ರಸ್ತೆಗಳಲ್ಲಿ ಜನರನ್ನ ನೋಡುತ್ತಿದರೆ, ಕರೊನಾ ಇರೋದರ ಬಗ್ಗೆಯೇ ಮರೆತುಬಿಟ್ಟಿದ್ದಾರೆ ಎಂದನಿಸುತ್ತಿದೆ. ಕಳೆದ ವಾರ ರಸ್ತೆಗಳಲ್ಲಿ ಜನ ಇರಲಿಲ್ಲ. ಈಗ ಅದೆಷ್ಟು ನಾರ್ಮಲ್ ಆಗಿ ಬಿಟ್ಟಿದೆ ಎಂದರೆ, ಮಾಸ್ಕ್ ಇಲ್ಲ, ಅಂತರ ಇಲ್ಲ, ಎಲ್ಲವನ್ನೂ ಗಾಳಿಗೆ ತೂರಿ ಹಬ್ಬದಲ್ಲಿ ಬ್ಯುಸಿಯಾಗಿ ಬಿಟ್ಟಿದ್ದಾರೆ. ಒಂದು ವರ್ಷ ಹಬ್ಬ ಮಾಡದಿದ್ದರೆ, ಲಕ್ಷ್ಮೀ ಕೋಪ ಮಾಡಿಕೊಳ್ಳುವುದಿಲ್ಲ. ನಾವು ಹುಷಾರಾಗಿದ್ದರೆ ಮುಂದಿನ ವರ್ಷ ಇನ್ನೂ ಚೆನ್ನಾಗಿ ಮಾಡಬಹುದು. ಮುಖ್ಯವಾಗಿ ಚೇನ್ ಬ್ರೇಕ್ ಆಗಬೇಕಿತ್ತು. ಕರೊನಾ ಹರಡುವುದರಿಂದ ತಡೆಯಬೇಕಿತ್ತು. ಆದರೆ, ಹಬ್ಬ ಅಂತ ಎಲ್ಲರೂ ರಸ್ತೆಗಿಳಿದರೆ, ಬ್ರೇಕ್ ಮಾಡೋದಕ್ಕೆ ಹೇಗೆ ಸಾಧ್ಯ? ಮೊದಲು ಜನ ಅರ್ಥ ಮಾಡಿಕೊಳ್ಳಬೇಕು. ನಮಗೆ ನಾವೇ ತೊಂದರೆ ಮಾಡಿಕೊಂಡು, ಬೇರೆಯವರಿಗೂ ತೊಂದರೆ ಕೊಟ್ಟುಕೊಂಡು ಹಬ್ಬ ಮಾಡಬೇಕಾ? ಇದು ಹೆಣ್ಮಕ್ಕಳ ಹಬ್ಬ. ಅವರು ಎಷ್ಟು ಸರಳ ಮತ್ತು ಸುರಕ್ಷಿತವಾಗಿ ಮಾಡುತ್ತಾರೋ ಅದು ಬಹಳ ಮುಖ್ಯ. ಈ ಸಂದರ್ಭದಲ್ಲಿ ಶಾಪಿಂಗ್ಗೆ ಹೋಗಿ ಅವರಿಗೆ ಸಮಸ್ಯೆಯಾದರೆ, ಇಡೀ ಕುಟುಂಬಕ್ಕೆ ಸಮಸ್ಯೆಯಾಗುವುದಿಲ್ಲವಾ? ಹಾಗಾಗಿ ಬಹಳ ಹುಷಾರಾಗಿ ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ಸರಳವಾಗಿ ಈ ಬಾರಿ ಪೂಜೆ ಮಾಡಿ. ನನಗೆ ಶೂಟಿಂಗ್ ಇರುವುದರಿಂದ ನನಗೆ ಹಬ್ಬ ಇಲ್ಲ. ಮನೆಯಲ್ಲಿ ಬೇಗ ಪೂಜೆ ಮುಗಿಸಿ ಶೂಟಿಂಗ್ಗೆ ಹೋಗಬೇಕಿದೆ.
