ಆ ನಂತರ ನಡೆದಿದ್ದೆಲ್ಲಾ ಇತಿಹಾಸ. ವಜ್ರಮುನಿ ಅವರ ಅಭಿನಯ ಅದೆಷ್ಟು ಸೂಪರ್ ಹಿಟ್ ಆಯಿತು ಎಂದರೆ, ಅಲ್ಲಿಂದ ಅವರಿಗೆ ಸಾಕಷ್ಟು ಚಿತ್ರಗಳಲ್ಲಿ ವಿಲನ್ ಪಾತ್ರ ಮಾಡುವ ಅವಕಾಶಗಳು ಸಿಕ್ಕವು. ‘ಸಿಪಾಯಿ ರಾಮು’, ‘ಸಂಪತ್ತಿಗೆ ಸವಾಲ್’ ‘ಮಯೂರ’, ‘ಬಹದ್ದೂರ್ ಗಂಡು’, ‘ಗಿರಿ ಕನ್ಯೆ’, ‘ಕಳ್ಳ ಕುಳ್ಳ’, ‘ಅಂತ’, ‘ಅಪೂರ್ವ ಸಂಗಮ’ ಮುಂತಾದ ಹಲವು ಚಿತ್ರಗಳಲ್ಲಿ ಅವರ ಅಭಿನಯ ಸಾಕಷ್ಟು ಮೆಚ್ಚುಗೆ ಪಡೆಯಿತು. ಅವರ ಧ್ವನಿ, ಡೈಲಾಗ್ ಹೇಳುವ ಶೈಲಿ, ಒರಟಾದ ಮುಖ, ತೀಕ್ಷ್ಣ ಕಣ್ಣುಗಳು ಅವರಿಗೆ ಪ್ಲಸ್ ಆಗಿ, ಬೇಡಿಕೆ ಹೆಚ್ಚಿಸಿದವು. ಈ ವೈಶಿಷ್ಟ್ಯಗಳೇ, ಜನ ಅವರನ್ನು ‘ನಟ ಭೈರವ’ ಮತ್ತು ‘ನಟ ಭಯಂಕರ’ ಎಂಬ ಬಿರುದುಗಳಿಂದ ಗುರುತಿಸುವಂತೆ ಮಾಡಿದವು.
