲ್​ ಸ್ಟ್ರೈಕ್​ ಎಂಬ ಸಿನಿಮಾ ಮಾಡಿದ್ದರು. ಅದು 2019ರ ಜನವರಿ 11ರಂದು ಬಿಡುಗಡೆಯಾಗಿತ್ತು. ಅದ್ಭುತ ಯಶಸ್ಸನ್ನೂ ಗಳಿಸಿತ್ತು.

ಈ ಸಿನಿಮಾದಲ್ಲಿ ಮುಖ್ಯಪಾತ್ರದಲ್ಲಿ ಅಭಿನಯಿಸಿದ್ದ ನಟ ವಿಕ್ಕಿ ಕೌಶಾಲ್​ ಅತ್ಯುತ್ತಮ ನಟ ರಾಷ್ಟ್ರಪ್ರಶಸ್ತಿಗೆ ಭಾಜನರಾಗಿದ್ದರು.

ಸಿನಿಮಾಕ್ಕೆ ಸರಿಯಾಗಿ ಒಂದು ವರ್ಷವಾದ ಹಿನ್ನೆಲೆಯಲ್ಲಿ ವಿಕ್ಕಿ ಕೌಶಾಲ್, ಸಿನಿಮಾದ ಫೋಟೋವೊಂದನ್ನು ಇನ್ಸ್ಟಾಗ್ರಾಂನಲ್ಲಿ ಪೋಸ್ಟ್​ ಮಾಡಿ, ​ ಈ ಚಿತ್ರದಲ್ಲಿ ಅಭಿನಯಿಸಿದ ನಮ್ಮೆಲ್ಲರಿಂದ ಹಿಡಿದು, ಸಿನಿಮಾವನ್ನು ಪ್ರೋತ್ಸಾಹಿಸಿದ ನಿಮ್ಮೆಲ್ಲರವರೆಗೆ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ಉರಿ ತಂಡ ಯಾವಾಗಾಲೂ ಕೃತಜ್ಞವಾಗಿರುತ್ತದೆ ಎಂದು ಕ್ಯಾಪ್ಷನ್​ ಬರೆದಿದ್ದಾರೆ. ಈ ಮೂಲಕ ತಮ್ಮ ಸಂತೋಷ ವ್ಯಕ್ತಪಡಿಸಿದ್ದಾರೆ.

ಹಾಗೇ ಈ ಸಿನಿಮಾದ ನಟಿ ಯಾಮಿ ಗೌತಮ್​ ಅವರೂ ಕೂಡ ವಿಕ್ಕಿ ಕೌಶಾಲ್​ ಮತ್ತು ಆದಿತ್ಯ ಧಾರ್​ ಅವರೊಂದಿಗೆ ಇರುವ ಫೋಟೋ ಪೋಸ್ಟ್ ಮಾಡಿ, ನಮ್ಮ ಯೋಧರಿಗೆ ಹಾಗೂ ನಾವು ಮಾಡಿದ ಉರಿ ದಿ ಸರ್ಜಿಕಲ್​ ಸ್ಟ್ರೈಕ್​ ಸಿನಿಮಾವನ್ನು ಪ್ರೀತಿಯಿಂದ ಒಪ್ಪಿಕೊಂಡ ವೀಕ್ಷಕರಿಗೆ ಸದಾ ಕೃತಜ್ಞತೆಗಳು. ಉರಿ ಸಿನಿಮಾ ಅದ್ಭುತ ರೀತಿಯಲ್ಲಿ ಮೂಡಿಬರಲು ಹಾರ್ಡ್​ ವರ್ಕ್ ಮಾಡಿದ ಸಿನಿಮಾ ತಂಡಕ್ಕೆ ಕೂಡ ಧನ್ಯವಾದಗಳು ಎಂದು ಬರೆದಿದ್ದಾರೆ.

ಉರಿ ಸಿನಿಮಾ ವಿಮರ್ಶಕರಿಂದಲೂ ಪ್ರಶಂಸೆಯನ್ನು ಪಡೆದಿತ್ತು. ಬಾಕ್ಸ್​ ಆಫೀಸ್​ನಲ್ಲೂ ಮಾಸಿವ್​ ಅಮೋಘ ಯಶಸ್ಸು ಗಳಿಸಿತ್ತು. ಸುಮಾರು 342 ಕೋಟಿ ರೂಪಾಯಿಯನ್ನು ಗಳಿಕೆ  ಮಾಡಿತ್ತು.(ಏಜೆನ್ಸೀಸ್​)