ಸಾಮಾನ್ಯವಾಗಿ ಚಿತ್ರರಂಗಕ್ಕೆ ಬರುವ ಮುನ್ನ ವರ್ಕೌಟ್ ಮಾಡಿ ದೇಹ ಹುರಿಗೊಳಿಸಿಕೊಳ್ಳುವ, ಪಾತ್ರಕ್ಕಾಗಿ ತೂಕ ಹೆಚ್ಚು ಅಥವಾ ಕಡಿಮೆ ಮಾಡಿಕೊಂಡಿರುವ ನಟರನ್ನು ನೋಡಿರುತ್ತೇವೆ. ಆದರೆ, "ಗಂಡ ಹೆಂಡತಿ', "ಉಗ್ರಂ', "ಕರ್ವ' ಸೇರಿ 30ಕ್ಕೂ ಅಧಿಕ ಸಿನಿಮಾಗಳಲ್ಲಿ ಮಿಂಚಿರುವ ನಟ ತಿಲಕ್ ಶೇಖರ್ ಕಳೆದ 20 ವರ್ಷಗಳಿಂದ 75 ಕೆಜಿ ತೂಕವನ್ನೇ ಮೈಂಟೇನ್ ಮಾಡಿಕೊಂಡು ಬಂದಿದ್ದಾರಂತೆ. ಈ ಬಗ್ಗೆ ಖುದ್ದು ಅವರೇ, "ಜೀವನದಲ್ಲಿ ಎಲ್ಲವೂ ಬ್ಯಾಲನ್ಸ್ ಆಗಿರಬೇಕು. ಹಾಗಿದ್ದರೆ ಮಾತ್ರ ಜೀವನ ಚೆನ್ನಾಗಿರುತ್ತದೆ. ಆಹಾರದ ವಿಷಯದಲ್ಲೂ ಹಾಗೇ. 2006ರಲ್ಲಿ ರಿಲೀಸ್ ಆದ ನನ್ನ ಮೊದಲ "ಗಂಡ ಹೆಂಡತಿ' ಚಿತ್ರದಿಂದ ಇಲ್ಲಿಯವರೆಗೂ ಕಳೆದ 20 ವರ್ಷಗಳಿಂದ 75 ಕೆಜಿ ತೂಕವನ್ನೇ ಮೈಂಟೇನ್ ಮಾಡಿಕೊಂಡಿದ್ದೇನೆ. 74 ಆಗಿಲ್ಲ, 76 ಆಗಿಲ್ಲ. ಶೂಟಿಂಗ್ ಇರುವಾಗ ಕಟ್ಟುನಿಟ್ಟಾಗಿ ಡಯಟ್ ಮಾಡಲಾಗಲ್ಲ. ಆದರೆ, ಪ್ರತಿದಿನ ಒಂದು ತಾಸು ವರ್ಕೌಟ್ ತಪ್ಪಲ್ಲ. ಹಾಗೇ ಪ್ರೋಟಿನ್ ಯುಕ್ತ ಆಹಾರ ಹೆಚ್ಚಾಗಿ ಸೇವಿಸಿ, ಕಾರ್ಬ್ಸ್ ಕಡಿಮೆ ಮಾಡುತ್ತೇನೆ' ಎಂದು ಮಾಹಿತಿ ನೀಡುತ್ತಾರೆ.
